Një gjykatë federale në Uashington e ka dënuar me 10 vjet burgim kosovarin me shtetësi amerikane, Lirim Sylejmani, pasi është trajnuar ushtarakisht me organizatën terroriste (ISIS) dhe për përfshirje në grup të armatosur kundër forcave të koalicionit të udhëhequr nga SHBA-ja.
Gjykata ka njoftuar se Sylejmani, i njohur si Abu Sulayman al-Kosovi, ishte deklaruar fajtor në dhjetorin e 2024-s për pjesëmarrje në trajnime ushtarake.
Gjykatësi Rudolph Contreras ka thënë se pos dënimit me burgim, Sylejmani pas përfundimit të dënimit do të përcillet nga autoritetet amerikane.
Siç ka njoftuar gjykata amerikane, nga nëntori i 2015-s deri në shkurtin e 2019-s, Sylejmani ishte trajnuar nga ISIS-i në Siri, derisa në 2019 ishte kapur nga Forcat Demokratike Siriane. Ai kishte udhëtuar për në Siri me familjen e tij, ku e kishte ndërruar emrin.
Sylejmani kishte kryer trajnime mbi përdorimin e pushkëve automatike dhe përdorimin e granatave. Në majin e 2016-s, sipas gjykatës, ishte dërguar në vijën e parë të frontit.