Me rastin e 26-vjetorit të themelimit të Policisë së Kosovës, deputeti i LDK-së, Avdullah Hoti, ka shprehur keqardhje që shteti i Kosovës ende nuk ka arritur të sigurojë për Policinë e Kosovës sigurimin shëndetësor dhe sigurimin e jetës.
Në profilin e tij në “Facebook”, Hoti ka thënë se është i papranueshëm fakti se pjesëtarëve të këtij institucioni iu mungojnë kushtet dhe mjetet e punës adekuate.
“Respekt dhe mirënjohje të jashtëzakonshme ndaj institucionit simbol dhe identitar të Republikës së Kosovës – Policisë. Mirënjohje dhe përulje ndaj të gjithë atyre policëve që ranë në krye të detyrës dhe atyre që u lënduan në mbrojtje të jetës dhe pronës së qytetarëve. Ndjehem keq që pas kaq vitesh shteti i Kosovës ende nuk ka arritur të ofrojë mbrojtjen e nevojshme për pjesëtarët e këtij institucioni, përfshirë këtu sigurimin shëndetësor dhe sigurimin e jetës, pensionin dinjitoz, të parakohshëm dhe të rregullt. Është e papranueshme edhe fakti se ju mungojnë kushtet dhe mjetet e punës adekuate, siç janë: shujta e rregullt dhe e plotë, veshmbathje cilësore për verë e dimër, transport adekuat, vetura pune të përshtatshme dhe të mjaftueshme për të gjithë”, ka shkruar Hoti.