Shtatë imigrantë ilegalë shqiptarë tentuan të rrëmbenin një anije dhe nxitën një rrethim prej 16 orëve, që përfundoi me arrestimin e tyre në Kanalin Anglez, raporton “The Sun”.
Shtetasit shqiptarë janë zbuluar në një tanker japonez në ishullin Portland, në Dorset, rreth mesnatës.
Shpërthyen trazira në anije ku autoritetet vepruan për të ndaluar tentimin e rrëmbimit të anijes.
Policia erdhi në vendin e ngjarjes rreth orës 5:40 të mëngjesit, pas raportimeve për lëndime në anije.
Në anije u konfirmua se nuk ka të lënduar dhe anija arriti sigurt të dërgohet në portin e Portlandit.
Policia e Dorsetit ka konfirmuar arrestimin e shtatë personave.
Anija, në pronë të Orix Corp, ishte ngarkuar në portin e Rouenit në Francë, para se të bënte rrugën nëpër Kanalin Anglez.
“Ne morëm një telefonatë rreth orës 5:40 të mëngjesit më 9 shkurt nga një shërbim i ambulancës në lidhje me një person që ka kërkuar ndihmë mjekësore në një anije, të quajtur Chise Bulker, në afërsi të bregut të Portlandit. Pas hetimeve, ne mësuam se një numër i vogël i individëve ishin në anije, dhe asnjëri nuk kishte nevojë për asistencë mjekësore. Nëpërmjet Forcave Kufitare, stafit të anijes dhe agjencive tjera u arrit që anija të arrijë sigurt në portin e Portlandit. Një total shtatë individë, që besohet se janë shtetas shqiptarë – janë arrestuar nga policia. Ata do të hetohen nga Forcat Kufitare dhe autoritetet e Britanisë për Viza dhe Imigracion, për shkelje potenciale”, thuhet nga zëdhënësi i Policisë së Dorsetit.
