Kryetari i Prizrenit, Mytaher Haskuka ka reaguar pas deklaratës së zv.kryeministres, Albulena Balaj-Halimaj e cila tha se në këtë komunë që nga udhëheqja e LVV-së migrimi është rritur për 400 për qind.

Haskuka përmes një reagimi në Facebook ka shkruar se sipas raportit të Agjencisë së Statistikave, kanë emigruar 1 mijë e 208 banorë, pra 0.6%.

“Emigrimi nga Kosova është 3 herë më i lartë se nga Prizreni. Prandaj, zëvendës-kryeministrja, partia e së cilës në 3 vitet e fundit gjithmonë ka qenë në qeverisje (pos 100 ditëshit të Albinit), është mirë t’i hedh diplomat, e t’i bëjë pyetje vetes se pse po ikin qytetarët?!”, ka shkruar Haskuka.

Postimi i plotë:

Sipas Agjencisë së Statistikave, gjatë vitit 2019 nga Kosova kanë emigruar 28,845 persona, nga popullsia 1,795,666, pra 1,6% e popullatës. Sipas raportit, Prizreni ka 192,712 banorë, ndërkaq kanë emigruar 1,208 banorë, pra 0,6%.

Pra, emigrimi nga Kosova është 3 herë më i lartë se nga Prizreni. Prandaj, zëvendës-kryeministrja, partia e së cilës në 3 vitet e fundit gjithmonë ka qenë në qeverisje (pos 100 ditëshit të Albinit), është mirë t’i hedh diplomat, e t’i bëjë pyetje vetes se pse po ikin qytetarët?!

Për matematikë e statistikë elementare, ndoshta kjo është arsyeja pse ju duhet rinumërimi për kalkulim të pragut.

Prokuroria Speciale ka nisur hetime për skandalin e heqjes së mbi 7 milionë euro borxhe tatimore kompanisë “NewCo Feronikeli Complex L.L.C.”, në pronësi të oligarkut nga Shqipëria, Saimir Mane.

Prokuroria tashmë ka autorizuar Policinë e Kosovës të nis punën për hetimin e këtij rasti, raporti Insajderi me burime brenda Prokurorisë së Shtetit.

Por, Prokuroria Speciale e Kosovës lidhur me nisjen e hetimeve për rastin, ende nuk është deklaruar.

Javën e kaluar, në media, u raportua për skandalin e heqjes së shtatë milionë eurove borxhe tatimore “NewCo Ferronikeli”, kompani të cilën e ka në pronësi oligarku shqiptar Samir Mane.

Shkrimi dëshmon se si ATK-ja, përmes një procesi të dyshimtë, ia fshiu borxhet tatimore gjigantit metalurgjik, një muaj pas blerjes së ndërmarrjes nga oligarku Mane.

Një ditë pas publikimit të shkrimit hulumtues, ATK-ja kërkoi nga prokuroria të nisë hetimet për rastin.

“ATK sot ka dorëzuar kërkesën në Prokurorinë e Shtetit me numër protokolli 12-06-3983 përmes së cilës kërkon nga prokuroria që të hetoj pretendimet e gazetës Insajderi, lidhur me shkrimin e publikuar dje me datë 26.11.2020”, thuhet në njoftimin e ATK-së./reporteri.net/

Agjencia Evropiane e Barnave (EMA) do të vendosë “brenda javësh” për autorizimin ose jo të vaksinës kundër COVID-19 të kompanive Pfizer dhe BioNTech.“Një mendim mbi autorizimin mund të lëshohet brenda disa javësh varësisht nga të dhënat për cilësinë, sigurinë dhe efektivitetin e vaksinës”, thotë EMA.Agjencia tha se vlerësimi për vaksinën mund të jetë gati “më së voni” deri më 29 dhjetor.

