Studimin e bërë për nevojat e Komitetit të Politikës së Jashtme të Parlamentit Evropian, ku thuhet se Qeveria e Albin Kurtit është rrëzuar nga “një operacion dezinformues amerikan”, e ka kritikuar edhe Partia Demokratike.

Zëdhënësi i kësaj partie, Avni Bytyçi, thotoë se përmes këtij raporti, është sulmuar Amerika përmes Lëvizjes Vetëvendosje dhe Albin Kurtit.

Bytyçi, thotë gjithashtu se “një gjë është e sigurt, ky raport i rrejshëm për PE që flet për dezinformim nuk e ka qëllim Kosovën, por Shtetet e Bashkuara të Amerikës”.

“Rusia dhe Kina në vazhdimësi kanë ndërhyrë në vende të ndryshme të botës përmes dezinformimit dhe lajmeve të rrejshme, duke përfshirë këtu edhe zgjedhjet në Amerikë. Qëllimi i këtij raporti ka qenë padyshim që përmes një rezolute me dënu rrëzimin e Qeverisë Kurti nga zyrtarët amerikanë përmes dezinformimit”, thotë Bytyçi përmes një shkrimi në Facebook.

Sipas Bytyçit, ata që janë prapa këtij raporti kanë gjetur edhe aleatë në Kosovë.

“Pra, Albin Kurti dhe Lëvizja Vetëvendosje këtu kanë qenë vetëm mjet për një qëllim më të madh. Për fat të keq, siç po duket nga përmbajtja ata që janë prapa këtij raporti kanë gjetur edhe aleat në Kosovë. E majta në Evropë, një pjesë e cila ndikohet e financohet nga Rusia, përmes këtij raporti kanë synuar që të përfshijnë e të akuzojnë qeverinë amerikane për rrëzimin e një qeverie legjitime demokratike. Metoda se si është bërë duke filluar me një raport, i cili pastaj trajtohet e formalizohet përmes një rezolute, është metodë e njëjtë që Rusia kishte bërë me raportin e Dick Marty në Këshillin e Evropës”, thotë Bytyçi.

Bytyçi, gjithashtu ka bërë thirrje që kryeministri Avdullah Hoti dhe Ministria e Jashtme të reagojë për këtë raport.

“Raporti që e lexuam sot është dezinformatë, megjithatë shteti i Kosovës duhet të reagojë. Kryeministri i vendit dhe MPJD duhet të reagojnë zyrtarisht përmes instrumenteve diplomatike. Është e vërtetë se Amerika nuk ka nevojë për mbështetjen tonë, mirëpo siç thotë norma jonë zakonore, në kanun, shtëpia e shqiptarit është shtëpi e Zotit dhe mikut. Në thelb, sot përmes këtij raporti, është sulmuar Amerika përmes Lëvizjes Vetëvendosje dhe Albin Kurtit. Ne nuk duhet të heshtim!”, shkruan Bytyçi.

Kryetari i Aleancës për Ardhmërinë e Kosovës (AAK), Ramush Haradinaj e ka cilësuar si të gabuar votimin e Gjykatës Speciale në Kuvendin e Kosovës.

Në një intervistë për OraNeës, ka thënë se këtë gjykatë, sipas tij, AAK në atë kohë s’e ka votuar, pasi që siç ka thënë Haradinaj, e njëjta do të duhej të ndodhej në Kosovë dhe jo në Hagë.

“Po, ka qenë gabim votimi i kësaj gjykate. AAK s’e ka votuar atë. Jemi zotu për të zbardhur e vërteta, kemi kërkuar që ajo gjykatë të jetë në Kosovë. Votimi i saj ka qenë gabim i Thaçit Veselit dhe PDK-së, pasi ata kanë pranuar me votu këtë gjykatë që ka shprehu direkt mos-besim në shtetin e Kosovës dhe për çka është zhvendosur jashtë vendit. Kosova ka mundur të votojë një gjykatë të tillë, por vetëm në Kosovë. Udhëheqësit atëherë u dorëzuan gabim”, ka thënë Haradinaj.

