Jeton Demi nga Trusti i Kosovës ka dhënë sqarime lidhur me aplikimin për tërheqjen e 10-përqindëshit të mjeteve të kursyera në Fondin Pensional.

Duke folur për platformën e Trustit, ai ka thënë se është në hap me infrastrukturën e re dhe do t’i përballojë kërkesat e mëdha.

Demi ka thënë se sot ka pasur mbi 200.000 vizita brenda katër orësh.

Ai ka thënë se qëllimi nuk ka qenë për testim por për të promovuar web-faqen.

Përndryshe sipas tij, platforma ka qenë gati edhe më herët.

“Ne e kemi ndërtuar këtë platformë me kapacitetet tona. Këtë vit kemi marrë staf shtesë jo vetëm për këtë platformë por edhe projekte tjera. Prandaj platforma e krijuar është në frymën e teknologjisë së fundit. Informacioni i parë janë numri personal dhe numri i xhirollogarisë bankare. Besoj që jemi gati dhe në rregull për të premten, ne i kemi diskutuar afatet e hapjes së platformës”, ka thënë ai në Express Intervista.

Ai ka thënë se që prej kur është përmendur çështja e trustit, ka pasur rënie dhe ngritje të fluksit të njerëzve në institucion.

Sipas tij, prej dje ka pasur një numër të shtuar të njerëzve të cilat kanë shkuar fizikisht në zyrat e Trustit.

Demi ka thënë se do të ketë edhe video tjera vetëdijesuese dhe me instruksione shtesë të aplikimit.

“Me ligj është përcaktuar se kjo tërheqje lirohet nga tatimi. Ka pasur tentime për sulme kibernetike porse kanë qenë të pa suksesshme. Financimin nuk do ta kemi problem për ta menaxhuar”, ka thënë ai.

Ai ka thënë se çdo punëdhënës obligohet që nga paga të ndajë kontributet pensionale. Sipas tij, informacioni duhet detyrimisht të dërgohet në Administratën Tatimore porse sipas tij, ka shumë punëdhënës që kanë paguar tatimet por si kanë dhënë informacionet e punëtorit.

Duke folur për transferin e parave pas aplikimit, ai ka thënë se janë dy hapa. I pari aplikimi dhe autorizimi që paratë të kalojnë në bankë, dhe pastaj autorizimi i bankës për t’i kaluar paratë në xhirollogari.

Demi ka thënë se kanë marrë staf shtesë prej 8 punëtorësh duke shtuar se rreth 100 mijë llogari të reja janë hapur për gjashtë muaj.

Ministria e Shëndetësisë e Malit të Zi tha se shënimi i Kosovës me fusnontë në një dokument të sajin zyrtar ka qenë “gabim teknik”.

Më herët, në një nga dokumentet e para të Qeverisë së re të Malit të Zi dhe të Ministrisë së Shëndetësisë së këtij vendi, i cili u referohet masave të reja kundër pandemisë COVID-19, Kosova u shënua me fusnotë.

Yllin pranë emrit (Kosova*) e vendosin vetëm disa vende që ende nuk e kanë njohur shtetin e Kosovës.

Në të gjitha dokumentet e deritashme zyrtare të Qeverisë malazeze, Kosova është trajtuar në përputhje me vendimin për njohjen e pavarësisë së saj, përkatësisht pa yll në emër.

“Gjatë përgatitjes së tabelës me masat e reja kundër pandemisë COVID-19, ka ndodhur një gabim teknik, me ç’rast Kosova është paraqitur me fusnotë. Menjëherë pasi është vërejtur, shërbimet informative të Ministrisë së Shëndetësisë e kanë përmirësuar gabimin, gjë që mund të shihet edhe në ueb-faqen e Ministrisë së Shëndetësisë dhe në Gazetën Zyrtare të Malit të Zi”, thuhet në një deklaratë të shërbimit për shtyp të Ministrisë së Shëndetësisë.

Në krye të Ministrisë së Shëndetësisë në Mal të Zi është mjekja Jellena Boroviniq Bojoviq.

Qeveria e re e Malit të Zi, e udhëhequr nga Zdravko Krivokapiq, është zgjedhur më 4 dhjetor.