Edhe kompania Moderna e cila ka përfunduar fazat e testimit të vaksinës së saj kundër COVID-19, kërkon autorizimin për përdorim në vendet evropiane. Vendimi për këtë vaksinë mund të merret jo më vonë se data 12 janar.Në javët e fundit, rezultatet pozitive të vaksinave kanë ngjallur shpresat për t’i dhënë fund pandemisë që ka goditur ekonomitë, dhe ka marrë më shumë se 1.45 milion jetë në të gjithë botën. Të dyja këto kompani synojnë autorizimin edhe për përdorim të vaksinave në Shtetet e Bashkuara.Këshilltarët e pavarur të Administratës Amerikane të Ushqimit dhe Barnave do të takohen më 17 dhjetor për të shqyrtuar të dhënat e provave të Moderna-s. Ata do të takohen më 10 dhjetor për të shqyrtuar të dhënat e kompanisë Pfizer. Menjëherë pasi të fitojë autorizimin e përdorimit emergjent, Moderna pret që vaksina të transportohet në pikat e caktuara të shpërndarjes në të gjithë Shtetet e Bashkuara, raporton Reuters.

Një rrjedhje e paprecedentë e dokumenteve të brendshme kineze zbulon për herë të parë atë që dinte Kina në javët e para të pandemisë Covid-19, por që nuk ia tregoi botës.

Një informator që thuhet se punon brenda sistemit kinez të shëndetësisë, zbuloi dokumentet për CNN online, të cilat tregojnë një reagim kaotik që prej fillimit.

CNN i ka verifikuar ato, me ekspertë, këshilltarë të sigurisë në Europë, duke përdorur analizat digjitale, transmeton Albinfo.ch.

Dokumentet ofrojnë zbulime të rëndësishme lidhur me rajonin e Hubeit, ku gjendet qyteti i Wuhanit.

Fillimisht, vdekjet jo gjithmonë raportoheshin me saktësi. Në 17 shkurt, 196 persona humbën jetën sipas dokumenteve, por në raportimin zyrtar u fol për 93 viktima. E njëjta gjë duket të ketë ndodhur edhe me numrin e të infektuarve. Informacionet e brendshme sugjerojnë se në një ditë, gjatë shkurtit kishte pasur 6 mijë raste të reja, të gjitha serioze, por publikisht Kina konfirmoi vetëm 2500 të tilla.

“Nëse Kina do të kishte qenë më transparente dhe më agresive në reagimin e saj, kjo do të kishte pasur impakt në përhapjen e virusit, edhe në pjesën tjetër të botës. Gjithashtu, autoriteteve u ishte dashur më shumë se tri javë për diagnostikimin e rasteve në fillimet e pandemisë. Ndoshta zbulimi më i rëndësishëm i përket fillimit të dhjetorit, momenti kur Covid-19 u shfaq fillimisht ne Kinë”, thotë Dali Yang, profesor i Shkencave Politike, Çikago.

Dokumentet zbulojnë se pati një rritje të madhe të rasteve të gripit në Hubei, pikërisht atëherë kur mendohet që personat e parë të jenë prekur me Covid-19. Kishte 20 herë më shumë raste gripi se normalisht.

Ekspertët thonë se spitalet mund të jenë mbushur me pacientë që kishin simptoma të ngjashme me gripin, duke e bërë të vështirë evidentimin e rasteve të para me covid-19.

Dokumentet nuk tregojnë lidhje të rasteve me koronavirusin në mënyrë direkte, por pacientët u nënshtroheshin rregullisht ekzaminimeve imazherike. Dokumentet treguan gjithashtu se epidemia gripit ishte më e përhapur gjatë javës së parë të dhjetorit jo në Wuhan por në dy qytete të tjera të afërta.

Informacionet janë të rëndësishme për të gjurmuar se ku e pati fillimisht origjinën virusi i rrezikshëm. Ministria e Jashtme kineze nuk i është përgjigjur kërkesës së CNN për koment.

