Policia e Kosovës ka njoftuar se të premten në Leposaviq ka arrestuar një person të dyshuar tek i cili janë gjetur disa armë, municion e gjëra tjera të ndaluara.
Sipas komunikatës, i dyshuari R.M. fillimisht është hasur me një pushkë gjuetie me municion, ndërsa gjatë kontrollit të shtëpisë së tij janë gjetur edhe një armë gjysmë-automatike, një pushkë 8.75mm, një pushkë ajrore, fishekë kalibrash të ndryshëm, disa thika si dhe një xhaketë me pajisje ushtarake.
“Policia e Kosovës, gjatë realizimit të detyrave dhe autorizimeve policore për të ofruar rend e siguri, në pjesën veriore të vendit, konkretisht në pjesën malore të një fshati të Leposaviqit, kanë hasur një person të dyshuar me një pushkë gjuetie me municion. Nën dyshimin e bazuar se personi i dyshuar R.M., (viti i lindjes 1976, mashkull kosovar) posedon edhe armë tjera, është kontrolluar shtëpia e tij. Gjatë kontrollit janë gjetur edhe: një armë gjysmë-automatike, një pushkë 8.75mm, një pushkë ajrore, fishekë kalibrash të ndryshëm, disa thika e një xhaketë me pajisje tjera ushtarake”, thuhet në komunikatë.
Lidhur me rastin është njoftuar prokurori me akt-vendim të të cilit i dyshuari është dërguar në mbajtje për 48 orë./teve1.info/