Në një ditë që zakonisht festohet si Dita e Ulqinit, sot qyteti po përjeton një atmosferë krejtësisht të ndryshme, pasi nga ora 12:00 ka nisur një protestë masive qytetare në vendin e njohur si Ranë, pranë Plazhit të Vogël në Ulqin.
Protesta është një reagim ndaj tentativës për dhënien me qira dhe privatizimin e hapësirave publike bregdetare, një çështje që ka shkaktuar shqetësim të madh mes qytetarëve të këtij qyteti bregdetar.
Një numër i madh i banorëve të Ulqinit janë mbledhur për të protestuar kundër asaj që ata e konsiderojnë si “shitjen e Ulqinit”, duke ngritur zërin për të mbrojtur interesat e qytetit të tyre.
Motoja e protestës është “Ulqini nuk është në shitje”, një mesazh i fortë dhe i qartë për ata që po tentojnë të ndërmarrin hapa që mund të dëmtojnë qytetin dhe mjedisin e tij.
Komuna e Ulqinit ka përcjellë mesazhe të qarta për qeverinë, duke shprehur mbështetje për investimet dhe zhvillimin e qytetit, por duke theksuar se këto zhvillime duhet të bëhen në përputhje me interesat e qytetit dhe pa dëm në pasurinë e tij publike.
Ata kanë kërkuar gjithashtu transparencë dhe pjesëmarrje aktive në vendimet që do të ndikojnë në të ardhmen e Ulqinit, duke insistuar që qytetarët të kenë një rol kyç në proceset e rëndësishme që prekin jetën e tyre dhe të ardhmen e qytetit.
/GazetaSinjali/