Me votat e 41 deputetëve, nga gjithsej 81 në Parlamentin e Malit të Zi, u zgjodh Qeveria e re e kryesuar nga Zdravko Krivokapiq.

Qeveria e re malazeze është e para që prej tri dekadash është formuar pa Partinë Demokratike të Socialistëve (DPS) të Milo Gjukanoviqit, që u mund në zgjedhjet e 30 gushtit të këtij viti.

Në zgjedhjet e 3 gushtit, kryeministri i sapozgjedhur, si një person jopartiak, ishte bartësi i tri koalicioneve që fituan pushtetin, i cili përbëhet kryesisht nga Fronti Demokratik Pro-Serb, transmeton REL.

Kryeministri i sapozgjedhur, Krivokapiq, njoftoi para betimit, se Qeveria e tij përgjatë mandatit prej katër vjetësh, do të përfaqësojë zbatimin e demokracisë së drejtpërdrejtë.

“Ne, të gjithë duhet të ndërtojmë një të ardhme më të mirë, që qytetarët të ndihen më mirë dhe që Mali i Zi të transformohet në çdo kuptim. Kjo qeveri do të jetë shërbyese vetëm e qytetarëve. Kjo është Qeveria e viktimave, sepse kjo është mënyra e vetme për të filluar më të mirën e përbashkët. Të gjithë ministrat janë gjithashtu viktima për të gjithë. Ne gjendemi në një situatë ku çdo ditë është e çmuar. Gjëja më e rëndësishme është që fitorja e 31 deputetëve u shpreh sot, dhe kjo është fitorja e njerëzve dhe qytetarëve. Përjetoni këtë si një masë të së ardhmes sonë të re”, tha Krivokapiq para votimit.

Qeveria e re do të ketë një nënkryetar dhe 12 ministra.

Dritan Abazoviq nga URA, u zgjodh i vetmi nënkryetar, kështu që, meqenëse Aleksa Beçiq, nga demokratët u zgjodh më parë kryetar i parlamentit, tre udhëheqësit e koalicionit fitues zunë pozicionet kryesore në vend. Sigurisht, duke mos llogaritur pozicionin e kreut të shtetit, i cili i mbetet udhëheqësit të DPS-së, Milo Gjukanoviq, mandati i të cilit zgjat deri në 2023.

Qeveria e re u mbështet nga deputetët e partisë nga lista “Për Ardhmërinë e Malit të Zi”, e udhëhequr nga Fronti Demokratik, Mali i Zi Demokratik dhe Lëvizja Qytetare URA. Kundës qeverisë së re ishin partitë opozitare DPS, Socialdemokratët, Partia Social-Demokrate, dy parti kombëtare shqiptare dhe Partia Boshnjake.

Gjatë debatit përgjatë tri ditëve, kritika të shumta u bënë nga opozita ndaj programit dhe përbërjes së qeverisë së re dhe vetë kryeministrit, por edhe nga pjesa dominuese e shumicës parlamentare, e cila votoi pro-kabinetit të Krivokapiq.

Partitë e opozitës vlerësuan se Qeveria Krivokapiq është teokratike, e përbërë në Kishën Ortodokse Serbe (SOC), qe është monoteiste dhe mono-etnike, se nuk është qeveri e ekspertëve ose evropiane.

Megjithëse zgjedhja e tij u mbështet nga partitë e koalicionit fitues, kryesisht nga Fronti Demokratik, ata e kundërshtuan Krivkapiqin për mosndarjen e vendeve ministrore midis partive, sipas përqindjes së votave të fituara, duke besuar se ai me propozimin për t’i bërë ministrat persona relativisht të panjohur e pa përvojë politike, tradhëtoi votuesit.

Ministrat e rinj janë figura jopartiake.

Synimi i Krivokapiqit ishte të krijonte një qeveri të ekspertëve që do të përballej me problemet e akumuluara në Malin e Zi – duke e trajtuar gjendjen me COVID-19 dhe duke u përballur me pasojat e krizës ekonomike. Duke ulur numrin e ministrive në 12, kryeministri paralajmëroi racionalizimin e administratës shtetërore.

Shumica e ministrave janë të rinj me arsimim të lartë, relativisht të panjohur për publikun e gjerë, të paktën gjysma e të cilëve janë afër Kishës Ortodokse Serbe.

Me sugjerim të Kishës Ortodokse Serbe, Krivokapiqi ishte në krye të listës “Për Ardhmërinë e Malit të Zi”, e cila dominohet nga Fronti Demokratik Pro-Serb.

Me dy koalicionet e tjera civile të drejtuara nga Aleks Beqiqi i demokratëve dhe Dritan Abazoviç i Lëvizjes Qytetare URA (Veprimi i Bashkuar i Reformës), ata fituan një shumicë të ngushtë prej 41 nga 81 deputetët në parlamentin malazias në zgjedhjet e gushtit.

