Komisioni Qendror i Zgjedhjeve është duke vazhduar të pranojë pako të supozuara me fletëvotime të cilat po vijnë nga jashtë vendit në kuadër të periudhës së votimit përmes postës.

Këtë e ka bërë të ditur për Klan Kosovën, zëdhënësi i KQZ-së, Valmir Elezi, ndërsa tha se deri më tani numri i pakove të supozuara me fletëvotime që janë pranuar është: 14 mijë e 625.

Ai shtoi se pranimi i këtyre pakove po bëhet me përcjelljen e Policisë së Kosovës si dhe vëzhguesve të subjekteve politike dhe organizatave jo-qeveritare të akredituara.

Kreu i AAK-së, Ramush Haradinaj, ka kërkuar votën e pejanëve për kandidatët e listës që i prin ai për të përmbushur synimin e tij që të jetë në krye të Presidencës dhe gjithashtu në Qeveri.

Fjalimin e tij e nisi duke ndarë një kujtim të tij për lidhjen e tij që ka me qytetin e Pejës.

“Si i ri kam ardhur në Pejë, por s’e kam ndie shijen e Pejës. Hera e parë kur e ndjeva ka qenë qershori i 99-ës edhe ky shesh. Edhe pse vinte era shkrumb, ky shesh e kishte një shije të mirë, kishte erë tël irisë. Liria filloi këtu. Peja është vendi i dashurisë dhe heronjve, atyre që mbrojtën kufijtë e shqiptarëve ndër shekuj, i intelektualeve dhe i atyre që punojnë fort. Peja është edhe Aleancë që 20 vjet”.

Haradinaj në Pejë po zotohet që Kosovës do t’i kthehen edhe pjesët që me demarkacionin derisa ai ishte kryeministër mbeten në Mal të Zi.

“Edhe në luftë m’i kanë marrë pozicionet, por prapë i kemi kthyer. Kështu do ta kthejë edhe Çakorrin dhe Kullën e Zhlepit”.

I pari i AAK-së lavdëroi edhe programin për qeverisje duke thënë se po ia kopjojnë partitë tjera.

“E keni parë se sa seriozisht kemi punuar, e keni parë se si po na i marrin idetë tona dhe ne do t’i ndihmojmë vendit dhe ekonomisë së tij. Programi ynë shtyllën e parë e ka ekonominë. Siguria është e dyta dhe shteti ligjor”.

Haradinaj nga Peja komentoi edhe sondazhet që tha se po bëhen me qëllimin të bindjes së votuesve se kë duhet votuar. Por, ai tha se realiteti do të shihet më 14 shkurt dhe se do të jetë në favor të tij.

“Ne sillemi me respekt dhe jo me arrogancë. Po mundohen me sondazhe me i bindë se kë duhet të votoni. Uroj që të kenë vota sa më shumë secila parti. AAK-së i beson populli. Nuk po na njihni, por shihemi më 14 shkurt. Do të jemi në Qeveri dhe në krye të Presidencës”.

Partia Socialdemokrate ka vendosur disa pankarta mbi banerin e kandidatit të Lëvizjes Vetëvendosje për kryeministër, Albin Kurti dhe ushtrueses së detyrës së presindetes, Vjosa Osmani.

“Babai i madh po ju vëzhgon” është mbishkrimi që PSD-ja e ka vendosur mbi banerin e Kurtit dhe Osmanit.

“Big father is watching you! Figura e babës është e gjithëpranishme. Një rend i tillë nuk ka nevojë për kontroll e mbikëqyrje, sepse fryma e përditshme përshkohet nga autocensura. Në fund të fundit, baba edhe kur e ka keq, e ka mirë, apo jo? Figura e babës dhe ajo e autoritetit suprem janë fytyrat e disiplinës e kontrollit, moralit e fajit. Baba nuk e lejon ndërgjegjen e dytë në truallin e tij. Syri i tij bëhet shikimi yt, sepse ai nuk pretendon që është vetëm shteti, por ngadalë insiston të bëhet shoqëria. Si pjesë e këtij procesi të ri, lindin normat”, thuhet në komunikatën e PSD-së.

