Në zgjedhjet e parakohshme parlamentare të mbajtura më 14 shkurt në Kosovë, subjektet politike të komuniteteve pakicë në vend kanë garuar për 20 ulëset e Kuvendit të Kosovës, të cilat janë të garantuara për këto komunitete.

Nga numri prej 20 ulëseve, dhjetë janë të garantuara për përfaqësuesit e komunitetit serb në Kosovë.

Ndërkaq, dhjetë ulëse të tjera janë të garantuara për pakicat joserbe. Prej tyre tri ulëse i takojnë komunitetin boshnjak, dy ulëse për komunitetin turk, për përfaqësuesit e komuniteteve rom, ashkali dhe egjiptian nga një ulëse, si dhe një ulëse shtesë për njërën nga këto bashkësi, e cila fiton më së shumti vota. Një ulëse i takon komunitetit goran.

Lista Serbe, 10 mijë vota më pak se më 2019

Në bazë të rezultateve preliminare të publikuara nga Komisioni Qendror i Zgjedhjeve, Lista Serbe, e cila ka garuar përballë dy subjekteve tjera politike serbe, Iniciativës qytetarë për liri, drejtësi dhe mbijetesë dhe Lidhjes Demokratike Serbe (SDS), ka fituar bindshëm me 43.754 vota. Pjesën dërmuese të këtyre votave Lista Serbe e ka siguruar në komunat e banuara me shumicë serbe në Kosovë.

Në zgjedhjet e 14 shkurtit, sipas rezultateve preliminare të publikuara nga KQZ-ja, Lista Serbe ka marrë 5.56 për qind të votave dhe ka siguruar dhjetë ulëse në Kuvendin e Kosovës, të garantuara për komunitetin serb.

Por, në zgjedhjet e parakohshme parlamentare të vitit 2019, Lista Serbe, e cila po ashtu kishte fituar dhjetë ulëse e garantuara për komunitetin serb në Kuvendin e Kosovës, kishte fituar 53.861 vota apo 6. 74 për qind të numrit të përgjithshëm të votave.

Në bazë të rezultateve preliminare nga KQZ-ja, në zgjedhjet e 14 shkurtit të vitit 2021, Lista Serbe ka marrë mbi 10.000 vota më pak në krahasim me zgjedhjet e vitit 2019.

Tri ulëse për tri parti të komunitetit boshnjak

Për tri ulëset e garantuara për komunitetin boshnjak në Kuvendin e Kosovës, kanë garuar pesë subjekte politike boshnjake: Koalicioni Vakat, Unioni Socialdemokrat, Partia e Re Demokratike, Iniciativa e Jonë dhe Komuniteti i Bashkuar – Adrijana Hoxhiq.

Sipas të dhënave preliminare nga KQZ-ja, më së shumti vota nga këto subjekte ka marrë Komuniteti i Bashkuar – Adrijana Hoxhiq (UZ-AH). Ky subjekt ka marrë 6.379 vota dhe ka siguruar një ulëse të garantuar në Kuvendin e Kosovës. Koalicioni Vakat ka marrë 5.667 vota dhe po ashtu ka siguruar një ulëse të garantuar në Kuvendin e Kosovës. Një ulëse të garantuar për komunitetin boshnjak e ka marrë edhe Partia e Re Demokratike (NDS), e cila ka marrë 2.761 vota. Por, jashtë Kuvendit të Kosovës besohet se ka mbetur Unioni Socialdemokrat që udhëhiqet nga Duda Bale, e cila ka qenë deputete e Kuvendit të Kosovës për disa mandate.

Lista Serbe “mollë sherri” ndërmjet subjekteve boshnjake

Duda Bale, në një bisedë me Radion Evropa e lirë, më 28 janar, e kishte akuzuar Listën Serbe se po planifikonte që “përmes trupit të saj votues të ushtrojë ndikim dhe të vë nën kontroll disa nga komunitetet joshumicë në Kosovë”. Ajo ka thënë se numri i boshnjakëve që jeton në Mitrovicën e Veriut nuk është i madh dhe se me një numër të caktuar të votave, mund të ndikohet në marrjen e mandateve politike. Sipas saj, Lista Serbe në zgjedhjet e vitit 2019, “ ka pasur rreth 10.000 vota më shumë sesa që i janë nevojitur dhe me ato vota tash po përpiqet që të ushtrojë ndikim”.

