Kryeministri i Shqipërisë, njëherit kryetar i Partisë Socialiste, Edi Rama, ka reaguar sërish pas zhvillimeve të së shtunës në zyrat e Partisë Demokratike.
Kreun e PD-së, Lulzim Basha dhe Sali Berishën, Rama i ka quajtur kufoma politike “që luajnë kështjellash në mes të Tiranës dhe fajësojnë njëra-tjetrën se kush është shërbëtori im”.
“Më vjen t’u lëshoj demokratëve një kushtrim të megjithëzemërt: Ejani t’i japim ç’mundemi Shqipërisë, të bashkuar si shqiptarë, si qytetarë, si njerëz!”, thuhet në shkrimin e tij në rrjetin social Twitter.
Rama e ka quajtur Bashën “humbës kronik të selisë blu”, e Berishën “personazh pa seli të listës së zezë”.
“Lërini në fatet e parashkruara humbësin kronik të selisë blu dhe personazhin pa seli të listës së zezë, të cilët të kujtojnë të dy fjalët e Xhokerit, “Skam asgjë për të humbur. Asgjë s’më dhemb dot më. Tashmë jeta ime është thjesht një komedi”! Sa u shkon ai llafi… Varu teneqet!”.
Para këtij reagimi, Rama duke ironizuar me PD-në, ka thënë se jeta është e vështirë, mirëpo budallenjtë e vështirësojnë edhe më shumë.
Protesta e iniciuar nga Berisha, rezultoi me të lënduar e thyerje të zyrave të PD-së. Basha në një konferencë për media tha se Berisha sot e ka pasur ditën e fundit politike në Shqipëri, duke shtuar se kjo është mundësi që demokratët të shkëputen “nga trashëgimia e tij e zezë”.