Kryeministri Albin Kurti i ka dhënë leje patriarkut të Kishës Ortodokse serbe, Porfirije, që ta vizitojë Kosovën. Porfirije pritet të vijë sot [e enjte].
Sipas njoftimit të Kryeministrisë, leja për vizitën e Porfirijes në Kosovë ishte kërkuar nga ministri për Kthim dhe Komunitete, Nenad Rashiq, kërkesë të cilën e ka pranuar Kurti.
Porfirije do të vijë në Kosovë në kuadër të përgatitjeve për festën e Krishtlindjes Ortodokse.
Patriarku serb, siç thotë njoftimi, ka thënë se dëshiron të hyjë në Kosovë pa truprojet e tij. Theksohet se nuk ka bërë kërkesë për vizitë sipas dispozitave të marrëveshjeve ekzistuese mes Kosovës e Serbisë.
“Paralajmёrimi i patriarkut Porfirije se planifikon tё hyjё pa truproje nё Kosovё është edhe një dëshmi e radhës se Kosova është vend më i sigurt se Serbia”, thuhet në njoftimin e Qeverisë.
Patriarkut Porfirije iu kishte ndaluar hyrja në Kosovë më 26 dhjetor. Ministria e Punëve të Jashtme të Kosovës i vuri kushte patriarkut për të hyrë në vend. I kërkoi që të dënojë apo distancohet nga “veprimet e pjesëtarëve të Kishës që po u ofrojnë përkrahje grupeve kriminale në veri të Kosovës” të cilët janë “përgjegjës për barrikadat” e ngritura në veri të Kosovës.