Policia e Kosovës ka arrestuar një person pasi tentoi të transportonte ilegalisht mish. Ai tentoi edhe t’u ikte policëve.
Gjatë patrullimit në brezin kufitar në mes të Republikës së Kosovës dhe Serbisë, Policia ka vërejtur një kombi me targa serbe, që dyshohej se kishte shfrytëzuar rrugën e cila nuk është e autorizuar për kalim kufiri.
Sipas njoftimit të PK-së, patrulla policore ka tentuar ta ndal duke ndezur rotacionin dhe dritën vezulluese për ta ndalur, por i njëjti nuk është ndalur dhe ka tentuar t’i ik Policisë.
“Pas veprimeve aktive operacionale, Policia ka arritur që në hyrje të Leposaviqit ta ndaloj automjetin e dyshuar dhe gjatë kontrollit është identifikuar edhe ngasësi i automjetit i dyshuari mashkull/s me iniciale R.K. (1973)”, njoftoi PK.
Gjatë realizimit të kontrollimit është konstatuar se në kombi transportoheshin mbi 3700 kilogram mish të ndryshëm, në vlerë mbi 20 mijë euro dhe nuk kishte asnjë dokument mbi prejardhjen e mallit.
