Deputetja e Kuvendit të Kosovës, Duda Balje, ka deklaruar se mbrëmë, më 28 shtator, në koncertin që u mbajt me rastin e Ditës së Boshnjakëve në fshatin Gërnçarë, është sulmuar fizikisht një 20-vjeçar nga një person i kompanisë që ishte përgjegjëse për sigurinë.
Më tej, Balje tha se arsyeja se pse u rrah i riu është “vetëm pse donte t’u bashkohej të tjerëve që po luanin në podium”.
“Ai është sulmuar fizikisht nga një person i kompanisë që ishte përgjegjëse për sigurinë. Në ditën që festuam, u shkelën të drejtat elementare që duhet të kishte çdo njeri. U bëj thirrje organeve kompetente që të merren seriozisht me këtë rast dhe të ndëshkojnë autorët në mënyrë që i riu që përfundoi në spital për shkak të plagëve të marra dhe familjarët e tij të ndihen më të sigurt dhe raste të tilla të mos përsëriten më. Askush nuk duhet t’i japë vetes të drejtën për diçka të tillë, si e justifikoni dhunën fizike të disa personave ndaj një të riu?”, ka shkruar ndër të tjerash deputetja Balje në Facebook.
Ndërkaq, zëdhënësi i Policisë së Kosovës në Drejtorinë Rajonale në Prizren, Shaqir Bytyqi, ka bërë të ditur për Sinjalin se mbrëmë 20-vjeçari dhe roja e sigurimit janë dërguar në Stacionin Policor në Prizren për intervistim, pasi ishin rrahur mes veti.
Ai ka njoftuar se rasti ka ndodhur rreth orës 22:30 në Qendrën Sportive në Prizren, dhe se një i ri e kishte sulmuar fizikisht një roje të sigurimit dhe më pas, ky i fundit iu kishte kundërpërgjigjur.
Të njëjtit është bërë e ditur se janë liruar pas intervistimit në procedurë të rregullt, dhe se të dy kanë lëndime të lehta trupore./TVPrizreni/
