Në ditën e zgjedhjeve, Komisioni Qendror i Zgjedhjeve do të angazhojë 104 ekipe mobile, të cilat do të shkojnë në shtëpitë dhe banesat e qytetarëve me të drejtë vote, të cilët për shkak se janë të prekur nga Covidi-19 nuk do të mundet të shkojnë në vendvotimin e tyre.Zëdhënësi i KQZ-së, Valmir Elezi, ka shpjeguar se secili ekip do të përbëhet nga 4 anëtarë, tre prej të cilëve janë përfaqësues të subjekteve politike, ndërsa anëtari i katërt do të jetë zyrtar shëndetësor.

“Komisioni Qendror i Zgjedhjeve gjatë ditës së diel, do të angazhojë gjithsej 104 ekipe mobile, pra të cilat do të dalin në terren, do të shkojnë në adresat e qytetarëve me të drejtë vote, por të cilët fatkeqësisht janë të infektuar me COVID-19 dhe që nuk do të mund të shkojnë në vendvotimin e tyre për shkak të masës kufizuese, sepse pra duhet të qëndrojnë në karantinë shtëpiake. Pra, janë gjithsej 104 ekipe lëvizëse që do të shkojnë nga njëra adresë në tjetrën dhe secila prej tyre përbëhet nga 4 anëtarë”.

“Numri i përgjithshëm i personave që përbëjnë ekipet mobile janë 416, të cilët gjatë ditës së zgjedhjeve do të angazhohen vetëm për realizimin e votimit për këtë kategori të votuesve. Secili ekip mobil përbëhet nga 4 anëtarë, 3 do të jenë përfaqësues të subjekteve politike, ndërsa anëtari i katërt është zyrtar shëndetësor me qëllim të këshillimit profesional të këtyre ekipeve të KQZ-së”, tha Elezi për EO.

Elezi ka thënë se është obligim kushtetues i KQZ-së që edhe këtyre qytetarëve t’u krijohet mundësia për të votuar, pavarësisht rrethanës që ndodhen.“Natyrisht se ne jemi të vetëdijshëm se ajo çfarë është me rëndësi për këta qytetarë është shëndeti dhe sigurisht se KQZ-ja uron që ta kalojnë sa më lehtë këtë sfidë, por është edhe obligim kushtetues i KQZ-së për t’u ofruar mundësinë këtyre qytetarëve që të shfrytëzojnë të drejtën e tyre kushtetuese për të votuar në ditën e zgjedhjeve”, u shpreh Elezi.

Më tej, ai ka bërë të ditur se këta qytetarë do të kontaktohen përmes telefonit për t’u treguar lidhur me shërbimin që e ofron KQZ-ja dhe pastaj është në vullnetin e tyre për të marrë pjesë në votim përmes ekipeve mobile.“Komisioni Qendror i Zgjedhjeve është në komunikim të vazhdueshëm me institucionet shëndetësore që merren me menaxhimin e pandemisë. Jemi duke pranuar listat zyrtare nga ta dhe qytetarët të cilët kanë të drejtë vote po i kontaktojmë përmes telefonit dhe po u bëjmë të ditur për shërbimin që ofron KQZ-ja, pra për t’u mundësuar votimin atyre përmes ekipeve mobile në shtëpitë e tyre. Natyrisht se është në vullnetin e tyre që të pranojnë ose jo të marrin pjesë në procesin zgjedhor”, tha Elezi.

Organizata Jo Qeveritare “Ngritja e Zërit”, ka dorëzuar për herë të nëntë dosjet e radhës në Gjykatën Kushtetuese rreth vlerësimit të kushtetutshmërisë së aktit juridik të Gjykatës Supreme, me rastin e refuzimit të padive për kompensimin e dëmeve të luftës.

Drejtori i kësaj organizate Jahir Bejta, tha se tash e sa vjet gjykatat nuk po shqyrtojnë paditë për kompensim dëmeve të luftës me arsyetimin që nuk janë kompetente.Por që sipas tij, kjo nuk qëndron, ngase krimet e kryera gjatë luftës së fundit kanë ndodhur në territorin e Kosovës.

