Qindra e mijëra qytetarë shqiptarë u mblodhën të premtën në sheshin “Skënderbej” në Tiranë, protestë kjo në mbështetje të ish-udhëheqësve të Ushtrisë Çlirimtare të Kosovës.
Me thirrjet “Unë jam UÇK!”, “Lironi çlirimtarët!” dhe të rrethuar nga simbolet kombëtare, pjesëmarrës nga Tirana, Prishtina, Tetova dhe vende tjera, treguan qartë qëndrimin e tyre kundër akuzave që konsiderohen të padrejta ndaj disa prej figurave kryesore të UÇK-së.
Protesta, e cila u zhvillua nën moton “Liria ka emër”, bashkoi shqiptarë nga të gjitha trevat dhe diaspora, të cilët shprehën përkrahje për Hashim Thaçin, Kadri Veselin, Jakup Krasniqin dhe Rexhep Selimin.
Aktiviteti nisi me himnin kombëtar, si një shenjë e qartë e bashkimit dhe e mbështetjes për vlerat që përfaqëson lufta çlirimtare e popullit shqiptar.
Gjatë tubimit, figura të rëndësishme nga politika dhe shoqëria civile mbajtën fjalime, ku theksuan se lufta e UÇK-së ishte e drejtë dhe legjitime, dhe kërkuan që drejtësia ndërkombëtare të pranojë të vërtetën historike të popullit shqiptar dhe të hedhë poshtë akuzat e padrejta.
Protesta e mbajtur më 17 tetor në qendër të Tiranës tërhoqi vëmendjen e gjerë të mediave ndërkombëtare, të cilat pasqyruan mesazhet e protestuesve në kërkim të drejtësisë dhe kundërshtimin e tyre ndaj asaj që ata e konsiderojnë si “gjykime të padrejta” ndaj ish-krerëve të Ushtrisë Çlirimtare të Kosovës.
Ndryshe, procesi gjyqësor ndaj katër ish-eprorëve të UÇK-së filloi në vitin 2023, tre vite pas arrestimit të tyre dhe transferimit në Dhomat e Specializuara në Hagë.
Tashmë, mbi dy vite pas nisjes së procesit, gjyqi ndaj tyre po i afrohet fazës përmbyllëse, pasi muajin e kaluar ekipi mbrojtës i ish-presidentit të Kosovës, Hashim Thaçi, paraqiti dëshmitarët e parë.