Kryeministri i Kosovës, Albin Kurti, ka uruar qytetarët e komunitetit turk në Kosovë, me rastin e Ditës Kombëtare të Turqve, ndërkohë që në Turqi, data e 23 prillit festohet si Dita e Sovranitetit Kombëtar dhe Festa e Fëmijëve.
Ai ka nderuar kontributin e qytetarëve të komunitetit turk në të gjitha fushat e jetës në Kosovë, duke i cilësuar si urë të rëndësishme të bashkëpunimit ndërmjet Kosovës dhe Turqisë.
“Kjo ditë është një moment i veçantë për të nderuar kontributin e bashkëqytetarëve tanë të komunitetit turk në të gjitha fushat e jetës në Kosovë – në arsim, shëndetësi, institucione, art, biznes dhe shoqëri civile. Komuniteti turk është pjesë e pandashme e shtetit tonë shumetnik dhe një urë e rëndësishme e bashkëpunimit ndërmjet Kosovës dhe Turqisë. Bashkëjetesa e përzemërt dhe harmonia që ekziston mes shqiptarëve, turqve dhe grupeve të tjera etnike është një aset i çmuar që na bën më të fortë dhe më të pasur si shoqëri. Bashkëqytetarëve tanë nga radhët e komunitetit turk u uroj gëzim dhe lumturi për këtë festë të dyfishtë! Le të vijojmë me punë dhe angazhim për zhvillim, mirëqenie e miqësi gjithnjë e më të madhe”, ka shkruar Kurti në rrjetin social “Facebook”.