Kryeministri i vendit, Avdullah Hoti, ka thënë se për çështjen e postit të presidentit të ri të Kosovës, do të merret vesh gjatë ditëve në vazhdim.

“Besoj që do të marrë udhë edhe kjo çështje. Sapo kanë ndodhur ndryshimet për shkak të aktakuzave nga Specialja. Besoj për disa ditë fillojmë bisedat me të gjithë spektrin politik, për të parë se si mund ta tejkalojmë këtë situatë.

Rruga kushtetuese është e gjatë. Do të insistoj që të përcillen të gjithë hapat kushtetues që të gjejmë zgjidhjen, që është më e mira për vendin”, u shpreh Hoti.

Zëvendëskryeministri Besnik Tahiri ka thënë se kësaj teme Qeveria duhet t’i jep zgjedhje.

Ai ka thënë se zgjidhja duhet të jepet më së largu nesër.

Tahiri iu ka përgjigjur protestuesve të cilët i kanë quajtur hajna, duke iu thënë “me iu shiku në sy secili jeni më hajna se unë”.

Ai pas reagimit të protestuesve ka kërkuar falje, duke thënë se “i vjen keq nëse dikush është ndier i ofenduar”.

Protesta është shpërndarë ndërkaq punëtorët janë njoftuar që greva do të mbahet në objektin kryesor të Telekomit duke filluar nga sot. Ndërkaq në regjione greva do të nis nesër nga ora 08:00.

Gjendja ekonomike në gjithë botën është rënduar që pas shfaqjes së pandemisë COVID-19. Edhe në Kosovë, efekti i pandemisë ndikoi që shumë sektorë të destabilizohen. Numri i të papunëve u rrit, e u shtuan edhe rastet sociale.

Sipas të dhënave që KOHA ka siguruar nga Agjencia e Statistikave të Kosovës, këtë vit janë regjistruar 92.352 më shumë punëkërkues se vitin e kaluar, për periudhën janar-shtator.

Deri në shtator të 2019-ës ishin regjistruar 105.711 punëkërkues, ndërkaq për periudhën e njëjtë këtë vit janë regjistruar 198.063 punëkërkues.

Për të njëjtën periudhë vitin e kaluar në këtë kategori të regjistruara ishin 46.562 gra dhe 59.149 burra, ndërkaq në vitin 2020 janë 89.343 gra dhe 108.720 burra.

Përfaqësues të sektorit privat, që nga fillimi i pandemisë kanë shprehur shqetësimin e tyre lidhur me gjendjen financiare. Ndër sektorët më të zëshëm, është gastronomia. Ata kanë protestuar, duke u shprehur kundër masave të cilat Qeveria ka marrë në përpjekje të parandalimit të shpërndarjes së koronavirusit, e për të cilat kanë thënë se po e vështirësojnë veprimtarinë e tyre.

Qeveria ishte zotuar se përmes Ligjit të Rimëkëmbjes do t’u dalë në ndihmë bizneseve, por ky projektligj nuk po gjen mbështetje nga anëtarët e ekzekutivit. Vetëm për lexim të parë, këtij projektligji i është dashur të kalojë gjashtë herë në Kuvend, për t’i marrë votat e nevojshme herën e shtatë. Porse përkrahje nuk po gjen as në leximin e dytë, madje ka dështuar të votohet edhe në Komisionet parlamentare.

Odat ekonomike kanë insistuar që ky projektligj të kalojë, në mënyrë që bizneset të gjejnë mbështetje financiare te Qeveria.

KOHA më herët ka raportuar se që nga marsi e deri në qershor, për shkak të efekteve negative të pandemisë, është rritur edhe numri i familjeve të cilat i janë shtuar skemës sociale. Për këtë periudhë kësaj kategorie i janë shtuar 417 familje.

Situata e rënduar ekonomike si pasojë e pandemisë së koronavirusit ka ulur kërkesat për kredi në Kosovë dhe ka shkaktuar rënie te sektori i sigurimeve. Megjithatë, në kohë pandemie “shpëtimi” u gjet te diaspora që ka rritur ndjeshëm remitencat. Përgjatë këtyre muajve, në Kosovë nga mërgimtarët janë dërguar 400.5 milionë euro.

Që nga marsi e deri në korrik, afro 550 milionë euro është shuma e kredive që janë marrë nga qytetarët, bizneset e ndërmarrjet në Kosovë. Kjo shifër, megjithatë, është më e ulët se ajo e vitit të shkuar për rreth 130 milionë euro. Më 2019, në periudhën e njëjtë ishin dhënë mbi 680 milionë euro kredi në Kosovë.

Deklaratat e opozitës së do të nisin mocion për rrëzimin e Qeverisë Hoti, nuk po i bëjnë përshtypje ministrit të Punëve të Brendshme, Agim Veliu.

Veliu në një bisedë për Gazeta Blic, u drejtohet opozitarëve me fjalët: kurdo që t’i siguroni votat, sjellna mocionin në Kuvend dhe rrëzone Qeverinë.

Në deklaratën e tij, Veliu injoron deputeten Mimoza Kusari – Lila, për të cilën thotë se nuk ia vlen të merret.

“Me deklarata të Mimoza Kusarit nuk ia vlenë me u marrë. Nuk më intereson mu ajo punë fare a i ka votat opozita a si ka, kur t’i kanë votat le ti çojnë në Kuvend. Kuvendi vendosë”, tha Veliu për Gazeta Blic.

Gjatë ditës, deputetja opozitare, Mimoza Kusari-Lila, deklaroi se kur të vijë mocioni i mosbesimit në Kuvend, shumica do të votojnë pro rrëzimit të Qeverisë, duke shtuar se vetëm disa deputetë të LDK-së, do të votojnë kundër.

“Natyrisht se mbetet aktuale kërkesa jonë për mbledhjen e nënshkrimeve për rrëzimin e qeverisë apo mosbesimin e Qeverisë Hoti. Por do të rishikohet në javët në vijim ripozicionimi ynë si Grup Parlamentar, në kuptimin e organizimit dhe marrjes së mbështetjes dhe nga deputetë të tjerë të gatshëm për të rrëzuar Qeverinë Hoti. […] Nuk mund të mohoj, as pohoj në këtë moment dhe këto rrethana.

Por besoj që mund të ketë mjaftueshëm deputetë të shumicës shqiptare, por edhe pakicave të tjera për të ftuar seancën fillimisht, e më pastaj për të votuar mocionin e mosbesimit për Qeverinë Hoti. Po mendoj se kur arrihet ajo pikë mund të mbeten vetëm disa deputetë të LDK-së që do të mbështetin këtë qeveri, ashtu siç po shihet dallimet po thellohet edhe ndërmjet partnerëve qeverisës, por edhe partitë që e kanë mbështetur”, kishte thënë Kusari-Lila.