Njësia rajonale për trafik rrugor në Prizren ka njoftuar se të mërkurën ka konfiskuar 11 patentë shoferë.
Sipas njoftimit 7 patentë shoferë janë konfiskuar brenda një periudhe kohore prej 40 minutash në rrugën “Wesli Klark”, ku thuhet se 7 persona nuk janë ndalur në semafor në kohën kur drita e kuqe ka qenë e ndezur.
“Shtatë patentë shoferë janë konfiskuar për mosrespektim të dritës së kuqe në semafor, gjatë një aktiviteti operativ të realizuar nga ora 08:20 deri në 09:00, në rrugën “Wesli Klark” në Prizren”, thuhet në njoftim.
Tre patentë shoferë thuhet se janë konfiskuar për shkak të tejkalimit në vijë të plotë, në segmentin rrugor Suharekë – Carralevë.
Shkeljet thuhet se janë dokumentuar përmes video-incizimit nga kamera e veturës me radar mobil.
Ndërkohë një patentë shoferi është konfiskuar për shkak se një fëmijë ishte i ulur në ulësen e përparme, gjë që thuhet se përbën rrezik serioz për sigurinë e fëmijës dhe shkelje të dispozitave ligjore për transportin e fëmijëve në automjete.