Ish-zyrtarit policor të Njësisë Speciale Operative, Arbnor Spahiut i cili u ndalua dje në Serbi, i është caktuar masa e paraburgimit njëmujor.
Lajmin e ka bërë të ditur avokati Arianit Koci i cili përmes një postimi në Facebook tha se ky është një vendim i padrejtë dhe siç u shpreh, “i motivuar politikisht dhe pa asnjë provë apo bazë faktike”.
Koci gjithashtu njoftoi se nesër do të niset drejt Suboticës, përcjell Klankosova.tv.
“Kërkoj angazhim të drejtpërdrejtë të shtetit të Kosovës – jo vetëm nga Ministria e Jashtme dhe Zyra Ndërlidhëse në Beograd – por edhe reagim të qartë dhe publik nga Kryeministri dhe Presidentja e vendit”.
“Sepse asnjë qytetar i këtij vendi nuk guxon të lihet vetëm, kur përsekutohet padrejtësisht. Punën që nuk po e bën shtetit i Kosovës – po më duhet ta bëj une. P.S. Nesër nisem drejt Suboticës”.