Gjatë një takimi me qytetarë në Zhur të Prizrenit, kandidati i Lidhjes Demokratike të Kosovës (LDK) për kryeministër, Avdullah Hoti, ka thënë të premten se qeveria e tij e ka menaxhuar me sukses pandeminë dhe ka ndalur abuzimet e blerjes së maskave nga 7 euro nga qeveria e mëparshme.

“Kur e morëm në qershor detyrën kishte pesë muaj që kishte filluar pandemia. Nga shkurti deri në qershor nuk ishte ndërmarrë asnjë veprim për të menaxhuar pandeminë dhe për të ruajtur ekonominë, me përjashtim të ndalimit të qarkullimit. E riorganizuam sistemin tonë shëndetësor, kemi krijuar shtretër në të gjitha spitalet regjionale, kemi integruar komunat dhe qendrat e mjekësisë familjare, kujdesin për pacientë nëpër shtëpi, blerjen e aparaturave shtesë për testime, blerjen e maskave, jo nga 7 euro, por 38 centë”, tha kryeministri Hoti.

Ai shtoi se gjatë këtij muaji do të vijnë në Kosovë vaksinat kundër Covid-19, ndërsa qytetarët dhe ekonomia do t’i kthehen normalitetit.

Kryeministri prezantoi planin e tij ekonomik.

“Kemi hartuar program konkret zhvillimor për Kosovën. Zhvillimin ekonomik nëpërmjet mbështetjes së sektorit privat që gjeneron punë e punësim. Luftimin e krimit të organizuar dhe korrupsionit, dhe Integrimin euro-atlantik të atdheut tonë, Republikës së Kosovës”, shtoi Hoti.

Ai tha se ndryshe prej populizmave të oponentëve tanë politikë, programi ynë mbështetet në ekspertizë.

“Mos u mashtroni me premtime elektorale për rritje pagash e pensionesh. Ato premtime janë të pa bazuara në ligj dhe janë të pamundshme. Vetëm programi ynë mundëson rritjen e pagave e pensioneve. Sepse vetëm programi ynë garanton rritje ekonomike. Rritjen e pagave ne do ta bëjmë çdo vit, mbi bazën e rritjes ekonomike të Kosovës”, shtoi Hoti.

Ministria e Shëndetësisë ka bërë të ditur se ka ndërruar rangimi i komunave sipas zonave.

Sipas njoftimit në zonë të kuqe janë Prishtinë, Fushë Kosova, Suhareka dhe Zveçani.

Ndërsa në zonë të verdhë, hynë Lipjani, Obiliqi, Vushtrria,Prizreni, Peja, Gjakova, Podujeva, Ferizaj, Mitrovica e Jugut dhe Mitrovica e Veriut.

Kurse në zonë të gjelbër janë Vitia, Rahoveci, Gjilani, Dragashi, Drenasi, Istogut, Klina, Skenderaj, Deçani, Kamenica, Malisheva, Juniku, Kaçaniku, Kllokoti, Leposaviqi, Zubin Potoku, Mamusha, Novobërda, Hani i Elezit, Parteshi, Ranillugu, Shtërpca, Graçanica dhe Shtimja.

Kryeministri në detyrë, Avdullah Hoti, ka zhvilluar një tubim në Dragash në kuadër të fushatës nga ku premtoi se do të mbështesë këtë komunë në rast se i fiton zgjedhjet më 14 shkurt.

Përveç kësaj, Hoti premtoi se ushtria e Kosovës do të jetë pjesë e ushtrisë amerikane me misione paqeruajtëse dhe viti do të përmbyllet me liberalizim të vizave.

“Kur e kemi marrë qeverinë e kemi gjetur shtetin të bllokuar, me sanksione nga Amerika dhe në fund të vitit pas gjashtë muajve, ne e kemi mbyllur vitin me një vendim të madh që ushtria e Kosovës me qenë pjesë e ushtrisë amerikane në misione paqeruajtëse. Këtë fat e kemi pasur ne njerëzit e LDK-së me e përmbyll një vizion 30 vjeçar”.

“Nuk ka qenë e lehtë më i hapë gjithë ato dyer që i kemi gjetur të mbyllura por tash jemi para proceseve të tjera. Vizionin për katër vitet e ardhshme. I ftoi kandidatët tjerë ta bëjnë të njëjtën gjë. Të dalin në debate, të përballemi me njëri-tjetrin, por është e pamundur. Asnjëri prej tyre s’ka guxim me u ul në tavolinë dhe me na dëgju dhe pastaj qytetarët me vendos me mendje të vet më 14 shkurt”.

Sipas Hotit, kandidatët e tjerë nuk kanë çfarë të ofrojnë pasi siç thotë ai, nuk kanë program, vizion e as ide.

