Aktivistja e shoqërisë civile në Prizren, Elmedina Dorambari, përmes një postimi në facebook e ka mirëpritur zgjedhjen e një gruaje në krye të Kuvendit të Prizrenit, pas zgjedhjes së Antigona Bytyçit, kryesuese të organit më të lartë legjislativ komunal.
Postimi i plotë:
Urime Prizren !
Më në fund edhe Kuvendi i Komunës së Prizrenit udhëhiqet nga një grua. Ndodhi ajo që është deshtë të ndodhte para 4 viteve, por që ishte humbur si mundësi.
Përtej këtij lajmi të mirë, vjen një lajm tjetër po aq i keq kur është në pyetje avancimi i pozitës së gruas në vendimmarrje në nivel lokal. LDK paska synim me përjashtu një grua asambleiste vetem pse paska votu që sot të bëhet historia, që një grua të udhëheq me kuvendin e komunës. Të përjashtosh / anatemosh një kuvendare që ka votuar kolegen e saj për kryesuese, nuk është as politikë as barrikadim në pozicione të qarta opozitare.
Vetëm edhe një përmbushje e zotimit, që ekzekutivi të jetë në proporcion 50 me 50, do ta kishim përmbyllur këtë vit të zymtë, me këto storie të suksesit që gratë në Prizren po marrin pozitat e merituara.