Presidentja Vjosa Osmani dhe kryeministri i Malajzisë, Anwar Ibrahim kanë mbajtur sot pas takimit një konferencë të përbashkët për media në Kuala Lumpur.
Kryeministri Ibrahim tha se do të ketë konsultim dypalësh në nivel zyrtar sa më shpejt të jetë e mundur, për të siguruar që të ndikojnë sa më shpejt në marrëdhëniet tregtare dhe ekonomike ndërmjet Malajzisë dhe Kosovës.
“Ambasada e Kosovës në Kuala Lumpur është me të vërtetë një moment historik i rëndësishëm në marrëdhëniet tona dypalëshe dhe kjo sigurisht që do të lehtësojë tregtinë, investimet, arsimin, kulturën, turizmin mes dy vendeve tona që përfshin, natyrisht, produktet hallall, sepse certifikimi i halalit në Malajzi njihet ndërkombëtarisht dhe gjithashtu të lehtësojmë eksportin e produkteve tona, eksportin e produkteve nga Kosova. Por më kritike, bashkëpunimi ndërmjet tregtisë, investimeve, në mënyrë që të shfrytëzojmë fuqinë e Kosovës dhe marrëdhëniet e tyre të forta me BE-në”, tha ai.
Ndërsa, e para e vendit Vjosa Osmani ka falënderuar kryeministrin Anwar Ibrahim, për mbështetjen e vazhdueshme të Malajzisë për Kosovën.
Ajo tha se në takim riafirmuan angazhimin për lidhje më të forta diplomatike, dhe partneritete më të ngushta ekonomike në fushat me interes të përbashkët.
Osmani ka mirëpritur edhe vendimin e Malajzisë për heqjen e vizave për qytetarët e Kosovës, si një akt besimi dhe miqësie midis dy vendeve tona.
“Në këtë frymë, jam e lumtur të rikonfirmoj, siç e përmendët ju, se Kosova po hap sot ambasadën e saj në Malajzi. Këto zhvillime po dërgojnë një mesazh të fuqishëm që njerëzit tanë duhet të takohen më shpesh, të punojnë edhe më afër së bashku, dhe të mësojnë më shumë nga njëri-tjetri. Në frontin ekonomik, ne ramë dakord për rëndësinë e zgjerimit të tregtisë, inkurajimin e më shumë investimeve në sektorët kyç, dhe ka kaq shumë në të cilat ka potencial, nga bujqësia tek energjia, nga teknologjia në industrinë hallall, pra, siç e përmendët kryeministrin tonë bizneset më afër së bashku, duke krijuar më shumë vende pune dhe duke ndezur mundësi të reja. Në sektorin e sigurisë, Kosova është e gatshme për partneritet me Malajzinë në trajtimin e sfidave të përbashkëta, nga siguria kibernetike te kundërterrorizmi te reagimi ndaj fatkeqësive”, ka thënë Osmani.
Ajo ka falënderuar kryeministrin Anwar Ibrahim për mbështetjen e vazhdueshme të Malajzisë për anëtarësimin e Kosovës në organizatat ndërkombëtare duke thënë se Kosova është e gatshme të kontribuojë edhe në platformat e mëtejshme rajonale si ASEAN.
Në këtë frymë, presidentja Osmani ka nderuar kryeministrin Ibrahim me Urdhrin e Pavarësisë, për kontributin e vazhdueshëm të Malajzisë për lirinë, pavarësinë dhe ndërtimin e shtetit të Kosovës. /KP/