Tutje, partia e Dardan Molliqajt ka përmendur edhe shamitë që LVV po i vendos rrugëve, ndërsa ka paralajmëruar se po vjen një regjim i ri.

“Përmes ceremonialeve e simboleve të shpikura e të përvetësuara, me himn partie e shami shesheve, realizohet rituali politik i një regjimi të ri. Aty nuk ka qendra mendimi, por vetëm vegla kufizimi. Mjafton ta lexojmë këtë aspekt për ta kuptuar sforcimin që përmes ritualit mundohet të konvertohet në besim. Regjimi i Kurtit rregullohet nga ligjet e veta”, thuhet në komunikatë.

“Një mentalitet politik i cili mendon se e mira publike mund të përcaktohet dhe kuptohet, në tërësinë e saj, vetëm nga një lloj i qeverisjes, dhe të shtrihet deri në kapjen e secilit segment, nuk bënë gjë, përveç se ushtron tashmë dhunë, përmes ligjërimit publik. Në përdorimin e gjuhës si në slloganin “Krejt dhe drejt” instiucionalizon mënyrat e konfliktit, në përpjekje për t’i sheshuar ato”, vijon komunikata.

Sipas PSD-së, Kurti po tenton ta fshijë të kaluarën dhe të ardhmen dhe ta përjetësojë të tashmën.

“E kaluara dhe e ardhmja fshihen, sepse përjetësohet e tashmja. Fshirja e të kaluarës bëhet për përjetësimin e pushtetit të tashëm i cili prodhon dijen e re për faktet e vjetra. Ky është rend që zapton hapësirën dhe lë jashtë kohës çdo mundësi. Por për dallim nga e kaluara, ne nuk do të lejojmë që rasti i Kosovës të shndërrohet në tregim distopian”, thuhet në komunikatën.

Kandidati i LDK-së për kryeministër, Avdullah Hoti, tha të mërkurën, në tubimin elektoral në Kamenicë, se Kosova tashmë e ka kuptuar se oponentë politikë të LDK-së, janë komunistë të orientuar kah Lindja.

“Këta që i kemi përballë, janë njerëz që 30 vite kanë qenë pengesë në procesin e shtet-ndërtimit. Por si LDK s’jemi lodh kemi vazhduar rrugëtimin tonë. Jemi lënduar gjatë procesit por s’jemi ndalë e nuk do të ndalemi asnjëherë. Por tash është mjaft, qytetarët e Kosovës ma në fund pas 15 vitesh që ata organizuan protesta, përgjakën policët nëpër rrugë, tash na u shfaqën me shamia të kuqe, që janë simbolikë e revolucioneve komuniste që shumica e botës ua ka pa sherrin. Pra në fund këta e nxorën kokën ashtu siç janë, komunistë me orientim kah lindja”, tha Hoti.

Kandidati i LDK-së, u shpreh i bindur se do të fitojnë të dielën, pasi sipas tij, njerëzit e arsyeshëm janë më shumë në Kosovës se ata që janë mashtruar nga propaganda e këtyre viteve.

“Në Kosovë, ka më shumë njerëz që e duan demokracinë që janë të orientuar kah perëndimi dhe për këtë arsye, LDK-ja ka me fitu të dielën. Fitorja jonë do të jetë fitore për të gjithë, edhe për këta të kuqtë sepse do t’i integrojmë dhe do t’i bindim se e kanë gabim këtë mënyrë të sjelljes dhe veprimit në Kosovën e vitit 2021”, tha Hoti.

Ai theksoi se vetëm LDK në këto zgjedhje ka ofruar program të qartë për zhvillimin e gjithmbarshëm të Kosovës.