Siç ka theksuar Bale, menjëherë pas shpalljes së zgjedhjeve në fillim të janarit 2021, dy iniciativa qytetare u shfaqën nga radhët e komuniteteve boshnjake dhe rome, për të cilat ajo beson se punojnë për interesin e Listës Serbe.

Më 15 janar 2021, presidenti i Listës Serbe, Goran Rakiq (në qendër), paraqiti listën e tij të kandidatëve për pjesëmarrje në zgjedhjet e parakohshme parlamentare në Kosovë, që do të mbahen më 14 shkurt.

Fjala është për “Komuniteti i Bashkuar – Adrijana Hoxhiq” (UZ-AH) nga Mitrovica e Veriut, e cila është një nga katër komunat e banuara me shumicë serbe në veri të Kosovës, si dhe për Iniciativën Rome (RI) të Gazmend Salijeviqit nga Graçanica, gjithashtu komunë kjo e banuar me shumicë serbe. Bartës i listës së kësaj të fundit është Fadil Gashi.

Bale ka theksuar se Lista Serbe “e kanë përllogaritur saktë se mund t’i japin tri deri në katër mijë vota për këtë opsion boshnjak dhe një deri në dy mijë vota për nismën rome. Goranët, praktikisht i posedojnë tash e një kohë të caktuar. Mendoj që qëllimi është që të marrin dy të tretat e votave të pakicave, sepse kjo do të ishte fuqi e madhe në Kuvend”, ka thënë ajo.

Akuza të ngjashme ka pasur edhe nga Nenad Rashiq nga Partia Demokratike Progresive (PDS), i cili ka thënë se Lista Serbe po përpiqet të “marrë” ulëset e garantuara për komunitetet tjera pakicë në Kuvendin e Kosovës, duke u dhënë mbështetje subjekteve të caktuara politike të sapoformuara nga radhët e komuniteteve boshnjake, rome, ashkali dhe egjiptiane, si dhe gorane.

Por, akuzat e tilla lidhur me subjektin e saj, i ka kundërshtuar ashpër dhe i ka hedhur poshtë Adrijana Hoxhiq.

“Jo, absolutisht nuk ekziston kurrfarë marrëveshje ndërmjet nismës sime, e cila do të merret me çështjet e bashkësisë boshnjake dhe Listës Serbe. Nuk ekziston ai luks që një parti politike t’i ndihmojë një tjetre në një proces zgjedhor”, ka thënë Hoxhiq.

Shumica e votave për “UZ-AH” dhe “RI” nga komunat me shumicë serbe

Në bazë të rezultateve preliminare të publikuara nga Komisioni Qendror i Zgjedhjeve, mund të shihet se pjesa më e madhe prej 6.379 votave që ka marrë “Komuniteti i Bashkuar – Adrijana Hoxhiq”, është siguruar në komunat e banuara me shumicë serbe. Sipas të dhënave preliminare të KQZ-së, mbi 5.300 vota për këtë subjekt janë evidentuar në komunat e banuara me shumicë serbe.

Po ashtu, sipas rezultateve preliminare të KQZ-së, Iniciativa Rome ka marrë 3.825 vota, prej të cilave rreth 2.300 janë evidentuar se vijnë nga komunat e banuara me shumicë serbe.

Iniciativa Rome besohet se e ka siguruar një ulëse në Kuvendin e Kosovës.

Përveç Iniciativës Rome, nga komunitetet: rom, ashkali dhe egjiptian (RAE), besohet se janë fituar edhe tri ulëse të tjera në Kuvendin e Kosovës.

Bazuar në rezultatet preliminare nga KQZ-ja, besohet se dy ulëse ka marrë komuniteti egjiptian.

Pra, nga një ulëse në Kuvendin e Kosovës e kanë fituar: Iniciativa e Re Demokratike e Kosovës (IRDK) me 2.780 vota dhe Partia Liberale Egjiptiane (PLE) me 2.194 vota.

Partia Demokratike e Ashkanlive të Kosovë (PDAK) besohet se ka fituar një ulëse me 1.929 vota.

Për një ulëse të garantuar në Kuvendin e Kosovës, që i takon komunitetit goran, në zgjedhjet e 14 shkurtit, kanë garuar Partia Unike e Goranëve (JPG) dhe Koalicioni Bashkë (KZ).

Partia Unike e Goranëve e drejtuar nga Adem Hoxha, besohet se ka fituar ulësen në Kuvendin e Kosovës, me 2.116 vota.

Në mandatin e kaluar legjislativ, Hoxha i ishte bashkuar Grupit parlamentar të Listës Serbe.