Ai ka thënë se kjo gjykatë s’duhet të luftohet politikisht, derisa ka shtuar se s’i frikësohet asaj.Haradinaj ka thënë se Kosovës është viktimë në këtë rast, teksa ka deklaruar se UÇK-ja s’ka kryer krime.

Një ditë pasi ish-presidenti Hashim Thaçi ka dhënë dorëheqje pas konfirmimit të aktakuzës nga Gjykata Speciale, një ngjarje e pazakontë ndodhi në Presidencë. Gazeta Sinjali mëson se pikërisht në këtë institucion të lartë shtetëror, një zyrtar i Agjencisë së Kosovës për Inteligjencë tentoi të ‘avullojë’ dokumente “Sekret” dhe “Top sekret” nga kasaforta e Presidencës.

Për këtë rast, U.D. e Presidentit, Vjosa Osmani e ka denoncuar në Prokurori këtë ndërhyrje të AKI-së, mëson Gazeta Sinjali.

Burime të Gazetës Sinjali brenda Prokurorisë kanë dhënë detaje nga denoncimi i U.D. Presidentit, Vjosa Osmani, lidhur me këtë rast.

Sipas të njëjtave burime, në denoncimin e Faton Pecit, këshilltar i Osmanit, i autorizuar për ta denoncuar këtë rast, thuhet se Osmani mori përsipër ushtrimin e detyrës së presidentit, më 5 nëntor dhe në proces të bartjes së përgjegjësive, pas një intervali kohor prej 24 orësh, ka qenë edhe bartja e kasafortës së sigurisë që përmban raportet e AKI-së dhe dokumente të tjera konfidenciale.

Sinjali merr vesh se më 6 nëntor 2020, sekretari i zyrës së Presidencës, fillimisht e kishte njoftuar stafin e U.D. Presidentit se EULEX-i do të bastis zyrat e Presidencës.

Burimet e Sinjalit bëjnë me dije se pas një njoftimi të tillë, U.D. e Presidentit e kishte kontaktuar ELEUX-in, të cilët e kanë mohuar se një gjë e tillë do të ndodhë, pasi nuk kishte urdhër për bastisje.

Por çfarë ndodhi kur zyrtari i AKI-së tentoi të hap kasafortën?

Sinjali merr vesh se përkundër justifikimit se kasaforta e sigurisë nuk duhet të jetë objekt i bastisjes, pa autorizimin e U.D. Presidentit dhe në kundërshtim me vendimin e saj, në prezencë të një zyrtari që është prezantuar nga sekretari i zyrës së presidencës si inspektor i AKI-së, kanë tentuar të hapin kasafortën e sigurisë.

Edhe pse në denoncimin e kabinetit të Osmanit thuhet se ftesa për AKI-në për të ndërmarrë një veprim të tillë është bërë pa njoftimin dhe autorizimin e U.D. Presidentit, zyrtari i AKI-së dhe një zyrtar tjetër i IT-së, kishin hapur kasafortën shkurtimisht dhe e kanë mbyllur përsëri.

Gazeta Sinjali mëson se për një veprim të tillë të zyrtarit të AKI-së, Osmani ka ftuar në takim shefin e këtij institucioni, Kreshnik Gashin, të cilit ia ka shprehur pakënaqësinë e saj për ndërhyrjen e paautorizuar.

Mirëpo arsyetimi që U.D. Presidentit, Vjosa Osmani, ka marrë në këtë diskutim të ashpër, ishte se ky është dokumentacion i AKI-së dhe mund ta tërheqim kurdo.

Tutje në denoncim thuhet se pasditen e datës 06 11 2020, kabineti i Osmanit, në koordinim me administratën dhe në prezencë të sekretarit të zyrës së Presidentit dhe stafit të tij kanë evidentuar materialet që ishin në kasafortë (duke evidentuar vetëm datat dhe numrat referent të klikove, ato që kishin) dhe pas një procesi të tillë është bërë ndërrimi i passwordit të cilin e posedon nga ajo ditë vetëm Vjosa Osmani.

Çfarë thonë nga Presidenca?

Gazeta Sinjali ka kontaktuar kabinetin e U.D. Presidentit më 27 nëntor për të marrë një konfirmim zyrtar se çfarë ka ndodhur atë ditë.

