Gjermanisë do t’i nevojitet që të rrisë emigracionin për të parandaluar mungesat e rënda të fuqisë punëtore nga minimi i produktivitetit dhe rrezikimi i një tranzicioni të suksesshëm të energjisë, tha ministri gjerman i Ekonomisë, derisa ekonomia më e madhe e Evropës përballet me një krizë demografike.
“Ne kemi 300,000 vende të lira pune sot dhe presim që kjo shifër të rritet në një milion e më shumë”, tha ministri Robert Habeck në një konferencë shtypi.
“Nëse s’e mbushim këtë hendek, do të kemi probleme reale të produktivitetit”.
“Natyrisht, kjo nënkupton një kombinim më të mirë të kualifikimeve, trajnimeve dhe mundësive për familjet dhe për punët. Në Gjermani sigurisht është rritur edhe emigrimi në të gjitha fushat, për inxhinierët, zejtarët, kujdestarët. Ne duhet ta organizojmë këtë”, tha Habeck, i cili është gjithashtu zëvendëskancelar në koalicionin e ri qeverisës trepalësh të Gjermanisë, të udhëhequr nga socialdemokrati Olaf Scholz, shkruan Reuters.
Instituti Ekonomik Gjerman vlerëson se forca e punës do të tkurret me më shumë se 300,000 njerëz këtë vit, pasi ka më shumë punëtorë të moshuar që dalin në pension sesa të rinj që hyjnë në tregun e punës.