Gjatë këtij tubimi, Hoti, ka përmendur të arriturat gjatë qeverisjes disa mujore, duke e përmendur, aksionin e Karaçevës.

“Dy kryeministrat paraprak e dinin se çka po ndodhte në Karaçeve, por nuk patën guxim për të vepruar, kishin dilema se a është pjesë e territorit të Kosovës. Kryeministri i fundit madje refuzoi një operacion të përgatitur deri në detaje. Erdhëm ne dhe vepruam, shembem ato kazino dhe eliminuam dukuritë tjera negative. Kjo është shenjë se ne punojmë e nuk shpërndajmë parulla me megafon rrugëve siç po bëjnë të kuqtë”, tha Hoti, duke shtuar se me qeverisjen e LDK-së, rajonin e Kamenicës do të përfitoj investime në funksion të zhvillimit të turizmit malor dhe blegtorisë.

Kryetari i Lëvizjes Vetëvendosje, Albin Kurti, ka krahasuar zgjedhjet e 14 shkurtit me referendumin e 1991-s kur populli votoi pro shpalljes së Kosovës shtet të pavarur nga Jugosllavia.

“Në vitin 1991 ne kishim referendumin për pavarësi. Atëherë dolëm Krejt dhe vendosëm Drejt duke votuar masivisht për pavarësinë e vendit sepse e dinim vlerën e secilës votë. 30 vjet më vonë jemi përballë një referendumi të dytë për të vendosur për të ardhmen tonë”, ka thënë Kurti në një video të postuar në Facebook.

Nisma Socialdemokrate mbajti sot tubim elektoral në Komoran të Drenasit.

Lideri i kësaj partie, Fatmir Limaj, fjalimin para të pranishmëve e nisi me një falënderim dhe përshëndetje për Jakup Krasniqin, të cilin e cilësoi si një burrë të madh të asaj zone.

“Numri 121 nuk është vetëm i bashkëluftëtarëve, por edhe i grave e i fëmijëve tanë, që sot janë rritur dhe kanë krijuar familje të tyre. Numri 121 nuk është thjesht numër, por identiteti i këtyre zonave, i mbrojtjes dhe krenarisë”.

“Fitorja jonë është pikërisht me zemrën e vullnetin e fuqishëm të atyre që na besojnë, dhe suksesi e fitoja jonë bazohet në vendosmërinë tonë. Ata nuk e dinë që ne këtu kurrë nuk dorëzohemi, ne shkojmë drejt fitores. Ata nuk e dinë çka është vendosmëria e çka është mos me u dorëzu. Ata nuk ia dinë shijen fitores. Ata janë edhe dembela, nuk punojnë, janë mësuar që tjetërkush me ia sjellë fitoren. Ata atje as nuk mund të kuptojnë se si ne fitojnë”.

“Edhe kur e kanë menduar shkatërrimin e UÇK-së pas ofensivave të shtatorit, nga malet e Berishës i shikonim dhe bënim hajgare me ta. Në shtator UÇK-ja u kthye më fuqishëm. Ata nuk e kuptojnë shpirtin e përcaktimin tuaj, vendosmërinë, ata kur s’kanë tentuar t’ju njohin nga brenda se kush jeni ju. Për t’ju njohur juve është dashur të jenë mes jush e me ju bashkë”.

“Askush si ne s’mund t’ju përfaqësojë më mirë në Kuvendin e Kosovës”.

“Ata para jush mund të dalin vetëm për t’ju premtuar. Ata janë ashtu siç janë.. Zoti i ndihmoftë, por ata nuk janë numri 121”, u shpreh Limaj.

Bordi drejtues i Shërbimit Spitalor Klinik Universitar të Kosovës, në mbledhjen e mbajtur, më 10 shkurt 2021, në mënyrë unanime, e ka votuar Raportin e komisionit vlerësues, në bazë të të cilit drejtor i përgjithshëm i  SHSKUK-së emërohet dr. Valbon Krasniqi.