“Sot për herë të nëntë jemi dukeni dorëzuar dosjet për vlerësimin e kushtetutshmërisë të aktvendimit të Gjykatës Supreme”.“I kisha pyetur pretendentët për kryetar të shtetit dhe kryeministër i preferoj që krimet e luftës t’i përfshijnë në programet e tyre politike. Deri me tani kemi dorëzuar 120 dosje, ndërsa gjatë ditës së sotme vetëm tre”.Ai ka thënë se kjo nuk do të jetë hera e fundit që do të dorëzojnë dosje derisa të marrin një përgjigje pozitive/EO

Departamenti special i Gjykatës Themelore i ka shqiptuar masën e detyrueshme të trajtimit psikiatrik në Institutin e Psikiatrisë Forenzike, Murat Jasharit në rastin “Syri Popullit”.

Por për dallim prej vendimit të parë ku trupi gjykues kishte marrë vendim që Murat Jashari të qëndronte për trajtim për 10 vjet, kësaj radhe masa e trajtimit psikiatrik do të vazhdojë bazuar në rekomandimet e ekspertëve të institutit.

Ish-deputeti i Lidhjes Demokratike të Kosovës, Haxhi Avdyli, ka vazhduar betejën me kryetarin e ish-partisë së tij, Isa Mustafën. Në një reagim në Facebook, kandidati për deputet nga lista VV-“Vjosa”, ka thënë se në zgjedhjet e 14 shkurtit “votuesi i LDK-së ka shans ta dërgojë në pension Isa Mustafën”.Një ditë pasi Mustafa fyeu kundërshtarët dhe ata që kritikuan partinë e tij në studio televizive, Avdyli i është kundërvënë Mustafës duke e quajtur “politikan të papërgjegjshëm, intrigant, shpifës, manipulator, tinëazar, e jolegjitim”.

“Ku është Isa Mustafa. Ai tani rri i qetë diku, pa qarë kokën, derisa të tjerë kërkojnë votën për të. Ai s’është në lista për deputetë, por më 15 shkurt ai dhe një grup pa legjitimitet, ka rrezik prapë ta marrin në dorë fatin e një populli të tërë, siç e morën në vitin 2019 duke torturuar një opinion të tërë me negociata pa fund për postin për President për vete. Prandaj më 14 shkurt duhet të dalim #KREJTdheDREJT në zgjedhje për ta shpëtuar Kosovën nga ky politikan që fatin e vendit e rrezikon për interesa puro personale. Më 14 shkurt pas 40 vite karrierë votuesi i LDK-së ka shans me votë të dërgojë z. Mustafa në pension, duke mos lënë Kosovën e ngulfatur nga ai. S’ka dyshim që në mes 110 kandidatëve në LDK njoh plot djem e vajza të mira që meritojnë votën por me 15 shkurt ata që mund të zgjidhen s’vendosin asgjë as për koalicionet, as politika e mëdha për vendin. Vendos Isa me një grup të panjohur, krejt bazuar në interesa të tyre grupore”, ka shkruar Avdyli.

“Prandaj VOTA masive për ndryshim, krijon premisa për shpëtimin e LDK-së, por mbi të gjitha Kosovës nga politikanë të papërgjegjshëm, intrigant, shpifës manipulator, tinëzar, e jolegjitim si Isa Mustafa. Vota masive #KrejtdheDrejt127 është parakusht për QEVERI STABILE reformuese e zhvillimore, para një destabiliteti institucionale e politik, për teke të një njeriu që karrierën është dashtë ta mbyllë në vitin 1989 kur populli Kosovës shkeu librezat e Lidhjes komuniste e jo në vitin 2021 kur Kosova ballafaqohet me shumë sfida. Kosova si ka borxh atij as askujt, po ai i ka borxh shumë qytetarëve brenda dhe jashtë i cili gëzoi tërë privilegjet nga vitet 80, pastaj në vitet 90 duke menaxhuar 3%, duke mbajt tërë pozitat e duke humbur të tëra në zgjedhje. Ai ka përgjegjësi direkte që mbajti në pushtet disa parti tjera që ishin përgjegjëse për keqqeverisje e zhvatje”, ka vazhduar Avdyli teksa ka shtuar që populli “ka kohë edhe pesë ditë për të vendosur për një Kuvend e Qeveri stabile që s’varet nga ambiciet e sëmura nga politikanë të së kaluarës”.

Një 33-vjeçar shqiptar është arrestuar nga policia italiane, i akuzuar për trafikim të lëndëve narkotike.Shqiptari është kapur në Varese me 55 kg kokainë. Fillimisht policia ka dyshuar pasi ai po lëvizte në një zonë që ishte në izolim.

