Një fenomen mjaft shqetësues dhe që përbën sfidë për institucionet në Kosovë është prostitucioni. Kohëve të fundit ka pasur shumë aksione që kanë rezultuar me arrestimin e personave që dyshohet se merren me këtë vepër. Ajo që e bën më shqetësuese këtë dukuri është fakti që shumë prej tyre janë të rinj në moshë, raporton Gazeta Sinjali.
Për një rast të tillë ka nisur së fundmi hetimet Policia rajonale në Prizren, pas shoqërimit në stacion policor të dy personave, nën dyshimet se janë marrë me prostitucion, të cilët po kërkoheshin që nga muaji korrik i këtij viti.
Sinjali mëson se bëhet fjalë për B.D., dhe B.M., të cilët dyshohen për këtë rast dhe pas identifikimit të tyre, të njëjtit janë arrestuar dhe shoqëruar në stacionin policor në Prizren.
Njësia për Hetimin e Trafikimit me Qenie Njerëzore, ka intervistuar dy të dyshuarit, ku pas dhënies së deklaratave u zbulua se të njëjtit kanë kryer marrëdhënie seksuale në këmbim të të hollave, mallrave e shërbimeve të ndryshme.
Pas përfundimit të procedurave në Polici, rasti është proceduar në Departamentin për Kundërvajtje në Gjykatën Themelore në Prizren.
