Komuna e Prizrenit, përmes Drejtorisë së Turizmit dhe Zhvillimit Ekonomik, ka përfaqësuar për herë të parë qytetin në Panairin Ndërkombëtar të Turizmit dhe Kulturës “Colors of the World”, që u mbajt në Stamboll nga 18 deri më 20 prill 2025.
Ky panair mblodhi mbi 30 shtete nga e gjithë bota, përfshirë Bullgarinë, Kinën, Seychellen, Indonezinë, Zimbabven, Zanzibarin, Madagaskarin, Kamboxhën, Indinë, Iranin, Argjentinën, Azerbajxhanin, Uzbekistanin, Kazakistanin, Kirgistanin, Malajzinë, Gananë, Palestinën dhe shumë të tjera.
Përmes këtij prezantimi ndërkombëtar, Prizreni shpalosi pasuritë e veta natyrore, historike dhe kulturore, si dhe ofertat turistike që e bëjnë qytetin një destinacion të veçantë në rajon. Po ashtu, u mbajtën takime biznesi (B2B) me përfaqësues të shteteve të ndryshme, nga të cilat priten marrëveshje të reja bashkëpunimi për zhvillimin e mëtejmë të turizmit në Prizren.
Ky është një hap i rëndësishëm drejt promovimit të Prizrenit në tregun global të turizmit dhe forcimit të lidhjeve ndërkombëtare në këtë sektor.