Policia e ka ndjekur shqiptarin dhe pasi e kanë ndaluar efektivët kontrolluan automjetin dhe gjetën tre çanta të mbushura me pako të mbështjella të cilat përmbanin pluhur të bardhë.

Pluhuri rezultoi të ishte kokainë, e ndarë në pesëdhjetë pako. Logoja e “koronavirusit” ishte shtypur në pako, me një karikaturë që përshkruante molekulën e virusit./lapsi.al

Bashkimi Evropian ka rënë dakord me Pfizer dhe BioNTech për të shpërndarë 300 milionë doza shtesë të vaksinës së tyre COVID-19, tha sot një zëdhënës i Komisionit Evropian.

BE siguroi 300 milionë doza të vaksinës Pfizer në nëntor të vitit të kaluar dhe njoftoi një marrëveshje paraprake për 300 milionë doza të tjera më 8 janar, e cila parashikon mundësinë e diskutimit të kushteve të kontratës së re.“Komisioni miratoi një marrëveshje të re sot,” i tha një zëdhënës Reuters.

Zyrtari i përfshirë në bisedimet me Pfizer tha se sipas marrëveshjes së re, vendet e BE-së kanë porositur tashmë 200 milionë doza që do të dorëzohen këtë vit, ndërsa bisedimet mbi afatet për 100 milionë dozat e tjera janë ende në proces.“Bisedimet me Komisionin Evropian janë duke u zhvilluar,” tha një zëdhënës i Pfizer për Reuters, ndërsa një zëdhënës i BioNTech nuk pranoi të komentonte./Top Channel/

Avokati i Popullit ka shprehur shqetësimin e tij lidhur me zbatimin selektiv të masave të qeverisë për parandalimin e pandemisë COVID-19, gjatë fushatës zgjedhore për zgjedhjet e parakohshme 2021.Avokati i Popullit përmes një reagimi për media ka theksuar se ka vërejtur se që nga fillimi i fushatës parazgjedhore nuk janë respektuar masat antiCOVID nga ana e partive politike ndërsa në anën tjetër institucionet që kanë për obligim t’i zbatojnë këto masa nuk kanë reaguar.

“Ky është një standard i dyfishtë që nuk mund të tolerohet dhe cenon barazinë e qytetarëve para ligjit. Përveç kësaj, Avokati i Popullit shpreh shqetësimin e tij për rrezikimin e jetëve të qytetarëve për mos respektim të masave. Avokati i Popullit edhe njëherë rithekson obligimin që kanë të gjitha institucionet dhe partitë politike që të respektojnë masat për parandalimin e pandemisë ndërsa fton autoritetet kompetente që të ndërmarrin veprime konkrete për respektimin e këtyre masave nga subjektet politike“, thuhet në reagim.

Avokati i Popullit më tej ka theksuar se bazuar në ankesat që ka pranuar nga qytetarët që ndërlidhen me procesin zgjedhor e që kryesisht kanë të bëjnë me verifikimin e aplikacioneve jashtë vendit, vështirësitë për shkarkim të formularëve të fletëvotimeve nga ëeb faqja e Komisionit Qendror të Zgjedhjeve (KQZ), mos përfshirja e qytetarëve me të drejtë vote në listën e votuesve, si dhe mospranimi përmes emailit të ankesave nga Paneli Zgjedhor për Ankesa dhe Parashtresa (PZAP).
“Po ashtu, kërkesë e veçantë e votuesve jashtë vendit ka qenë mundësia që të shtyhet afati për pranimin e votave të dërguara me postë. Lidhur me këto ankesa, Avokati i Popullit i bënë thirrje KQZ-së ti shqyrtojë ato me qëllim që askush të mos privohet nga e drejta për të votuar.

Për krejt këto shqetësime e me qëllim të përmbushjes së mandatit kushtetues, Avokati i Popullit është mobilizuar që të monitorojë procesin zgjedhor dhe me këtë rast njofton të gjithë qytetarët e Republikës së Kosovës se zyra kryesore dhe ato rajonale do të jenë të hapura në ditën e zgjedhjeve ku do të pranohen ankesat në rast të parregullsive që cenojnë të drejtën e votës së lirë.
Zgjedhjet janë të rëndësishme për vendin prandaj është në interes të të gjithëve që këto zgjedhje të jenë të lira e demokratike“, thuhet në reagim.