Çmimet e naftës, të benzinës e të gazit janë ngritur në Shqipëri, por edhe në Kosovë. Kjo është pasuar me reagime të shumta nga qytetarët, ndërsa reagim pati edhe nga kryeministri i Shqipërisë, Edi Rama.
Rama i ka kthyer përgjigje në rrjetin social “Facebook” një komentuesi, i cili i ka kërkuar Ramës që çmimi i naftës të ulet.
“Rritja e çmimeve është një problem i përgjithshëm sot, mjafton të shihni Kosovën për të mos shkuar më larg, ndërkohë që, siç kam premtuar, ne po mbajmë më shumë kosto për buxhetin, mburojën mbi çmimin e energjisë për konsumatorët familjarë e biznesin e vogël, që kudo ka kërcyer e po kërcen lart”, i ktheu përgjigje Rama një komentuesi.
Qytetari, ndër të tjera, ka shtuar se këto çmime nuk përkojnë me nivelin e rrogës, e për këtë kryeministri shtoi se: “Sa për rrogat, ato janë rritur e do vazhdojnë të rriten, por rritja e rrogave nuk bëhet sipas dëshirës sonë, pasi unë i pari do doja t’i rrisja menjëherë të gjitha, por çdo rritje jashtë mundësive, do të thotë falimentim total në pak muaj, si në kohën e Sudes, prandaj duhet punë e durim”.
Çmimet e derivateve në Kosovë kanë arritur vlerat më të larta në 20 vjetët e fundit, ka thënë kryetari i Shoqatës së Naftëtarëve, Fadil Berjani.
Në një emision në KTV, ai ka thënë se një litër naftë në Kosovë aktualisht ka çmimin prej 1.23 euro deri 1.30 eurove, ndërsa benzina nga 1.25 deri në 1.32 euro.
Berjani ka thënë se çmimet caktohen nga bursa ndërkombëtare dhe organizata prodhuese OPEC.