Në përgjigjen e tyre thuhet se: “Rastin në fjalë menjëherë e kemi denoncuar te organet e rendit, të cilat po merren me të. Kjo ka qenë ndërhyrje e paautorizuar dhe shkelje e protokollit të sigurisë. Meqë rasti po hetohet, nuk mund të japim më shumë detaje.”

Përveç zyrës së Osmanit, Sinjali ka dërguar pyetje edhe në AKI për të marrë vesh nëse është bërë apo jo koordinimi me Presidencën, për t’i tërhequr dokumentet e klasifikuara, por ende nuk ka marrë përgjigje.

Ndërkohë që Gazeta Sinjali ka mësuar se Prokuroria është në vazhdën e grumbullimit të provave dhe fakteve për të konstatuar nsëe kishte apo jo ndërhyrje të paautorizuar në kasafortën e të parit të shtetit dhe nëse tentimi për të zbrazur kasafortën nga dokumentet e klasifikuara ishte në përputhje me interesin shtetëror.

Kujtojmë që dokumentet e klasifikuara nuk janë pronë e AKI-së pavarësisht se ky institucion është një nga shtyllat më të rëndësishme të sigurisë në vend.

Kryetari i Lidhjes Demokratike të Kosovës, Isa Mustafa, e ka cilësuar manipulim një studim që ishte prezantuar në Parlamentin Evropian, e që thoshte se fenomeni i dezinformimit në Kosovë kishte pasur ndikime të drejtpërdrejta që çuan edhe në rënien e Qeverisë së Albin Kurtit.

Në një reagim për këtë studim, Mustafa ka thënë se do të kërkojë nga Partitë Popullore Evropiane sqarimet e nevojshme “për ta hedhur poshtë këtë ‘studim’ tendencioz dhe të motivuar ideologjikisht ndaj LDK-së”.

“‘Studimi’ i bashkëmendimtarëve të Albin Kurtit është manipulim! Disa bashkëmendimtarë të majtë evropianë të tashmë forcës kryesore politike të së majtës në Kosovë (Lëvizjes Vetëvendosje të Albin Kurtit), në një ‘studim’ që paskan bërë për efektin e lajmeve të rreme në politikëbërje, përfshirë edhe Kosovën, më paska “akuzuar” si prodhues të lajmeve të rreme me qëllim rrëzimin e qeverisë së koalicionit ndërmjet Vetëvendosjes dhe LDK-së!” ka shkruar ai në Facebook.

Mustafa ka thënë se LDK-ja i kishte dhënë “shans Vetëvendosjes për të punuar bashkërisht për të mirën e Kosovës”. Megjithatë, sipas Mustafës, LDK-ja s’mund të duronte nëpërkëmbjen e saj “e duke soditur Vetëvendosjen teksa po shkarkonte ministra të LDK-së duke e shkelur marrëveshjen dhe po rrezikonte partneritetin e Kosovës me SHBA-të”.

“Vetëvendosje, përveç që tentoi ta keqpërdorte partneritetin dhe konstruktivitetin e LDK-së, duke u kthyer në shtratin e saj ideologjik dhe gjenezën izolacioniste, filloi ta rrezikonte partneritetin e Kosovës me aleatët e saj kryesorë, para se gjithash me Shtetet e Bashkuara të Amerikës. LDK-ja nuk mund të duronte nëpërkëmbjen e saj nga një parti tjetër dhe taman puna të rrinte duke e soditur Vetëvendosjen teksa po shkarkonte ministra të LDK-së duke e shkelur marrëveshjen dhe po rrezikonte partneritetin e Kosovës me SHBA-të! Prandaj, LDK-ja reagoi. Dhe do të reagoj ndaj kujtdo në Kosovë që e quan veten aq të rëndësishëm e të fortë sa të shpërfillë thirrjet telefonike nga Shtëpia e Bardhë e Departamenti Amerikan i Shtetit. Që organizon fushata denigruese ndaj zyrtarëve amerikanë dhe Shtëpinë e Bardhë e portretizon si një vend ku copëtohet Kosova”, ka vazhduar ai.

