Rifat Jashari sot ka një ditë të veçantë. Jashari feston datëlindjen e 74-të.Lajmin e ka bërë të ditur kryetari i Skenderajt Bekim Jashari.Njoftimi i plotë:Sot ka ditëlindjen më i dashuri dhe më i respektuari ynë, ai që bashkë me balin Adem e babushin Hamëzen na mësuan e edukuan se si duhet punuar e sakrifikuar për Liri e Pavarësi.

Me mixhën Rifat kemi banuar e punuar bashkë edhe në Gjermani, bashkë ishim edhe kur morëm lajmin për rënien heroike të familjes sonë.Mixha ishte afër meje në ditët më të vështira të jetës sime, ishin ditë plot dhimbje por edhe krenari.

Sikurse shumë vellëzer e motra që na lehtësuan dhimbjen që ne kishim për më të dashurit tonë, që ia falëm lirisë së Kosovës.Atë kohë kishim mbetur pak në numër por që ishim të gatshëm për Lirinë e Kosovës të gjithë ta japim jetën.Bashkë me mixhën Rifat, Muratin, Lulin, Bashkimin, Ilirianen,Shqipen, Besarten,Fazliun e Marigonen përjetuam edhe ditët e para të Lirisë së Kosovës, në Prekazin heroik.

Kanë kaluar 22 vite që nga rënia heroike e familjes Jashari, mixha Rifat ende mbetet udhërrëfyesi ynë, i nipave e mbesave, Jasharajve të ri në rrugën tonë të kontributit për shtet e shoqëri.Urime ditëlindja mixhë, shëndet e mbarësi, të paqim gjatë!

Flet shqiptari që bëri vaksinën e COVID: Pranova pasi më vdiq nëna e babai!Imer Shehu është një nga 3 shqiptarët që ka bërë vaksinën e COVID-19.Ai ka komentuar në një lidhje me skype nga Londra në emisionin “Shqipëria Live” se ka pranuar që ta bëjë pasi i ndërroi jetë nëna dhe babai, të cilët u infektuan me COVID-19.
Britania e Madhe nisi testimin e vaksinës kundër koronavirusit dhe ndër 10,000 vullnetarët e përzgjedhur për fazën e tretë të testimit është Imer Shehu nga Kosova, me banim në Londër.

“Ata e dinë nuk e di unë se s’jam ekspert se çfarë përmban vaksina, kam pasur frikë, por kur më vdiq babai dhe nëna thashë pse unë të rri duarkryq, ma kanë bërë në krah. Kjo është vaksina e parë, vaksina e dytë është ajo që do të bëjmë gjithë jetën. Atë vaksinë fillimisht duhet ta marrin ushtria, mjekët. Unë e kam kaluar covidin, por kisha frikë mos infektohesha dy herë. Unë bëj jetë mesatare dhe mbijetoj këtu në Londër, por s’do rrezikoja familjen time”, tha ai.Doktori Edmond Stojku i ftuar në emision tha se vaksina përmban virusin e zbutur dhe futet në trup për të krijuar antitrupat. Sipas tij kush e ka kaluar nuk ka nevojë të vaksinohet sepse trupi i ka krijuar antitrupat. /Top Channel/

Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, janë testuar gjithsej 1.375 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 521 raste pozitive.

Brenda 24 orëve janë raportuar 10 raste të vdekjes me SARS CoV-2 pozitiv. Rastet e vdekjes janë nga komunat: Podujevë 2 raste (81,75 vjeç), Prishtinë 2 raste (83,58 vjeç), Viti 2 raste (77, 77 vjeç), Mitrovicë 1 rast (71 vjeç), Pejë 1 rast (79 vjeç), Junik 1 rast (83 vjeç), Rahovec 1 rast (78 vjeç).

Kryetari i Prizrenit, Mytaher Haskuka ka reaguar pas deklaratës së zv.kryeministres, Albulena Balaj-Halimaj e cila tha se në këtë komunë që nga udhëheqja e LVV-së migrimi është rritur për 400 për qind.

Haskuka përmes një reagimi në Facebook ka shkruar se sipas raportit të Agjencisë së Statistikave, kanë emigruar 1 mijë e 208 banorë, pra 0.6%.

“Emigrimi nga Kosova është 3 herë më i lartë se nga Prizreni. Prandaj, zëvendës-kryeministrja, partia e së cilës në 3 vitet e fundit gjithmonë ka qenë në qeverisje (pos 100 ditëshit të Albinit), është mirë t’i hedh diplomat, e t’i bëjë pyetje vetes se pse po ikin qytetarët?!”, ka shkruar Haskuka.

Postimi i plotë:

Sipas Agjencisë së Statistikave, gjatë vitit 2019 nga Kosova kanë emigruar 28,845 persona, nga popullsia 1,795,666, pra 1,6% e popullatës. Sipas raportit, Prizreni ka 192,712 banorë, ndërkaq kanë emigruar 1,208 banorë, pra 0,6%.

Pra, emigrimi nga Kosova është 3 herë më i lartë se nga Prizreni. Prandaj, zëvendës-kryeministrja, partia e së cilës në 3 vitet e fundit gjithmonë ka qenë në qeverisje (pos 100 ditëshit të Albinit), është mirë t’i hedh diplomat, e t’i bëjë pyetje vetes se pse po ikin qytetarët?!

Për matematikë e statistikë elementare, ndoshta kjo është arsyeja pse ju duhet rinumërimi për kalkulim të pragut.

Prokuroria Speciale ka nisur hetime për skandalin e heqjes së mbi 7 milionë euro borxhe tatimore kompanisë “NewCo Feronikeli Complex L.L.C.”, në pronësi të oligarkut nga Shqipëria, Saimir Mane.

