Presidentja e Kosovës, Vjosa Osmani, ka reaguar pas lajmeve për arrestimin e kameramanit, Jetmir Muji, i cili sipas njoftimit të AGK-së ishte duke xhiruar për një raport rreth shkollimit të vajzave të presidentes.
Osmani e ka quajtur këtë si “përndjekje të vazhdueshme, të kundërligjshme e të rrezikshme” që po u bëhet vajzave të saj të mitura nga media të caktuara.
Sipas saj, fëmijët e mitur nuk janë subjekt i interesit publik pasi “incizimet e paautorizuara të tyre në rrethana private shkaktojnë rrezik për sulme, kanosje e kidnapime eventuale, duke i bërë publike rutinat dhe lokacionet e tyre – përkundër vlerësimit të policisë se një gjë e tillë është në kundërshtim me rregullat e sigurisë”.
Osmani tha se do të ndërmarr çdo masë ligjore për të mbrojtur fëmijët e saj “nga këta të ashtuquajtur gazetarë”.
“Prandaj, do të ndërmarr çdo masë ligjore për të mbrojtur fëmijët e mi nga këta të ashtuquajtur gazetarë, të cilët nuk e kanë qëllimin të informojnë publikun, por të rrezikojnë jetën e fëmijëve që nuk u kanë asnjë faj. Këto incizime të paautorizuara, shpesh deri në nivel të përndjekjes, për fëmijët krijojnë jo vetëm rrezik fizik, por edhe psikologjik, me pasoja afatgjata”- ka shkruar Osmani.
Presidentja në reagim ka theksuar se dy vajzat e saj kanë vijuar mësimet në shkollën publike “Ismail Qemali” në Prishtinë ndërsa ka treguar se pse ato kanë ndërruar shkollën.
“Ndryshimi i lokacionit të shkollës është bërë për shkak të problemeve të shkaktuara nga niveli i rrezikshmërisë së lartë dhe për shkak të ndryshimit të lokacionit ku jetojmë, ndërkohë që shkolla “Ismail Qemali” tashmë është shumë larg nga vendbanimi ynë”- ka thënë Osmani.
Asociacioni i Gazetarëve të Kosovës (AGK), ka njoftuar se kameramani i portalit ‘Paparaci’, Jetmir Muji, aktualisht ndodhet në stacionin policor Qendër në Prishtinë.
Në reagimin e saj, AGK-ja është shprehur e alarmuar dhe shqetësuar me këtë arrestim duke i bërë thirrje Policisë së Kosovës që ta lirojë menjëherë Mujin.
“Ai ishte duke xhiruar për një raport rreth shkollimit të vajzave të Presidentes Osmani, kur është ndaluar nga mbrojtja e afërt e saj, i është konfiskuar kamera dhe i është kërkuar që të fshijë materialet”- thuhet në njoftimin e AGK.