Në fund Mustafa ka thënë se pret që ky studim “do të përfundojë si një përpjekje e dëshpëruar për manipulimin e së vërtetës”.

Në studimin e publikuar nga disa autorë evropianë, të porositur për nevojat e Komitetit të Politikës së Jashtme të PE (AFET), theksohet se i dërguari i SHBA-së për dialogun Kosovë-Serbi, Richard Grenell, kishte nxitur deklarime në Twitter që sugjeronin se trupat amerikane do të tërhiqeshin nga Kosova.

“Ambasadori Grenell vazhdoi ta mbante këtë kërcënim – i cili nuk ishte bërë nga asnjë zyrtar amerikan – në negociatat me partnerët e koalicionit të Kurtit, duke bërë që të ngrihej një mocion mosbesimi që rrëzoi Qeverinë Kurti. Kjo lëvizje gjerësisht është dënuar në Evropë, përfshirë edhe përmes një demarshi të përbashkët të ambasadorëve të Francës dhe Gjermanisë në Prishtinë. Ky shembull tregon se si një aktor i huaj ishte në gjendje të prodhonte një kërcënim krejtësisht të trilluar dhe në këtë mënyrë të shtynte drejt ndryshimit të qeverisë”, thuhet në studim.

Sipas pretendimeve në këtë dokument, të cilat janë bërë sipas analizës së mediave sociale, si mediat ashtu edhe politikanët u përfshin në këtë fushatë, të cilën studimi i identifikon si “kanale kryesore të dezinformimit në Kosovë”. Në dokument përmenden media të caktuara me ndikim në Kosovë, si dhe kryetari i Lidhjes Demokratike të Kosovës, Isa Mustafa, dhe (tani ish) kryetari i Partisë Demokratike të Kosovës, Kadri Veseli.

Më 25 mars, Kuvendi i Kosovës me 82 vota rrëzoi Qeverinë Kurti pas mocionit të ngritur nga partnerja e koalicionit, Lidhja Demokratike e Kosovës. LDK-ja argumentoi se deri te mocioni erdhi për shkak të pozicionimit “jokonstruktiv” të Kurtit karshi partnerëve, në veçanti SHBA-së. Qeveria Kurti ishte zgjedhur më 3 shkurt.

Sektori i Gastronomisë po kërkon mbulimin e pagave për punëtorët dhe qirave, së paku 40 për qind. Të njëjtit po kërkojnë ndihmë reale për bizneset, dhe zgjatjen e orarit të punës së kafiterive, meqë siç thonë ata, janë duke humbur shumë.

Kërkesa kanë edhe odat, ku sipas tyre shpërndarja e mjeteve nga pako e rimëkëmbjes ekonomike duhet të bëhet për veprimtaritë që gjatë kësaj kohe kanë qenë më të prekura.

Në seancën e djeshme, ka marrë fund ‘saga’ e projektligjit për Rimëkëmbje Ekonomike.

Atë e votuan 72 deputetë, ndërsa Lëvizja Vetëvendosje nuk morri pjesë fare në votim. Projektligji, përveç disa ndihmesave që parasheh për bizneset, përfshinë edhe mundësinë për tërheqje të 10 për qind të trustit pensional.

Veton Zuka nga Shoqata e Gastronomëve të Kosovës, thotë se tashmë kanë bërë një hulumtim për humbjet e vendeve të punës në këtë sektor. Përsërit edhe një herë se ky sektor është prekur shumë nga pandemia.

Ai përsërit se sektori i gastronomisë është prek shumë nga pandemia.

“Kërkesa është financimi i pagave, me u ndajt prej pagave për punëtorë. Financimi për qiratë, gjysma, eventualisht 40 për qind. Dhe përgjithësi qarkullimi i vitit të kaluar, me u bo qaj krahasim me ardhur diku deri në 75 për qind të qarkullimit të vitit të kaluar me u kalkulu në këtë vit, në mënyrë që me qenë ndihma reale për bizneset”, thotë Zuka.

Zuka për KosovaPress thekson edhe kërkesën për zgjatjen e orarit të punës, meqë sipas tij, janë duke u dëmtuar shumë.