Me këtë, pas tri dekadash, ndryshoi Qeveria në Mal të Zi.

Tash e pesë vjet, në Kizhevak të Serbisë janë kërkuar mbetjet mortore të atyre personave që u vranë e u zhdukën gjatë luftës.

Një muaj më parë, prej kur është zbuluar kjo varrezë masive, me ndihmën e fotografimeve të Kryqit të Kuq, atje po qëndrojnë ekspertë nga Kosova të cilat kanë marrë pjesë gjatë procesit të zhvarrimit të mbetjeve mortore. Nga aty delegacioni i Kosovës, të premten ka bërë thirrje për mos-politizim, duke shtuar se ekzistojnë dyshime se ka edhe shumë varreza masive në territorin e Serbisë.

Komisioni për Persona të Zhdukur i Qeverisë së Kosovës ka vizituar sot lokacionin e varrezës masive në Kizhevak afër Rashkës, ku kryetari i delegacionit të Kosovës, Ibrahim Makolli, dhe ai i delegacionit të Serbisë, Veljko Odaloviq, kanë monitoruar nga afër gërmimet në këtë pjesë.

Kryetari i delegacionit të Kosovës theksoi se bazuar në deklaratat e udhëheqësve të Serbisë, dyshohet se ka edhe varreza tjera masive brenda territorit të Kosovës.

“Vetë ekzistenca e kësaj varreze masive këtu dëshmon për planifikimet nga ana e kreut të atëhershëm shtetëror në planifikimet e vrasjeve dhe zhdukjeve të njerëzve me qëllim të fshehjes së gjurmëve të krimit. Sikurse u tha, angazhimet nuk do të ndalohen deri në zbardhjen përfundimtare të fatit të të gjithë personave të zhdukur. Ne dyshojmë po ashtu në mbështetje të deklaratave të politikanëve në Serbi, që ekzistojnë edhe disa varreza masive brenda territorit të Serbisë, të cilat dyshohet se mund të ketë trupa të civilëve të vrarë, dhe të mbartur brenda këtij territori”, deklaroi ai.

Veç tjerash, ka theksuar se tash e pesë vjet janë duke punuar në lokalizimin e këtij vendi. Ndërkohë, shtoi se tash e dy dekada, po angazhohen që të gjejnë eshtrat e secilit person të zhdukur gjatë luftës në Kosovë. Ai ka treguar se gjatë kësaj kohe kanë hulumtuare dhe brenda territorit të Kosovës, ku është dyshuar për lokacionet me eshtra të civilëve shqiptarë.

“Është një proces jashtëzakonisht kompleks, dhe në këtë kuadër kërkojmë përpos angazhimit dhe mbështetjes së familjarëve të të zhdukurve, të cilët mund të na ofrojnë informata të besueshme përkitazi me lokacionet e mundshme, po ashtu edhe nga të gjitha ata të cilët mund të posedojnë ndonjë informatë të tilla, përmes së cilave mund të na mundojnë neve të lokalizojmë vendet ku mund të ketë persona të zhdukur”, theksoi ai.

Kryetari i delegacionit të Kosovës ka bërë thirrje edhe për mos-politizim të këtij procesi, meqë sipas tij, kjo çështje është humane dhe duhet trajtuar si e tillë.

“Këtë proces ta ruajmë nga politizimi, është një çështje krejtësisht humane dhe do ta trajtojmë si të tillë. Por, që natyrisht gjithë ata të cilët janë fajtor për vrasjen dhe zhdukjen e tyre, duhet të marrin dënimin nga drejtësia. Detyrë e jonë si grup punues, si autoritete është që të zbardhim fatin e personave të zhdukur, të identifikojmë dhe t’ua dorëzojmë familjarëve mbetjet mortore”, ka thënë Makolli para gazetarëve.

Makolli ka njoftuar se në këtë lokacion po qëndrojnë autoritetet e Kosovës, përfshirë ekspertët e mjekësisë ligjore të cilët që nga fillimi do të qëndrojnë aty për gjetjet në këto varreza.

Në Kizhevak afër Rashkës në Serbi janë gjetur mbetje mortore që dyshohet se janë të shqiptarëve të Kosovës. Ndërkohë, në territorin e Serbisë në katër lokacione janë zbuluar varreza masive me trupat e 941 shqiptarëve të vrarë në Kosovë më 1999.

Gjatë ditës për KosovaPress, drejtori i Institutit të Mjekësisë Ligjore të Kosovës, Arsim Gërxhaliu ka konfirmuar për KosovaPress se deri më tani kanë zbuluar pesë varreza.