Ambasada britanike dhe ajo franceze në Kosovë e kanë përshëndetur ndarjen e titullit “Nderi i Republikës” nga presidentja e vendit, Vjosa Osmani, për të mbijetuarit e dhunës seksuale të luftës së fundit në Kosovë, Vasfije Krasniqin, Shyhrete Tahirin dhe Ramadan Nishorin.
Ambasada britanike i ka cilësuar si heronj të vërtetë kosovarë tre të mbijetuarit e dhunës seksuale në luftën e Kosovës.
“Ishte privilegj i vërtetë t’i bashkohemi presidentes Osmani pasditen e sotme teksa ajo i ndau titullin “Nderi i Republikës” Vasfije Krasniqit, Shyhrete Tahirit dhe Ramadan Nishorit – tre heronjve të vërtetë kosovarë”, thuhet në njoftimin e Ambasadës britanike në Kosovë.
Ndërkaq, edhe Ambasada e Francës ka shprehur respekt, dinjitet dhe solidaritet ndaj dëshmive të guximshme mbi dhunën që kanë përjetuar.
“Ambasada e Francës shpreh respektin e saj për znj. Vasfije Krasniqi & znj. Shyhrete Tahiri, si dhe z. Ramadan Nishori për dëshmitë e tyre të guximshme mbi dhunën seksuale të përjetuar gjatë luftës. Ju përshëndesim me respekt, dinjitet dhe solidaritet”, kanë thënë nga Ambasada franceze në Kosovë.