“Kjo ndalesë e punës në minus të qarkullimit, në humbje në përgjithësi të bizneseve. Një nga kërkesat që ke edhe në takim me kryeministrin, ishte edhe përcaktimi i orarit, ose zgjatja e orarit. Sa do që është e mundur, se ne po e dimë edhe gjendjen qysh është edhe në spitale, dhe si është gjendja e COVID-it, por sido që të jetë ne me shtimin e masave edhe mirëmbajtjes së masave, të njëjtën kohë kemi kërkuar edhe zgjatjen e orarit. Tash është mbet edhe me vendos kryeministri edhe me komision edhe me IKShP në mënyrë që së paku po shpresojmë që ka me ndodhë edhe zgjatja e orarit”, shton ai.

E kryetari i Odës së Hotelierisë dhe Turizmit të Kosovës, Hysen Sogojeva për KosovaPress, thotë se duhet që sa më shpejt të fillojë implementimi i këtij ligji, në mënyrë që të lehtësohet gjendja e rëndë, e cila e ka kapluar vendin dhe shumë biznese.

“Kërkojmë që shpërndarja të jetë tek ato veprimtari qe kane qenë më të atakuara e jo tek ato që kanë punuar pothuajse gjatë gjithë kohës ose se paku nuk kanë pas kufizime. Besojmë qe me këtë ligj nuk do te ndikojnë sado ne përmirësimin e gjendjes, por ne si OHTK kërkojmë që të gjenden format qe qeveria te nëpërmjet kredive apo huazimeve kreditore të rrit këtë pako të rimëkëmbjes ekonomike”, ka thënë ai në një përgjigje elektronike.

Veç tjerash, Sogojeva thotë se ekzekutivi duhet të ndikojë në bankat, që interesin e kredive përveç ndalimit në kohë pandemie, kur të fillohet me ndalesa, mos të kërkohet që ndalesat të paguhen prej fillimit të pandemisë.

Kjo odë para disa ditëve kishte përmendur edhe protestat në rast se nuk miratohet ky projektligj, ndërkohë që ka paralajmëruar padi për qeverinë Hoti e Kurti. Kjo për shkak se sipas tyre, kanë marrë masa të cilat kanë qenë antikushtetuese.

Projektligji në fjalë kishte gjithsej 18 amendamente, katër nga Partia Demokratike e Kosovës.

Këto të fundit, parashikojnë që personave që tërheqin 10% nga Trusti Pensional, e të cilët kanë më pak se 10 mijë euro në këtë fond, shteti do t’ua rimbursojë shumën e tërhequr.

“Planprogramet shkollore nuk arrinin të realizoheshin edhe në ato orë të shkurtuara që mbanin fëmijët, e lërë tani që do të përfundojnë më herët”, thotë për Radion Evropa e Lirë, Ardiana Thaçi, nënë e tre fëmijëve, dy prej tyre nxënës në shkollë fillore.

Qeveria e Kosovës, për të parandaluar përhapjen e koronavirusit, ka marrë vendim që gjysmëvjetori i parë i vitit shkollor 2020/2021 të përfundojë më 18 dhjetor dhe gjysmëvjetori i dytë të nisë më 18 janar.

Në bazë të kalendarit shkollor, mësimi në Kosovë ishte dashur të përfundojë më 24 dhjetor dhe të nisë më 8 janar.

Ardiana thotë se ata që po pësojnë më së shumti nga vendimet e tilla janë fëmijët të cilët kanë shënuar ngecje në mësimnxënie.

Ajo thotë se do të dëshironte që dy gjysmëvjetor të përsëritej, pasi e konsideron si të dështuar.

“Në fakt unë jam e pakënaqur edhe me gjithë rrugëtimin e mësimit që është bërë në këtë kohë si ai online ashtu edhe mësimin në objektet shkollore. Unë kam dy fëmijë që janë në shkollë fillore dhe në këtë kohë sa kanë mësuar online ka pasur shumë vështirësi në përdorimin e shumë platformave”, thotë ajo.

