Kryetari i Kuvendit të Republikës së Kosovës, Dimal Basha, së bashku me nënkryetaren Albulena Haxhiu, priti sot në takim Drejtorin e Institutit të Krimeve të Kryera gjatë Luftës në Kosovë, Atdhe Hetemi, i cili prezantoi raportin vjetor të punës për periudhën 8 nëntor 2024 – 9 nëntor 2025.
Në takim u diskutua për punën e rëndësishme që po zhvillon ky institucion në ruajtjen dhe dokumentimin e kujtesës historike të popullit të Kosovës. Kryetari Basha falënderoi drejtorin Hetemi dhe stafin e Institutit për përkushtimin ndaj së vërtetës dhe dokumentimit të vuajtjeve të popullit gjatë gjenocidit të kryer nga regjimi serb.
“Dokumentimi i krimeve të luftës, dëbimeve, dhunimeve e masakrave është akt i kujtesës në shërbim të drejtësisë. Si shtet dhe si shoqëri kemi detyrim moral e institucional ta mbështesim këtë punë, për të mos lejuar që e kaluara të zbehet dhe për të kërkuar drejtësi për çdo krim të kryer në Kosovë,” – theksoi kryetari Basha.
Instituti, i themeluar në nëntor të vitit 2023, është shndërruar në një qendër të rëndësishme të hulumtimit, dokumentimit dhe përpunimit të materialeve mbi krimet e kryera ndaj popullit të Kosovës nga regjimi i Millosheviqit, duke synuar paraqitjen e plotë të fakteve dhe kontekstit historik të luftës.