Ministrja e Financave, Hykmete Bajrami, ka bërë të ditur se deri më tani janë bllokuar 560 mijë euro nëpër xhirollogari të ndryshme dhe janë konfiskuar 3 vetura, në lidhje me “avullimin” e 1.2 milion eurove nga Thesari i Shtetit.

Bajrami para deputetëve ka treguar se si shkon procedura për të ardhur deri te kryerja e një transaksionit.

“Çka ka ndodhur, ju e dini me datën 19 Thesari është njoftuar nga Ministria e Infrastrukturës se janë kryer disa transaksione, se kjo kompani nuk ka kontratë me ne dhe përmenden emrat se ata nuk janë zyrtarë të ministrisë. Ka hyrë në sistem ka krijuar usera dhe ka kryer procedurat. Ky person edhe në përshkrim të punës e ka pas për të krijuar qasje për zyrtarët. Tash për secilën organizatë buxhetore i ka një ose dy persona që kanë qasje në thesar. Ky person punon që 11 vite në Thesar. Tash ky ka hyrë tek sistemi e ka krijuar një llogari dhe ka bërë urdhërblerjen, ka kaluar tek tjetri e ka bërë edhe certifikimin dhe aprovimin. Kur ka ardhur tek certifikimi e ka përdorur llogarinë e zyrtarit të Mistrisë së Infrastrukturës i cili që 9 muaj nuk punon në këtë ministri. E ka marrë fjalëkalimin e tij dhe e ka kryer. Për secilin person zyrtar që ka qasje në thesar e ka një certifikim. Kjo llogari ka qëndruar e hapur dhe nuk e dimë se si nuk i ka shkuar një email që paswordi i juaj po preket. Tek divizioni i pagesave gjithçka është dal në rregull. Ky person e ka keqpërdorur detyrën zyrtare”, tha ajo.

Bajrami tha se nuk dëshiron të shfajësohet sepse skandali ka ndodhur në Thesar, mirëpo tha se kanë marrë masa shtesë.

“Ne kemi marrë masa shtesë, po bëjmë kontrolle për secilin transaksion. Kjo nuk la mundur të ndodh më herët se për çdo fund të muajit përmes dokumenteve bëhet barazimi për buxhetin e secilës organizatë buxhetore. Ne kemi njoftuar të gjitha institucionet e rendit, AKI. Deri më tani 560 mijë euro nëpër xhirollogri të ndryshme, janë konfiskuar 3 vetura. Ky krim është plotësisht i gjurmueshëm”, tha ajo.

Bajrami tha se shpreson dhe beson që mjetet do të kthehen në buxhetin e shtetit.

Medije Musliu, zëvendësdrejtore e Thesarit të Shtetit, ka bërë të ditur se transaksionet për 2.1 milionë euro që janë transferuar në llogarinë e kompanisë “LDA Group” ka filluar në orën 11 e 44 dhe ka zgjatur deri në orën 12 e 48.

“E kemi dëgjuar dikush thotë 8 deri në 9 minuta. Janë nxjerrë raporte nga sistemet elektronike. Transaksionet kanë filluar rreth orës 11 e 44 ose 48 nuk e di saktë. Procesi i fundit ka ndodhur rreth orës 12 e 48. Krejt proceset janë kryer gjatë kësaj periudhe”, tha ajo.

Qendra Kombëtare për Menaxhim Kufitar ka publikuar listën e shteteve të cilat aktualisht Kosova i konsideron me rrezikshmëri të lartë të infektimit me COVID-19.

Pjesë e kësaj liste janë: Gjermania, Danimarka, Qipro, Sllovakia, Spanja, Franca, Italia, Britania e Madhe, Holanda, Rumania, Belgjikë, Çekia, Austria, Irlanda, Hungaria, Luksemburgu, Islanda, Sllovenia, Malta, Polonia, Kroacia, Lihtershtajni, Portugalia dhe Bullgaria.

Të gjithë qytetarët që jetojnë në në këto shtete për të hyrë në Republiken e Kosovës duhet të posedojnë testin PCR negativ jo më të vjetër se 72 orë ose duhet të qendrojnë 7 ditë në vet-izolim.

Presidenti Thaçi ka takuar sot, siç dihet publikisht, Isa Mustafën dhe Ramush Haradinajt. Presidenti ka pasur edhe një takim tjetër me Haradinajn para pak ditësh. Zyra e Presidentit thotë se folën zhvillime politike.

Zyra e Presidentit i ka thënë Gazetës Express se Thaçi sot i takoi kryetarët e partive për të biseduar për zgjedhjet që do të mbahen në Podujeve dhe për zhvillimet në vend.

“Presidenti i ka takuar sot liderët e partive politike, me të cilët ka biseduar për zgjedhjet në komunën e Podujevës dhe për zhvillimet e përgjithshme politike në vend”, ka thënë Zyra për Informim e Presidencës.

Ndërkaq, më parë kreu i AAK’së, Ramush Haradinaj tha për media se në takim sot e ka thirrur Presidenti. Sic tha ish-kryeministri, Thaci nuk i ka treguar nëse ka “diçka të re” nga Gjykata Speciale.

Haradinaj ka thënë se s’kanë folur për pozitën e presidentit dhe se presidenti Thaçi nuk ka thënë asgjë rreth punës së Speciales./Express/

Ish-eprori i UÇK-së, Salih Mustafa, është deklaruar i pafajshëm për të katër akuzat e ngritura ndaj tij nga Specialja.

Ai është deklaruar i pafajshëm pas një fjalimi të gjatë që mbajti. Me këtë ka përfunduar pjesa e parë e seancës.

Po vazhdon pjesa e tjetër.

Katër persona kanë vdekur dhe 281 raste të reja me COVID-19 janë konfirmuar në 24 orët e fundit në Kosovë. Rezultatet sipas IKSHPK-së kanë dalë nga 932 mostra të marra.

“Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, janë testuar gjithsej 932 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 281 raste pozitive. Brenda 24 orëve janë raportuar katër raste të vdekjes me SARS CoV-2 pozitiv (1 rast Spitali i Përgjithshëm, Prizren, 1 rast Mjekimi Intenziv Qendror, QKUK, 1 rast Spitali i Përgjithshëm, Gjakovë dhe 1 rast Klinika Emergjente, QKUK)”.

Deputetja boshnjake, Duda Balje, ka kërkuar nga institucionet e Republikës që të hapin një Zyrë Ndërlidhës të Kosovës, në Sarajevë.

Në dokumentet e publikuara nga Balje, bëhet e ditur se kërkesa është dërguar në adresë të Ministrisë së Punëve të Jashtme, njofton Klan Kosova.

Në këtë kërkesë, theksohet se hapja e një misioni të posaçëm, të tipit Zyrë Ndërlidhëse e Republikës së Kosovës në Sarajevë, do të ndihmonte në zgjidhjen e shumë problemeve, e njëkohësisht do të mund të shërbente edhe në përafrimin politik midis dy shteteve sovrane dhe do ta rriste bashkëpunimin ndërshtetëror e rajonal.