“Për 30 minuta sa ka qenë e planifikuar mbajtja e mësimit, diku dhjetë minuta kanë humbur kohë duke i ndërruar platformat dhe duke tentuar të kyçen dhe ato 20 minuta sa ka mbetur për mësim, fëmijët shumë pak kanë mundur të shprehin mendimin e tyre, ndërkohë që vlerësimi i tyre tani do të bëhet nga ky mësim i ndjekur”, shton Ardiana Thaçi.

Qeveria nuk mori mendimin e prindërve

Ymret Reshitaj nga Këshilli i Prindërve të Kosovës, thotë për Radion Evropa e Lirë se ky veprim i qeverisë ka shkuar në dëm të fëmijëve.

Ai thotë se nuk u konsultuan nga Qeveria e Kosovës në marrjen e këtij vendimi, pasi që siç thotë ai, Këshilli i Prindërve do ta kundërshtonte.

“Ky veprim nuk është vendim i duhur, është veprim i pakonsultuar me prindërit. Si i tillë, nuk shkon në dobi të askujt, por në dëm të nxënësve. Ne vetëm sapo kemi mbyllur një vit ku pjesa më e madhe ka qenë mësim online, që nuk i ka plotësuar kriteret dhe po ashtu ishte filluar me vonesë dhe me orar të reduktuar”, thotë ai.

Rinor Qehaja, drejtor në Institutin për Studime të Arsimit “EdGuard”, thotë për Radion Evropa e Lirë se ndërprerja e procesit arsimor para kohe dhe stërzgjatja e pushimit në të njëjtën kohë, sjell në një situatë ku janë orë të shumta mësimore të humbura që vështirë se mund të kompensohen në qershorin e vitit të ardhshëm.

“Dëmi më i madh është shkaktuar karshi nxënëse. Ata kanë pësuar shumë në proces të proces të mësimnxënies. Kjo do të ketë pasoja afatgjate, qoftë në performancë akademike, qoftë profesionale”, thotë Qehaja.

Të përmbyllen planprogramet mësimore

Kryeministri i Kosovës, Avdullah Hoti ka kërkuar nga shkollat që t’i përmbyllin planprogramet e parapara për këtë gjysmëvjetor.

Kjo përmbyllje para kohe e planprogrameve shkollore, për Ymret Reshitajn nga Këshilli i Prindërve, është duke e shtuar presionin te mësimdhënësit dhe po ashtu është një presion edhe për nxënësit, që siç thotë, Reshitaj kjo mund të reflektojë në perfomancë negative.

“Nuk qëndron arsyeja se shkollat mund të ndikojë në rritjen e madhe të numrit të të infektuarve me koronavirus. Prej 830 shkollave në nivel të Kosovës, vetëm 40 janë mbyllur për shkak të rasteve dhe kanë kaluar në skenarin C, në mësimin online”, thotë ai.

Nuk mësohen të gjitha njësitë mësimore

Nga Sindikata e Bashkuar për Arsim, Shkencë dhe Kulturë (SBASHK), e cila ka përkrahur vendimin e qeverisë për përfundimin e gjysmëvjetorit para kohës së paraparë, thonë se nuk do të mund te mësohen të gjitha njësitë mësimore.

Kryetari i kësaj sindikate, Rrahman Jasharaj, tha për Radion Evropa e Lirë se njësitë të cilat nuk arrihet të mësohen, do të plotësohen në gjysmëvjetorin e dytë.

“Gjysmëvjetori i parë po mbyllet më herët, por besoj që kjo është bërë për të kujtuar shëndetin e nxënësve dhe mësimdhënëse dhe për të ulur numrin e të prekurve me COVID-19. Njësitë mësimore që kanë mbetur në këtë gjysmëvjetor do të gjenden mundësi të realizohen në të ardhmen”, thotë ai.

Edhe kryeministri i Kosovës, Avdullah Hoti në ditën kur ka marrë vendimin për përfundim të parakohshëm të gjysmëvjetorit të parë të vitit shkollor 2020/2021, ka thënë se këto ditë do të kompensohen në pushimin pranveror, që i bie të jetë në muajin prill apo në qershor.

Cilësia në arsimin në Kosovë, e dobët

Sektori i arsimit në Kosovë për vite me radhë është përballur me probleme të mëdha dhe pa përmirësim të duhur në fusha të caktuara.

