Presidentja e Kosovës, Vjosa Osmani, ka njoftuar se ka biseduar përmes telefonit me Brendan Hanrahan, zyrtarin e lartë të Byrosë për Çështjet Europiane dhe Euroaziatike në Departamentin amerikan të Shtetit.

Presidentja Osmani tha se gjatë kësaj bisede telefonike u përqendrua në rëndësinë e ruajtjes së aleancës mes Kosovës dhe SHBA-së dhe sigurimit të koordinimit të ngushtë me të.

“Aleanca e fortë me SHBA-në ka qenë gjithmonë në dobi të popullit tonë, sigurisë kombëtare, stabilitetit rajonal dhe integrimit euroatlantik”- ka shkruar Osmani në rrjetin social ‘X’.

Ajo theksoi se si presidente e Kosovës do të angazhohet me administratën e presidentit Donald Trump siç tha ajo “për të ruajtur dhe mbrojtur aleancën tonë bazuar në besim dhe bashkëpunim të ndërsjellë”.

Shtetet e Bashkuara të Amerikës kanë pezulluar Dialogun Strategjik të planifikuar me Kosovën.

Ky zhvillim solli reagime dhe diskutime mbi ndikimin e mundshëm që një vendim i tillë mund të ketë në marrëdhëniet mes Kosovës dhe partnerit të saj kryesor ndërkombëtar.

Ambasada e SHBA-së përmes një deklarate të dërguar për media ka thënë se këtë vendim e ka marrë “për shkak të shqetësimeve në lidhje me veprimet e qeverisë në detyrë, të cilat kanë rritur tensionet dhe paqëndrueshmërinë, duke kufizuar aftësinë e Shteteve të Bashkuara për të punuar në mënyrë produktive me Kosovën mbi prioritetet e përbashkëta.”

Sipas këtij njoftimi, Dialogu Strategjik kishte për qëllim forcimin e lidhjeve ekonomike dhe diplomatike në dobi të popullit amerikan dhe atij të Kosovës.

Ky Dialog ishte paralajmëruar që do të ndodhte, mirëpo ende nuk është finalizuar.