Ka ndërruar jetë në moshën 47-vjeçare bashkatdhetari nga Prizreni, Arsim Elshani, në një aksident trafiku në Gjermani.
Sipas mediave gjermane, aksidenti ndodhi midis trekëndëshit të autostradës Wanlo dhe kryqëzimit Erkelenz-Ost, ku më 15 nëntor 2025, shoferi i dyshuar në gjendje të dehur hyri në drejtim të gabuar të autostradës dhe u përplas direkt me makinën e të ndjerit Elshani.
Përplasja ishte aq e fortë sa të dy shoferët mbetën të bllokuar në makinat e tyre. Zjarrfikësit luftuan me orë të tëra për t’i nxjerrë nga makinat e tyre, por ndihma ishte shumë vonë për 47-vjeçarin nga Kosova; ai vdiq nga plagët e rënda në vendngjarje. Shoferi i dyshuar për shkaktimin e këtij aksidenti me fatalitet u dërgua me lëndime të rënda në spital.
Pas rastit tragjik ku humbi jetën Arsim Elshani nga Prizreni, qyteti Heinsberg në Gjermani ka shpallur të martën ditë zie. Me këtë rast u ndezën edhe qirinj dhe u vendosën buqeta me lule në përkujtim të Arsim Elshanit. I gjithë qyteti gjerman e përjetoi rëndë këtë humbje tragjike të një qytetari shembull nga Kosova, i cili kontribuoi shumë për vendlindjen, por edhe për qytetin gjerman ku punoi dhe veproi.
Trupi i pajetë i të ndjerit pritet të kthehet në Kosovë ditën e nesërme – të premten, më 21 nëntor 2025 – ku do t’i jepet lamtumira e fundit në varrezat e qytetit të Prizrenit, në orën 14:00. /InLajmi/