Nxënësit në Kosovë, sipas një raporti të Bankës Botërore të publikuar në shtator të këtij viti, ishte theksuar se kanë ngecje të lartë në mësimnxënie.

Ky raport pati vënë në pah se një fëmijë që e fillon shkollën në moshën 4 vjeç, mund të presë që të kryejë 13.2 vjet shkollim deri në ditëlindjen e vet të 18-të.

Por, kur llogaritet mësimnxënia reale e fëmijëve, vitet e pritshme të shkollimit janë vetëm 7.9. Pra, sipas Bankës Botërore, ka një hendek të mësimnxënies prej 5.3 vjetësh.

Për cilësi të dobët në arsim, Kosova ishte alarmua për të dy herë me radhë edhe nga Programi për vlerësim ndërkombëtarë të nxënësve i njohur me shkurtesën ‘PISA’, në vitin 2019. Ky mekanizëm e pati radhitur Kosovën në vendin e 77 në mesin e 79 shteteve, të cilat i janë nënshtruar këtij vlerësimi, duke e radhitur të tretën nga fundi i listës.

Lëvizja Vetëvendosje nuk do të merr pjesë në tryezën e thirrur nga kreu i ekzekutivit, Avdullah Hoti për të biseduar për çështjen e presidentit, shkruan GazetaBlic.

Partia e Albin Kurtit fillimisht ka kërkuar që të ketë zgjedhje të reja nacionale, e më pas nga Kuvendi i ri të zgjidhet edhe i pari i shtetit.

Në një prononcim për GazetaBlic, zëdhënësi i VV-së, Përparim Kryeziu ka thënë se pozita e presidentit të Kosovës nuk ëshët e lirë, pasi që siç është shprehur ai, ajo pozitë ushtrohet nga u.d., e presidentit Vjosa Osmani, ashtu edhe siç e sheh Kushtetuta e Kosovës.

“Së pari, duhet bërë e qartë se pozita e presidentit nuk është vakante, pra nuk është e lirë. Ajo po ushtrohet nga u.d. e Presidentit, znj. Osmani ashtu siç e parasheh edhe Kushtetuta. Së dyti, përpjekja e koalicionit qeverisës për gjetjen e zgjidhjes për president, synim ka gjetjen e ilaçit për zgjatjen e jetës së qeverisë Hoti – qeveri kjo koti, morti e bankroti. Ajo nuk duhet të zgjasë as edhe një ditë tjetër. Së treti, qëndrimi ynë në raport me këtë temë është parimor. Ne besojmë që vendi së pari duhet të shkojë në zgjedhje të reja, të formohet kuvendi i ri, e nga aty të zgjedhet presidenti i radhës. Pra rrugëdalja është përmes zgjedhjeve të re, me një kuvend të ri e të rilegjitimuar, me kritere të dakorduara, për një figurë unifikuese për president”, ka thënë Kryeziu.

Kryeziu ka deklaruar se Kosovës, sipas tij, i duhet një president unifikues dhe jopartiak.

“Ndryshe, me një kuvend të vjetër me vullnet të deformuar politik, presidenti i radhës nuk ka se si mos të jetë vetëm pazar i partive të vjetra politike. Kurse ne besojmë që vendit i duhet një president jopartiak, e unifikues. Një president partiak e përçarës e kemi pasë deri së fundmi. Nuk besoj që kemi nevojë edhe për një të tillë”, ka thënë ai.

Ndërkohë, të enjten, kryeministri i Kosovës, Avdullah Hoti, ka thënë se shumë shpejt do të mblidhen në një tryezë të përbashkët e partive politike për të biseduar për çështjen e presidentit.

“Do të ndjekim vetëm një zgjidhje kushtetuese dhe unë besoj që shumë shpejt do të organizohet tryeza e partive politike për të parë disponimin e partive politike nëse ka disponim të diskutohet për të gjetur një zgjidhje për presidentin e vendit”, është shprehur i pari i Qeverisë.

Për këtë pozitë janë shpallur disa vetë-kandidatura, derisa këtë publikisht e ka thënë edhe kreu i AAK-së, Ramush Haradinaj, i cili njëkohësisht është edhe partner kryesor në Qeverinë Hoti.

