Disa fermerë ankohen se vonesa e subvencioneve po ua vështirëson punën në bujqësi. Ata shprehen se përkrahja nga shteti është e mangët.
Ndërsa, ministri i Bujqësisë, Faton Peci ka thënë se ekzekutimi i mjeteve financiare për bujqit është në proces, ngaqë sipas tij, janë duke u realizuar edhe kontrollet te fermerët.
Ministri Peci thotë se deri tani në xhirollogaritë bankare të fermerëve kanë dalë 30 milionë euro. Por, i tërë buxheti për bujqit këtë viti sipas Qeverisë, është rreth 100 milionë euro.
“Kanë dalë deri tash 30 milionë euro, ato janë në proces, janë duke u realizuar kontrollet dhe kompensimet. 8.9 milionë euro është shuma financiare që ka përfituar Rahoveci vetëm në 2022-tën, që do të rriten në vitin 2023”, ka thënë Peci.
Fermeri, Mirsad Mazreku ka theksuar se ende nuk i ka marrë subvencionet. Kultivuesi i rrushit ka thënë se shuma e subvencioneve duhet të rritet, sepse kultura e rrushit kërkon shumë investime.
“Subvencionet ende nuk i kam marrë prej Ministrisë Bujqësisë. Do të ishte më mirë të kryhet pagesa më herët, sepse na duhet edhe ndihmë për investime në vreshta. Rrushi edhe vreshtar si kulturë është e vetmja që ka punë më së shumti prej të gjithave kulturave, sepse unë merrem edhe me patate e kultura tjera, por e vetmja kulturë që ka më së shumti punë është rrushi. Në lidhje me subvencione, e vetmja kulturë po ashtu është që nuk është bërë ngritja e subvencioneve. Të ishte kryer pagesa e subvencioneve më herët do të kishte qenë ndihmë edhe me e madhe për bujqit. Mospagesa e subvencioneve me kohë në muajin e tretë, që ne të investojmë ku duhet, sepse tash është sezoni që shesim dhe do të na ishin gjendur pak”, ka thënë Mazreku.
Edhe fermeri Shpend Haxhi Mustafa, ka thënë se vonesa e subvencioneve po i shkakton shumë vështirësi edhe në kultivimin e produkteve bujqësore.
“Ende nuk i kemi marrë subvencionet, edhe pse deri tash do të duhej t’i merrnim. Kjo po na pengon edhe në punë, jemi në pritje të lëshohen, sepse kultivojmë gjashtë hektarë e gjysmë rrush”, ka thënë Haxhi Mustafa.
Po ashtu, Anid Hoxha shpreh shqetësimin e tij për vonesën subvencioneve. Ai kërkon që subvencionet të dalin sa më shpejt.
“Ende nuk i kemi marrë subvencionet këtë vit dhe po presim prej institucioneve që të dalin sa më shpejt, pasi kemi 7 hektarë e gjysmë rrush”, është shprehur Hoxha.
Po ashtu edhe pagesat për plehërimin dhe naftën nuk janë proceduar ende për bujqit. Për këtë, fermerët janë të obliguar të sjellin faturat si dëshmi. /KSP