Kryeministri Albin Kurti ka pritur në takim lamtumirës komandantin e KFOR-it në largim, Ozkan Ulutash, të martën, më 08.10.2024.
Sipas Zyrës së Kryeministrit, ky ishte takimi i pestë zyrtar i tyre gjatë këtij viti.
“Duke e falënderuar komandantin e KFOR-it Ulutash për kontributin e shërbimin e tij në fushën e sigurisë, kryeministri Kurti shprehu vlerësimin e lartë për bashkëpunimin e ngushtë, komunikimin, koordinimin dhe bisedat përherë të sinqerta e në frymën e sinergjisë për ruajtjen e paqes e sigurisë” – thuhet në njoftim.
Kryeministri Kurti në këtë takim u shoqërua nga ministri i Administrimit të Pushtetit Lokal, Elbert Krasniqi.
Pas largimit të gjeneralmajorit turk, në krye të KFOR-it do të vijë gjeneralmajori italian, Enrico Barduani, i cili do ta kryesojë forcën shumëkombëshe të udhëhequr nga NATO që nga data 11.10.2024.
