Kryeministri i Kosovës, Albin Kurti, ka thënë se rritja ekonomike vazhdoi edhe në tremujorin e dytë të vitit, e cila sipas tij po bëhet përtej projeksioneve fillestare.
“Rritja ekonomike e qëndrueshme po vazhdon edhe në tre mujorin e dytë të vitit, madje përtej projeksioneve fillestare. Masat tona të punësimit, mbështetja për bizneset dhe prodhuesit vendorë, qeverisja e mirë dhe stabiliteti institucional janë shtyllat tona të zhvillimit”, ka shkruar kryeministri në Facebook.
Për rritjen ekonomike të premten ka folur edhe ministri i Financave, Hekuran Murati, i cili ka theksuar se ekonomia vazhdon rritjen me 4.27% edhe në tremujorin e dytë të 2024.
“Pas rritjes së theksuar në tremujorin e parë me 5.62%, ekonomia e vendit ka vazhduar rritjen edhe në tremujorin e dytë të këtij viti me 4.27% në terma realë sipas ASK-së, duke performuar dukshëm mbi projeksionet për rritje prej 3.8%-3.9%”, është shprehur ministri Murati.
Murati ka shtuar se me uljen e inflacionit, ekonomia e vendit po kthehet në trajektoren e rritjes më shpejtë.