Me dimrin zyrtarisht afër, shumë persona po përballen me ftohjet sezonale. Çdo dimër ka një rritje të ftohjeve të zakonshme dhe infeksioneve të tjera të frymëmarrjes.
Por si mund ta dini nëse është më shumë se një ftohje që keni? Ftohja e zakonshme shkaktohet nga një lloj virusi i ndryshëm nga COVID-19 .
Varianti Omicron dihet se shkakton simptoma të buta dhe për këtë arsye mund të jetë e vështirë të dihet ndryshimi, shkruan Express.co.uk.
Por ka të ngjarë, thonë ekspertët, që COVID-19 të duket si një ftohje e rëndë. Epidemiologu Profesor Tim Spector tha: “Shumica e njerëzve që testojnë PCR pozitiv kanë simptoma të ngjashme me të ftohtin dhe ata nuk kanë treshen klasike të simptomave të vjetra të COVID-19: ethe, humbje e nuhatjes dhe shijes dhe kollë e vazhdueshme”.
Ai shtoi se do të duket “ashtu si një ftohje e rëndë për shumë njerëz”, me shumicën e simptomave të ngjashme me një ftohje të zakonshme, duke përfshirë dhimbje koke, dhimbje të fytit, rrufë, lodhje dhe teshtitje.
Profesoresha Irene Petersen, profesoreshë e epidemiologjisë dhe informatikës shëndetësore në University College London (UCL), tha: “Një rrufë dhe dhimbje koke janë simptoma të shumë infeksioneve, por mund të jenë gjithashtu simptomat e para – dhe të vetmet simptoma – të COVID-19. Prandaj, nëse keni këto simptoma, unë do t’ju inkurajoja të testoheni”.
Simptomat kryesore të Omicron që raportohen përfshijnë hundën e mbytur, dhimbjen e kokës dhe dhimbjen e fytit. /Telegrafi/