Policia e Kosovës ka njoftuar se të hënën, më datë 18.08.2025, në kuadër të planit operativ “Urdhëresat 2025”, policët e grupit të task-forcës për këtë plan, pranë Stacionit Policor në Prizren, pas veprimeve operative–taktike, kanë arritur të lokalizojnë dhe arrestojnë personin e dyshuar T.F., mashkull nga Prizreni.

Policia njofton se i njëjti ka qenë në kërkim aktiv, pasi ndaj tij ishte lëshuar urdhër-arrest dhe ishte dënuar me aktvendim të plotfuqishëm nga Gjykata Themelore në Prizren, me 10 muaj e 20 ditë burgim efektiv. Ai ishte dënuar për vepra penale që lidhen me narkotikë.

Sipas njoftimit, pas arrestimit, i dyshuari është shoqëruar në Stacionin Policor në Prizren dhe më pas është dërguar në institucionin korrektues për vuajtjen e dënimit.

Policia e Kosovës tutje ka theksuar se mbetet e përkushtuar në realizimin e urdhëresave gjyqësore dhe garantimin e sigurisë publike.