Nga numërimi i më shumë se 200 mijë votave deri tash, Lëvizja Vetëvendosje po vazhdon të thellë diferencën me partitë pasuese. Ajo tash ka 46.58 për qind të votave, apo më shumë se tri partitë tjera të mëdha bashkë. PDK-ja ka 18.95 për qind, LDK-ja 13.89 e AAK-ja 8.64 për qind.

Zgjedhjet e sotme për Kuvendin e Kosovës kanë shënuar daljen më masive të qytetarëve në katër palë zgjedhjet e fundit parlamentare.

Të dhënat zyrtare të KQZ-së tregojnë për 834.307 votues ose 46.97 për qind nga 98.97 për qind e votave të përpunuara në zgjedhjet për legjislativin e tetë nga 1.794.862 qytetarë me të drejtë vote.

Numri i daljes së qytetarëve në zgjedhjet e 6 tetorit 2019 ishte 826.916 ose 44.56 për qind nga 1.961.213 qytetarë me të drejtë vote.

Në zgjedhjet e 11 qershorit 2017, pjesëmarrja ishte 779.729 votues ose 41.3 për qind nga 1.888.059 qytetarë me të drejtë vote.

Një dalje më e madhe ishte në zgjedhjet e 8 qershorit 2014, ku jehona e pjesëmarrjes ishte 734.055 votues ose 42.63 për qind nga gjithsej 1.799.023 qytetarëve me të drejtë vote.

Zgjedhjet e sotme në Kosovë u mbajtën pasi Gjykata Kushtetuese, me kërkesë të Lëvizjes Vetëvendosje vlerësoi jo legjitime Qeverinë Hoti për shkak të votës së deputetit Ethem Arifi, i akuzuar për vepër penale.

Enver Hoxhaj nuk ka komentuar ende sondazhet e publikuara në media.

Kreu i PDK-së sapo ka publikuar një foto me djalin e ish-presidentit Thaçi dhe ish-kryetarit të PDK-së, Kadri Veseli.

“Me djemtë e heronjve të gjallë të luftës dhe të paqes, Endritin dhe Klestorin” shkruan Hoxhaj në Facebook.

Nisma Socialdemokrate ka reaguar pas publikimit të exit-polleve.

Kjo parti thotë se exit pollet tregojnë trendin e zgjedhjeve se cila parti ka mbështetje por nuk tregojnë rezultatin në kutitë e votimit.

“Sipas informatave tona nga njerëzit tanë në teren, besimi për Nismën Socialdemokrate është rritur nga qytetarët e vendit, prandaj është shumë e rëndësishme që besimi i qytetarëve i dhënë përmes votës të lexohet drejtë dhe të mos cenohet nga askush”, shkruan Nisma.

Postimi i plotë:

Exit pollet zakonisht tregojnë trendin e zgjedhjeve se cila parti ka mbështetje më të madhe dhe në asnjë rast nuk tregojnë rezultatin në kutitë e votimit!

Saktësia e exitpolleve nuk vlen sidomos për partitë e vogla!

Prandaj, ftojmë komisionerët dhe vëzhguesit e NISMËS që të bëjnë punën e tyre deri në numërimin e votës së fundit!

Sipas informatave tona nga njerëzit tanë në teren, besimi për Nismën Socialdemokrate është rritur nga qytetarët e vendit, prandaj është shumë e rëndësishme që besimi i qytetarëve i dhënë përmes votës të lexohet drejtë dhe të mos cenohet nga askush.

Zyra për Informim e NISMA Socialdemokrate!

Komisioni Qendror i Zgjedhjeve ka dalë me të dhënat përfundimtare sa i përket daljes në votime.

Janë 46% e qytetarëve që kanë kryer obligimin e tyre duke votuar në gjithë territorin e Republikës së Kosovës.

Radiotelevizioni Dukagjini ka publikuar “EXIT Poll-in” e saj për zgjedhjet e sotme parlamentare.

Sipas këtij “Exit Polli”, partia e parë është Lëvizja Vetëvendosje me 55 ulëse apo 47.9%.

Kurse, vendin e dytë e ka PDK me 20 ulëse apo 17.7% , ndërsa partia e tretë është LDK 17 ulëse apo 14.6 përqind.

Pozitën e katërt e ka AAK 8 ulëse apo 6.6 përqind , ndërsa NISMA s’e kalon pragun sipas “Exit Poll-it”