Për herë të parë, kultura dhe veshjet tradicionale shqiptare u prezantuan në paradën e “Oktoberfest” në Mynih. Përfaqësues të komunitetit shqipfolës marshuan me krenari, duke shpalosur rrënjët, traditat dhe vlerat tona kombëtare në një nga festat më të njohura në botë.
Organizimi u bë i mundur nga shoqata “Iliria München”, në bashkëpunim me Konsullatën e Përgjithshme të Republikës së Shqipërisë dhe Konsullatën e Përgjithshme të Republikës së Kosovës në Mynih.
Veshjet tradicionale shqiptare u bënë pjesë e paradës së famshme “Trachten- und Schützenzug”, ku flamuri i Shqipërisë dhe ai i Kosovës u ngritën krah për krah në një atmosferë festive.
Për këtë ngjarje ka reaguar edhe kryeministri Edi Rama, i cili shkruan se Xhubleta shkëlqeu me format unike, trashëgimia e të cilës mbrohet nga UNESCO.
“Parakalimi i veshjeve tona tradicionale, për herë të parë në Oktoberfest, njëra nga festat më popullore në botë, ku Xhubleta shqiptare shkëlqeu me format e saj unikale”, shkruan Rama.
Oktoberfest, i cili për herë të parë u mbajt në vitin 1810, ka evoluar ndër vite duke u shndërruar në një nga ngjarjet më të rëndësishme të Gjermanisë. Festa zhvillohet nga 20 shtatori deri më 5 tetor 2025 në parkun e njohur Theresienwiese, ku çdo vit tërheq miliona vizitorë nga e gjithë bota.
Ashtu si tradita e kërkon, të dielën e parë të festivalit u mbajt parada e kostumeve tradicionale, ku për herë të parë mori pjesë edhe komuniteti shqiptar atje.
Përveç paradës, Oktoberfest vijon me atmosferën e zakonshme festive: ushqim bavarez, birrë tradicionale të Mynihut, lojëra dhe atraksione të shumta që e bëjnë këtë festë një përvojë unike për vizitorët.