Dogana e Kosovës ka njoftuar përmes një postimi në Facebook se njësiti Anti-Kontrabandë, pas kontrollit të një automjeti, ka gjetur produkte të padoganuara të llojit “botox” dhe “fillerë”.
“Gjatë kontrollit të automjetit, është konstatuar se brenda tij transportoheshin produkte të padoganuara të llojit ‘botox’ dhe ‘fillerë’ (produkte për përdorim estetik). Pas veprimeve të mëtejshme operative dhe në koordinim me prokurorin kompetent, është kryer kontroll edhe në një lokacion tjetër në Prishtinë, ku është gjetur dhe ndaluar një sasi shtesë e këtyre produkteve”, thuhet mes tjerash në njoftim.
Sipas njoftimit, vlera e përgjithshme e mallrave të ndaluara llogaritet të jetë rreth 5 mijë euro.
Rasti, sipas procedurave ligjore, është duke u trajtuar si kundërvajtje doganore.
“Duke marrë parasysh se këto produkte kanë kontakt të drejtpërdrejtë me trupin e njeriut, mungesa e kontrollit adekuat dhe transporti i parregullt i bën ato veçanërisht të rrezikshme për shëndetin e popullatës. Rasti, sipas procedurave ligjore, është duke u trajtuar si kundërvajtje doganore. Dogana e Kosovës mbetet e përkushtuar në parandalimin dhe luftimin e kontrabandës, duke mbrojtur tregun vendor dhe shëndetin e qytetarëve”, shkruan në fund të njoftimit.