Ajo përbëhet nga tre koalicione dhe dominohet nga partia Fronti Demokratik.

Kjo e fundit, në të kaluarën, është zotuar se do ta tërheqë njohjen e Kosovës.

Qeveria e Malit të Zi e ka njohur pavarësinë e Kosovës disa muaj pas shpalljes së saj, në vitin 2008.

Zv/kryeministrja e Kosovës, Albulena Balaj-Halimaj, ka pritur në takim një delegacion të Odës së Hotelerisë dhe Turizmit të Kosovës, i kryesuar nga Hysen Sogojeva, kryetar i kësaj ode.

Ajo ka bërë me dije se kanë biseduar për vështirësitë më të cilat po përballet ky sektor shumë i rëndësishëm për ekonominë e vendit tonë. Pikërisht, hoteleria në Kosovë është biznesi më i dëmtuar nga pandemia covid-19.

“Në këtë takim, theksova përkushtimin e Qeverisë së Kosovës, për t’i dal në mbështetje të gjithë qytetarëve dhe bizneseve në këtë kohë të vështirë për të gjithë dhe se bashkë me ministrin e Tregtisë dhe Industrisë, Vesel Krasniqi, do t’i trajtojmë më prioritet kërkesat e tyre dhe do ta bëjnë më të mirën e mundshme në plotësimin e kërkesave të këtij sektori”, ka shkruar ndër të tjera Balaj-Halimaj.

Poashtu ajo ka theksuar se me hyrjen në fuqi të Ligjit për Rimëkëmbje Ekonomike bizneset dhe qytetarët do ta ndjejnë edhe më shumë dorën e shtetit.

Poashtu biseduam edhe për Ligjin e Turizmit dhe kërkesë e drejtuesve të Odës ishte që në ligj të përfshihet edhe Agjensioni Kombëtar i Turizmit.

“Sa i përket kërkesës për zgjatjen e orarit për festat e fundvitit, deklarova se Qeveria e Kosovës të gjitha masat që do t’i merr do të jenë në koordinim të plotë me ekspertët e kësaj fushe, këtë rast me Institutitin Kombëtar të Shëndetësisë Publike të Kosovës”, ka përfunduar zv-kryeministrja.

Një nga skandalet më të mëdha të pasluftës, mbetet vjedhja e 2.1 milionë eurove nga Thesari i Shtetit.

Teksa organet kompetente po kryejnë punën e tyre, përmes një reagimi të bërë në faqen zyrtare FB, Lëvizja Vetëvendosje, ka thënë se askush s’ka dhënë deri tash përgjegjësi e as dorëheqje.

Ky është reagimi:

Kur partitë e vjetra kthehen paligjshëm në pushtet, ato përligjin dhe inkurajojnë krimin e organizuar në vend. Kështu kjo qeveri e paligjshme fillimisht nuk e parandaloi, e tash edhe 43 ditë pas ka dështuar të japë edhe përgjegjësinë më të vogël për vjedhjen e organizuar të më shumë se 2 milionë eurove nga kuleta e shtetit.

Në vend se të forconte institucionet e drejtësisë, ajo e zhbëri procesin e vettingut. Në vend se të luftonte korrupsionin, ajo e zhbëri task forcën antikorrupsion. Në vend se t’i ndëshkojë shkelësit e ligjeve, ajo veçsa po i trimëron ata. Prandaj edhe në vend se të shtiret kinse po qeverisë, ajo duhet të shkojë.

Ushtruesja e detyrës së postit të presidentit Vjosa Osmani, i ka dekoruar me medaljen presidenciale “Post Mortem”, 18 profesionistë shëndetësorë, që humbën jetën në përballjen me virusin COVID-19.

Osmani ka thënë se kjo është mirënjohje e të gjithë qytetarëve ndaj atyre që duke respektuar betimin e Hipokratit bënë të pamundshmen në trajtimin e pacientëve të prekur me COVID-19.

“Përkushtimi i tyre ndaj vlerave humane dhe ndaj profesionit të tyre, si dhe sakrifica e tyre sublime në mbrojtje të shëndetit të pacientëve të tyre, është shenjë e vetëdijes më të lartë profesionale dhe njerëzore”.