Dy pushkë gjuetie, 35 fishekë të pushkës së gjuetisë, gjashtë pistoleta njëra nga to artizanale, 13 fishekë të kalibrit 7.65 milimetra dhe tre fishekë të kalibrit 9 milimetra janë gjetur nga ana e policisë dhe janë sekuestruar në fshatin Turjak të Komunës së Malishevës.

Bastisje në disa shtëpi janë zhvilluar gjatë datës 05.04.2024 në fshatin Turjak. Me urdhëresë të lëshuar nga ana e gjykatës policia ka zhvilluar bastisjet, prona këto të katër personave të dyshuar.

Sipas njoftimit të policisë, në  shtëpi dhe objekte përcjellëse të dy nga të dyshuarit nuk është gjetur diçka e dyshimtë ndërsa te dy të tjerë po.

Në këto shtëpi u gjetën pushkë gjuetie, pistoleta e municion.

Të dyshuarit sipas policisë, dyshohen për përdorim të armës apo mjetit të rrezikshëm.

Nga katër të dyshuarit tre janë arrestuar, dhe për rastin është njoftuar edhe prokurori i shtetit.

Dy nga të dyshuarit janë dërguar në mbajtje ndërsa tjetri është liruar.