Gjykata Themelore në Prizren, Departamenti për Krime të Rënda, ka shpallur aktgjykimin në rastin e tentim vrasjes në një parking në Prizren, që ndodhi në gusht të vitit 2018. Robert Kaçinari, Eduard Kaçinari dhe Arton Bajrami janë shpallur fajtor lidhur më këtë rast.
Nga Gjykata Themelore në Prizren kanë bërë të ditur për Gazetën Sinjali për dënimin që u është shqiptuar tre të akuzuarve.
Robert Kaçinari është shpallur fajtor për veprën penale vrasje në tentativë e kryer në gjendje të tronditjes së fortë mendore dhe mbajtja në pronësi, kontroll ose posedim të paautorizuar të armëve.
“Për veprën e parë e ka dënuar me DËNIM ME BURGIM në kohëzgjatje prej 7 (shtatë) vite, ndërsa për veprën e dytë me burgim në kohëzgjatje prej 1 (një) viti, ashtu që gjykata në kuptim të nenit 76 të KPP ka shqiptuar DËNIM UNIK me burgim në kohëzgjatje prej 7 (shtatë) vite e 6 (gjashtë) muaj, në të cilin dënim i llogaritet edhe koha e kaluar në masën e paraburgimit dhe arrest shtëpiak prej datës 13.08.2018 e deri më datën 04.10.2020”, thuhet në përgjigjen e gjykatës për Sinjalin.
Ndërsa i akuzuari Eduard Kaçinari është dënuar me katër muaj burgim.
“I akuzuari E.K., për shkak të veprës penale pjesëmarrje në rrahje nga neni 190 pa. 1 të KPRK-së, me dënim me burgim në kohëzgjatje prej 4 (katër) muaj, në të cilin në të cilin dënim i llogaritet edhe koha e kaluar në masën e paraburgimit prej datës 13.08.2018 e deri më datë 26.09.2019”.
Të akuzuarit tjetër, për pjesëmarrje në rrahje, Arton Bajramit, gjykata i ka shqiptuar dënimin me burgim në kohëzgjatje prej 4 katër muaj.
Sipas aktakuzës, “më datë 13 gusht 2018, rreth orës 16:45 minuta, në Prizren, në rrugën e “Pushkatarëve”, në parkingun “Toni”(pronë e të pandehurit R.K.), i pandehuri R.K., tenton me dashje të privojë nga jeta personin tjetër me ç’rast me dashje e vë në rrezik jetën e personave të tjerë, në atë mënyrë që pas një mosmarrëveshje paraprake në mes të pandehurit E.K., në një anë dhe të dëmtuarit D.B., dhe të pandehurit A.B., dhe familjarëve të tyre në anën tjetër, lidhur me mënyrën e parkimit të automjetit nga ana e babait të dëmtuarit D.B.
I pandehuri R.K., në momentin kur sheh se ka filluar zënka i afrohet vendit të ngjarjes dhe i pajisur me armën e zjarrit pistoletë e tipit “Beretta”, i përvidhet nga pas të dëmtuarit D.B., dhe me një predhë e godet në pjesën e pasme të kokës dhe të qafës, duke i shkaktuar thyerje të kockës dhe plagë shpuese në qafë. Në anën tjetër, nga predha e njëjtë goditen në këmbë edhe të pandehurit A.B., dhe E.K., me ç’rast marrin lëndime trupore”.