Të pafajshëm janë deklaruar ish-krerët e OVL-UÇK-së, Hysni Gucati dhe Nasim Haradinaj në seancën e parë gjyqësore që ka nisur këtë të enjte në Hagë.
Në nisje të këtij gjykimi ZPS-ja ka paraqitur pjesë nga videokonferencat e Hysni Gucatit dhe Nasim Haradinajt, dhe pjesë të intervistave që kanë dhënë në emisione të ndryshme, ku kanë kundërshtuar Gjykatën Speciale dhe kanë deklaruar që do të publikojnë çdo material që arrin në zyrat e tyre.
Sipas ZPS-së, deklarime të tilla dëshmojnë se të akuzuarit ishin të vetëdijshëm që po publikonin informacione të fshehta. Seanca e radhës në këtë proces do të jetë me 18 tetor, kur do të fillojë dëgjimi i dëshmitarëve.
Gucati dhe Haradinaj akuzohen se në prill dhe shtator 2020 bënë deklarata akuzuese për dëshmitarë që bashkëpunojnë me ZPS-në dhe për persona të tjerë, duke i quajtur ata, ndër të tjera, gënjeshtarë, bashkëpunëtorë dhe tradhtarë.
Ky është gjykimi i dytë që ka nisur në Dhomat e Specializuara të Kosovës në Hagë, pas atij kundër ish-eprorit të UÇK-së, Salih Mustafa.