Prokuroria tashmë ka autorizuar Policinë e Kosovës të nis punën për hetimin e këtij rasti, raporti Insajderi me burime brenda Prokurorisë së Shtetit.

Por, Prokuroria Speciale e Kosovës lidhur me nisjen e hetimeve për rastin, ende nuk është deklaruar.

Javën e kaluar, në media, u raportua për skandalin e heqjes së shtatë milionë eurove borxhe tatimore “NewCo Ferronikeli”, kompani të cilën e ka në pronësi oligarku shqiptar Samir Mane.

Shkrimi dëshmon se si ATK-ja, përmes një procesi të dyshimtë, ia fshiu borxhet tatimore gjigantit metalurgjik, një muaj pas blerjes së ndërmarrjes nga oligarku Mane.

Një ditë pas publikimit të shkrimit hulumtues, ATK-ja kërkoi nga prokuroria të nisë hetimet për rastin.

“ATK sot ka dorëzuar kërkesën në Prokurorinë e Shtetit me numër protokolli 12-06-3983 përmes së cilës kërkon nga prokuroria që të hetoj pretendimet e gazetës Insajderi, lidhur me shkrimin e publikuar dje me datë 26.11.2020”, thuhet në njoftimin e ATK-së./reporteri.net/

Agjencia Evropiane e Barnave (EMA) do të vendosë “brenda javësh” për autorizimin ose jo të vaksinës kundër COVID-19 të kompanive Pfizer dhe BioNTech.“Një mendim mbi autorizimin mund të lëshohet brenda disa javësh varësisht nga të dhënat për cilësinë, sigurinë dhe efektivitetin e vaksinës”, thotë EMA.Agjencia tha se vlerësimi për vaksinën mund të jetë gati “më së voni” deri më 29 dhjetor.

Edhe kompania Moderna e cila ka përfunduar fazat e testimit të vaksinës së saj kundër COVID-19, kërkon autorizimin për përdorim në vendet evropiane. Vendimi për këtë vaksinë mund të merret jo më vonë se data 12 janar.Në javët e fundit, rezultatet pozitive të vaksinave kanë ngjallur shpresat për t’i dhënë fund pandemisë që ka goditur ekonomitë, dhe ka marrë më shumë se 1.45 milion jetë në të gjithë botën. Të dyja këto kompani synojnë autorizimin edhe për përdorim të vaksinave në Shtetet e Bashkuara.Këshilltarët e pavarur të Administratës Amerikane të Ushqimit dhe Barnave do të takohen më 17 dhjetor për të shqyrtuar të dhënat e provave të Moderna-s. Ata do të takohen më 10 dhjetor për të shqyrtuar të dhënat e kompanisë Pfizer. Menjëherë pasi të fitojë autorizimin e përdorimit emergjent, Moderna pret që vaksina të transportohet në pikat e caktuara të shpërndarjes në të gjithë Shtetet e Bashkuara, raporton Reuters.

Një rrjedhje e paprecedentë e dokumenteve të brendshme kineze zbulon për herë të parë atë që dinte Kina në javët e para të pandemisë Covid-19, por që nuk ia tregoi botës.

Një informator që thuhet se punon brenda sistemit kinez të shëndetësisë, zbuloi dokumentet për CNN online, të cilat tregojnë një reagim kaotik që prej fillimit.

CNN i ka verifikuar ato, me ekspertë, këshilltarë të sigurisë në Europë, duke përdorur analizat digjitale, transmeton Albinfo.ch.

Dokumentet ofrojnë zbulime të rëndësishme lidhur me rajonin e Hubeit, ku gjendet qyteti i Wuhanit.

Fillimisht, vdekjet jo gjithmonë raportoheshin me saktësi. Në 17 shkurt, 196 persona humbën jetën sipas dokumenteve, por në raportimin zyrtar u fol për 93 viktima. E njëjta gjë duket të ketë ndodhur edhe me numrin e të infektuarve. Informacionet e brendshme sugjerojnë se në një ditë, gjatë shkurtit kishte pasur 6 mijë raste të reja, të gjitha serioze, por publikisht Kina konfirmoi vetëm 2500 të tilla.

“Nëse Kina do të kishte qenë më transparente dhe më agresive në reagimin e saj, kjo do të kishte pasur impakt në përhapjen e virusit, edhe në pjesën tjetër të botës. Gjithashtu, autoriteteve u ishte dashur më shumë se tri javë për diagnostikimin e rasteve në fillimet e pandemisë. Ndoshta zbulimi më i rëndësishëm i përket fillimit të dhjetorit, momenti kur Covid-19 u shfaq fillimisht ne Kinë”, thotë Dali Yang, profesor i Shkencave Politike, Çikago.

Dokumentet zbulojnë se pati një rritje të madhe të rasteve të gripit në Hubei, pikërisht atëherë kur mendohet që personat e parë të jenë prekur me Covid-19. Kishte 20 herë më shumë raste gripi se normalisht.

Ekspertët thonë se spitalet mund të jenë mbushur me pacientë që kishin simptoma të ngjashme me gripin, duke e bërë të vështirë evidentimin e rasteve të para me covid-19.

Dokumentet nuk tregojnë lidhje të rasteve me koronavirusin në mënyrë direkte, por pacientët u nënshtroheshin rregullisht ekzaminimeve imazherike. Dokumentet treguan gjithashtu se epidemia gripit ishte më e përhapur gjatë javës së parë të dhjetorit jo në Wuhan por në dy qytete të tjera të afërta.

Informacionet janë të rëndësishme për të gjurmuar se ku e pati fillimisht origjinën virusi i rrezikshëm. Ministria e Jashtme kineze nuk i është përgjigjur kërkesës së CNN për koment.