Zëdhënësi i Bashkimit Evropian Petar Stano ka komentuar takimin e mbrëmshëm ndërmjet kryeministrit të Kosovës Albin Kurti dhe presidentit të Serbisë Aleksandër Vuciq, raporton Gazeta Blic.
Ai në një konferencë për media ka zbuluar se të dyja palët kanë arritur marrëveshje, madje sipas tij ka ujdi edhe se si marrëveshja do të implementohet
I pyetur se për çfarë konkretisht janë pajtuar palët meqë kishte paqartësi, Stano tha se “Josep Borrell e ka sqaruar mjaftueshëm në konferencë pas takimit dhe ishte mjaft i qartë me deklaratën e tij, e cila u lëshua më pas dhe e cila ishte miratuar dhe rënë dakord nga të dyja palët”.
Zëdhënësi i BE-së deklaroi se “ajo që janë pajtuar palët është se s’do ketë më nevojë për diskutime të reja për Propozimin Evropian, i cili tani është Marrëveshja për rrugën drejt normalizimit të Kosovës dhe Serbisë”.
“Gjithashtu është arritur pajtim që palët të dyja kanë shprehur gatishmërinë e tyre që të procedojnë me implementimin e kësaj marrëveshje.
Ky është pajtimi dhe për këtë po punojmë”, pohoi Stano.
“Tani do kemi takim në mars, kurse Lajçak do të udhëtojë për në Kosovë dhe Serbi. Puna nuk është kryer akoma, normalisht, por qëllimi i takimit të djeshëm ishte pajtimi rreth propozimit. Tani, ne bashkë me ta do punojmë në zbatim. Presim që të gjitha marrëveshjet të zbatohen dhe ata u pajtuan që të mos bëjnë hapa të pakoordinuar që do të vononin dinamikat e pajtuara dje”.