Zyrtarë të Partisë Demokratike të Kosovës, janë duke negociuar me Qeverinë Hoti, për të arritur marrëveshje për kalimin e Projektligjit për Rimëkëmbje Ekonomike, shkruan Gazeta Blic.Këtë e ka konfirmuar për Gazeta Blic, deputeti i PDK-së, Kujtim Gashi.Ai ka treguar se cilat janë kushtet e tyre për t’u kaluar kt ligj.

“Nuk është që s’ka negociata. Ne kemi ofru disa pika ku ne mendojmë që duhet me u futë në ligjin për Rimëkëmbje. Edhe ma herët në ligjin tonë të propozuar para 7-8 muajsh që nuk është marrë parasysh kanë qenë të parapara këto pika. Meqë Qeveria nga ajo kohë e ka injoru totalisht propozimet tona, ne i kemi propozu edhe katër pika të reja në mënyrë që me u fut në ligjin për Rimëkëmbje që me u harmonizu edhe me ligjin tonë të vjetër, e kështu të kemi votim në Kuvend.

Ne mendojmë që aktualisht ky ligj nuk e ndihmon ekonominë, sektorin privat, punëtorët e papunë”, deklaroi Gashi për Gazeta Blic.
Ndër propozimet e PDK-së janë të ulet TVSH në 0 për qind për lëndën e parë gjatë pandemisë, e poashtu ata persona që kanë deri në 10 mijë euro në Trust të rimbursohen pas pandemisë.Gashi beson se edhe Qeveria është e vetëdijshme për rëndësinë e propozimeve të PDK-së dhe ndihmën që do i jepnin ato ekonomisë

“Ne propozojmë që TVSH për lëndën e parë të zbret nga 18 në 0 për qind në periudhën e pandemisë, dhe çështjen e tërheqjes së Trutit, për ata që i kanë deri në 10 mijë euro, të rimubrsohen pas pandemisë. Besoj që propozimet tona janë thelbësore dhe Qeveria jam i bindur që është e vetëdijshme se sa të rëndësishme janë këto pika për me ndihmu edhe menaxhimin e pandemisë por edhe ekonomine e vendit. Nesër e kemi mbledhjen e kmisionit për Buxhet dhe Transfere ku ligji është i paraparë për votim, ne sigurisht që do japim kontributin tonë për këtë çështje”, thotë Gashi për Gazeta Blic.Gazeta Blic merr vesh që kjo çështje është diskutuar edhe në mbledhjen e djeshme të kryetarit të LDK-së, Isa Mustafa, me deputetë të partisë së tij dhe kryeministrin Hoti.Siç mëson gazeta, ata janë dakorduar që të plotësohen kushtet e PDK-së, për kalimin e Ligjit për Rimëkëmbje Ekonomike.

Gjykata Speciale publikoi akuzat ndaj ish-Presidentit të Kosovës, Hashim Thaçi, dhe ish-komandantëve të UÇK, të cilët ndodhen në burg prej javësh, në pritje të nisjes së gjykimit. Burg ku ata po mbahen gjendet jashtë Hagës, në periferi, më saktësisht në Haaglanden të Scheveningen.Haaglanden ështe një burg unik në Holandë.

Ai është i vetmi që ka një qendër kujdesi ku të paraburgosurit që kanë nevojë për kujdes mbahen 24 orë në ditë.
Ky mund të jetë kujdes fizik, por edhe psikologjik. Ose një kombinim i të dyjave. Burgu mund të strehojë rreth 200 të arrestuar.

Të paraburgosurve u lejohet qasja ditore në ajër të pastër dhe ushtrime fizike, si dhe mundësia për të marrë pjesë në aktivitete të tjera të përshtatshme. Atyre u lejohet të lexojnë dhe shkruajnë materiale dhe kanë qasje në një bibliotekë që përmban libra, revista dhe gazeta në gjuhët e tyre amtare. Të burgosurit mund të luajnë shah, futboll, dhe lojëra tjera…

Përveç kësaj, të burogsurit kanë mundësi të përdorin programe radio dhe televizive, të marrin pjesë në shërbimet fetare ose shpirtërore të disponueshme, qe do te thote se ata edhe mund te falen. /GSH/