Banorët e Zhurit kërkojnë nga Komuna e Prizrenit që të investoj për revitalizimin e Gomn-it, një vend me rëndësi historike dhe kulturore, që ndodhet vetëm 1 km larg fshatit Zhur, përballë Pashtrikut. Ky vend, i cili ka pamje spektakolare të natyrës, përfshirë edhe Drinin e Bardhë, është një pjesë e pandashme e identitetit dhe trashëgimisë së zonës, dhe ka potencial të madh për zhvillimin e turizmit.
Jemin Memaj, nga Zhuri,një pasionant i natyrës, ka shkruar një kërkesë drejtuar institucioneve lokale dhe qeveritare, në të cilën kërkon mbështetje për zhvillimin e turizmit në këtë lokalitet. Ai e sheh Gomn-in si një mundësi të shkëlqyer për të promovuar turizmin kulturor dhe natyror, si dhe për të forcuar lidhjen e komunitetit me trashëgiminë e tij. Revitalizimi i këtij vendi mund të sjellë përfitime të shumta për rajonin, duke kontribuar në zhvillimin ekonomik dhe rritjen e turizmit.
Gomni ka qenë dikur një qendër jetësore për banorët e kësaj zone, por ka mbetur një vend i harruar.Banorët e Zhurit dhe fshatrave përreth kërkojnë që Komuna e Prizrenit të ndërmarrë hapa konkretë për të mundësuar akses më të lehtë në këtë vend të mrekullueshëm, duke investuar në infrastrukturën e nevojshme, siç është ndërtimi i një rruge që mundëson qasjen me automjete.
Ky investim mund të ndihmojë në shndërrimin e Gomn-it në një destinacion turistik të rëndësishëm, duke sjellë përfitime për komunitetin dhe rajonin në tërësi.
www.tvprizreni.net (Valon Sope)