Prokuroria Themelore në Prizren ka ngritur aktakuzë ndaj katër personave – dy zyrtarëve të Komunës së Suharekës për “keqpërdorim të pozitës zyrtare” dhe një drejtori kompanie dhe vetë kompanisë “S.C.O” Sh.P.K., për “mashtrim në prokurim publik”.
Sipas aktakuzës, zyrtari i lartë për Menaxhimin e Projekteve në Komunën e Suharekës, B.K. dhe mbikëqyrës i drejtpërdrejtë i menaxherit të kontratës në projektin e njëjtë, E.Sh., në bashkëkryerje, dyshohet se kanë vepruar në kundërshtim me Ligjin për Prokurimin Publik gjatë realizimit të kontratës për ndërtimin e disa rrugëve lokale në fshatin Reshtan, duke hartuar dhe nënshkruar raporte fiktive për punime që në fakt nuk ishin kryer.
Në këtë mënyrë, nga Komuna e Suharekës janë paguar 24,945.32 euro për punime që nuk përputheshin me kontratën, ndërsa sipas ekspertizës teknike, vlera reale e punimeve të realizuara ishte për 13,272.66 euro më pak.
Një pjesë e punimeve të parapara në kontratën fillestare më vonë janë realizuar përmes një kontrate tjetër të datës 22 nëntor 2022, duke e dëmtuar buxhetin komunal.
Pjesë e skemës së dyshuar ishte edhe D.S., bashkëpronar dhe drejtor i kompanisë “S.C.O” Sh.P.K., i cili akuzohet për hartimin dhe dorëzimin e faturave fiktive me vlerë totale prej 24,945.32 euro, në bashkëpunim me zyrtarët komunalë.
Në këtë rast, kompania dhe drejtori i saj akuzohen për përfitim të dobisë pasurore të kundërligjshme dhe për mashtrim në prokurim publik.
Sipas aktakuzës, buxheti i Komunës u dëmtua me 13,272.66 euro.