Kryeministri i Kosovës, Albin Kurti, ka thënë se Qeveria e tij është duke u përgatitur për të vendosur reciprocitet të plotë me Serbinë. Në emisionin “Desku” në KTV, Kurti, që pati premtuar vendosjen e reciprocitetit pak ditë pasi të marrë pushtetin në shkurt sivjet, ka thënë se “s’mund të bëhen të gjitha gjërat përnjëherë”.
Ai ka njoftuar se në takimet që ka zhvilluar në Bruksel ka bërë propozimin për reciprocitet për çështjen e pakicave.
“Ne po e denoncojmë çdo shkelje të Serbisë. Po përgatitemi mirë që kur të zbatohet të mos ketë asnjë dështim. E kemi për targat, por do ta zbatojmë edhe në të tjera. Kemi bërë propozim për reciprocitet për të drejta. Në bisedimet në Bruksel kam bërë propozim me të cilin kam thënë se të drejtat e pakicave kombëtare në Kosovë e Serbi duhet të jenë në raport reciprociteti. Kjo është refuzuar. Beteja vazhdon, reciprocitetin do ta zbatojmë, mirëpo s’mund t’i bëjmë të gjitha gjërat përnjëherë”, ka thënë ai.
Për premtimin e shkurtit, Kurti ka thënë se “mund të marr vendime që mund të ngelin dëshira të mia, e që s’mund t’i kemi përgatitjet e duhura”.
“Besoj se do ta vendosim reciprocitetin, por paralelisht duhet të zbatojmë strategji që i bën ato të implementueshme”, ka thënë më tej ai.
Kurti ka mohuar se atij i është refuzuar viza për në Shtetet e Bashkuara të Amerikës. Ka thënë se vitin e ardhshëm do të ketë vizitë dhe se për këtë po bëhen përgatitje nga stafi i tij.