Përkundër paralajmërimeve të kryeministrit Avdullah Hoti për tryezë politike për të gjetur pajtim për çështjen e presidentit, partitë politike janë ende larg një marrëveshjeje.

Në ditën kur janë bërë një muaj që kur Vjosa Osmani u bë ushtruese detyre e presidentes, partitë nuk shprehen as të gatshme që të iniciojnë në Kuvend procedurat për zgjedhjen e presidentit të ri.

Deputeti i Lidhjes Demokratike të Kosovës, Faton Bislimi, ka thënë për KP-në se koalicioni qeverisës s’ka ende një kandidat për president.

“Koalicioni qeverisës ende nuk ka kandidat për president. Ju e dini që ekziston tanimë një ftesë e kryeministrit Hoti për një tryezë me liderët partiakë në mënyrë që të dakordohen për mundësinë e zgjedhjes së presidentit. Shpresoj që liderët politikë të vendit do të gjejnë mundësinë më të mirë të mundshme që zgjidhja e presidentit të kryhet. E mandej nëse ka nevojë të shkohet në zgjedhje ne si LDK nuk i frikësohemi zgjedhjeve në asnjë moment”, ka thënë ai.

Por partneri tjetër i koalicionit qeverisës, Aleanca për Ardhmërinë e Kosovës, tashmë ka emrin e vet për president. Kryetari i saj Ramush Haradinaj është propozuar nga partia për postin e kreut të shtetit. Kjo parti megjithatë ende s’e sheh të arsyeshme të mbledhë nënshkrimet për të proceduar në Kuvend kandidaturën e tij. Kjo parti megjithatë është shprehur se s’pranon asnjë propozim tjetër, pos Haradinajt.

“Sa i përket procedurave është kushtetuese të merren tridhjetë nënshkrime. Por ne ende nuk kemi filluar, pasi nuk kemi një pajtueshmëri me subjektet tjera politike që janë në parlament. Pasi të dakordohemi dhe merremi vesh për kandidimin e zotëri Haradinaj për president ne do t’i mbledhim edhe nënshkrimet. Ne e kemi bërë të qartë që në fillim, ne 14 deputetët e AAK-së nuk votojmë asnjë kandidat tjetër për president. Do të vijë edhe koha kur do të ulemi dhe dakordohemi, ka një përafrim por jo aq sa mund të themi është e kryer puna. Shpresoj që ditët në vijim, apo javën e ardhshme të ulemi të gjitha subjektet politike që të bëjmë një zgjidhje”, ka deklaruar deputeti i AAK-së, Pal Lekaj.

Për presidentin aktualisht s’është duke menduar Lëvizja Vetëvendosje. Kjo parti thotë se në këtë legjislaturë s’mendon të propozojë ndonjë kandidat për postin e presidentit.

“Ne besojmë që Kuvendi si autoritet që bën përzgjedhjen e presidentit nuk mund të procedojë këtë çështje. Unë besoj që ky formacion i kuvendit ka devijuar nga vullneti i qytetarëve që ka dalë nga vota e 6 tetorit. Rrjedhimisht e konsiderojmë të papërshtatshëm votimin e presidentit në këto rrethana. Tash krejt çka dëgjojmë është propozime politike dhe partiake që nuk reflektojnë me kritere që duhet t’i plotësojë një person si presidenti që paraqet unitetin e popullit. Rrjedhimisht LVV-ja në këtë legjislaturë nuk mendon të procedojë një kandidat për president”, ka thënë deputeti i VV-së, Artan Abrashi.

Edhe në Partinë Demokratike të Kosovës thonë se në këtë parti aktualisht s’është diskutuar për këtë post.

Kryeministri Hoti ka kohë që ka paralajmëruar takim me liderët e partive politike javën e ardhshme për të gjetur një zgjidhje për presidentin. Që nga 5 nëntori në krye të shtetit si ushtruese e detyrës është Vjosa Osmani. Ajo mori detyrën pasi presidenti Hashim Thaçi dha dorëheqje për t’u përballur me Gjykatën Speciale në Hagë.