“Tani është e qartë që këta nuk kanë çfarë të ofrojnë. As program, vizion e as ide. Njëri prej këtyre të kuqve, kur e pyetën çka do bësh ti, tha do t’i anuloj disa vendime të Hotit. Këtij nuk do t’i vijë rendi kurrë më me qeverisë. Një herë ne ia kemi dhënë rendin, LDK ia dha mundësinë dhe për 52 ditë e shkeli kushtetutën dy herë”.

“Nuk ka kush që i lëviz vendimet tona, nuk ka kush që i lëviz vendimet për t’i ndihmuar qytetarët, për të vendosur rregull, rend dhe disiplinë, të luftojmë korrupsionin, krimin. I njëjti brumë janë ata, të gjithë janë njësoj. Në këto zgjedhje janë dy opsione, LDK dhe vizioni i saj dhe këta të tjerët që nuk ofrojnë asgjë. Një listë me njerëz me ekstremizmat e mundshme e telashe, plot hipoteka të të kaluarës”.

“Tash kemi plane të rëndësishme dhe të fuqishme, për të fuqizuar ekonominë, qytetarët, marrëdhëniet me ShBA. Do punojmë shumë që të mbështesim blegtorinë në veçanti, programi jonë i bujqësisë është i jashtëzakonshëm, kemi dyfishuar subvencionet për bujqësi dhe blegtori. Do ta mbështesim turizmin malor. Kemi me i mbështet qendrat e skijimit. Ky regjion me disa vite me projektet që kemi për këtë zonë dhe zonat e ngjashme”.

Ndër të tjerash, Hoti u shpreh i bindur se këtë vit do të përmbyllet me liberalizimin e vizave.

“Kemi me përmbyll këtë vit me liberalizim të vizave, jam i bindur. Ne jemi duke punuar me vendet e BE-së me qeveritë e tyre duke i bindur që ne jemi ata që e fuqizojmë ligjin, ata që e luftojnë korrupsionin. Jemi njerëz që kemi vizion të qartë, njerëz që i nënshtrohemi vetëm ligjit dhe kushtetutës. Me besimin në Zot, pa ndërtuar kule, pa iu nënshtruar individit por duke iu nënshtruar ligjit, kushtetutës dhe vizionit kah duhet të shkojë ky vend. Jam i privilegjuar që i prijë një liste të jashtëzakonshme të burrave dhe grave në listë”, tha Hoti.

Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, janë testuar gjithsej 1.951 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 284 raste pozitive.

Brenda 24 orëve janë raportuar 5 raste të vdekjes me SARS CoV-2 pozitiv. Rastet e vdekjes janë nga komunat: Dragash 1 rast (81 vjeç), Mitrovicë 1 rast (73 vjeç), Obiliq 1 rast (86 vjeç), Pejë 1 rast (83 vjeç) dhe Podujevë 1 rast (67 vjeç).

Numri total i rasteve pozitive është 61.688 raste nga 244.950 persona të dyshimtë në virusin SARS-CoV-2 dhe 1.519 raste të vdekjes.

Gjatë 24 orëve të fundit, janë shëruar 224 pacientë derisa numri i përgjithshëm i të shëruarve deri më sot është gjithsej 53.455 raste, kurse numri i rasteve aktive është 6.714.

Rastet pozitive janë nga komunat: Prishtinë 112 raste, Pejë 29 raste, Prizren 21 raste, Ferizaj 19 raste, Gjakovë 12 raste, Fushë-Kosovë 10 raste, Gjilan 10 raste, Mitrovicë 10 raste, Podujevë 10 raste, Suharekë 8 raste, Deçan 6 raste, Kaçanik 5 raste, Vushtrri 5 raste, Istog 4 raste, Lipjan 4 raste, Kamenicë 3 raste, Klinë 3 raste, Rahovec 3 raste, Drenas 2 raste, Mamushë 2 raste dhe nga një rast komunat Graçanicë, Junik, Malishevë, Obiliq, Skenderaj dhe Viti.

Kandidatja e Lëvizjes Vetëvendosje me numër 66 gjatë ditës së sotme së bashku me kryetarin Haskuka kanë vizituar bizneset prodhuese të komunës së Prizrenit.

Postimi i plotë:

Bashkë me kryetarin e Komunës së Prizrenit, Mytaher Haskuka, me përfaqësuesit e prodhimeve dhe bizneseve vendorë, diskutuam për problemet e tyre gjatë zhvillimit të biznesit, e që kërkojnë zgjidhje urgjente.

Prodhimet dhe bizneset vendore, gjatë qeverisjes sonë do të përkrahen si asnjëherë më parë, ngase vetëm në këtë mënyrë mund ta zhvillojmë ekonominë e vendit.

ARTIKULL I SPONZORIZUAR