Dy ulëse për KDTP

Për dy ulëse të garantuara në Kuvendin e Kosovës për komunitetin turk, në zgjedhjet e 14 shkurtit kanë garuar Partia Demokratike Turke e Kosovës (KDTP) dhe Partia e Re e Lëvizjes Turke (YTHP). Sipas rezultateve preliminare nga KQZ-ja, garën për të dy ulëset e ka fituar Partia Demokratike Turke e Kosovës me 6.152 vota përballë Partisë së Re e Lëvizjes Turke, e cila ka marrë 1.154 vota.

Të gjitha të rezultatet preliminare të cilat deri më tash janë publikuar nga KQZ-ja, mund të ndryshojnë deri në numërimin përfundimtar të votave dhe certifikimin e rezultateve. Varësisht nga kjo, mund të ketë ndryshime edhe në numrin e votave që kanë marrë subjektet politike të komuniteteve pakicë, të cilat janë paraqitur në këtë tekst.

Ndërkaq, me 99 për qind të votave të numëruara, Lëvizja Vetëvendosje e Albin Kurtit, sipas rezultateve preliminare, ka fituar 47.89 për qind të votave. Albert Krasniqi nga ‘Demokracia Plus’ ka thënë se në bazë të këtij rezultati, partia e Kurtit pritet të ketë 56 deputetë në legjislativin e ri.

Kurtit, që është i nominuari i LVV-së për kryeministër, do t’i duhen të paktën 61 vota në kuvend, që të formojë Qeverinë e re të Kosovës. Tradicionalisht, partitë e komuniteteve joshumicë kanë qenë pjesë e ekzekutivit. Por, më 2020, kur qeverinë e udhëhoqi Kurti, Lista Serbe, zyrtarisht nuk u bë pjesë e koalicionit qeverisës, por asaj iu dhanë nën udhëheqje dy ministri.

Presidenti i Francës Emmanuel Macron ka deklaruar se ai mbështet vazhdimin e procesit të dialogut ndërmjet Kosovës dhe Serbisë, me ndërmjetësimin e Bashkimit Evropian.

Në një letër dërguar homologut të tij serbe Aleksandar Vuçiq me rastin e ditës së shtetit serb, presidenti Macron ka thënë se mbështet arritjen e një marrëveshjeje gjithëpërfshirëse.

“Ndërsa diskutuam në Paris, unë mbetem i vendosur të mbështes përpjekjet në lidhje me dialogun midis Beogradit dhe Prishtinës, me mbështetjen e ndërmjetësimit evropian, që synon arritjen e një marrëveshje gjithëpërfshirëse dhe përfundimtare që do të kontribuojë në stabilitetin e të gjithë rajonit”, ka thënë Macron.

Dialogu ndërmjet Kosovës dhe Serbisë, ka nisur në Bruksel që nga viti 2011 për çështje teknike dhe më pas ka vazhduar në nivelin e përfaqësimit të lartë politik, ku janë arritur më shumë se 30 marrëveshje.

Një pjesë madhe e këtyre marrëveshjeve ende nuk janë zbatuar ose janë zbatuar pjesërisht.

Presidenti i SHBA-së Joe Biden në një letër dërguar Vuçiq, ka kërkuar nga ky i fundit që të njohë pavarësinë e Kosovës.

Zëdhënësi i KQZ-së, Valmir Elezi thotë se certifikimi i rezultatit zgjedhor vjen pas numërimit të tërë votave dhe afatit të ankesave të partive politike.

Elezi shton se akoma janë duke pranuar materialin zgjedhor nga komunat e Kosovës.

Ai thotë se brenda disa ditësh do fillohet numërimi i votave me kusht, atyre të diasporës dhe personave me nevoja të veçanta.

“Momentalisht jemi duke pranuar materialin zgjedhor nga komunat e Kosovës. Kemi edhe procedura tjera në QNR, por brenda disa ditësh do fillojmë numërimin e votave me kusht, nga diaspora dhe personave me nevoja të veçanta. Certifikimi i rezultatit përfundimtar shpreosjmë që vijmë pas numërimit të tërë fletëvotimeve, por edhe pas numërimit është afati i ankesave të partive politike, pastaj vjen certifikimi i rezultatit përfundimtar, por datë nuk mund të themi“, deklaroi Elezi në Dukagjini.

Deri tani janë numëruar 99.25% të votave në gjithë Kosovën.Nga numërimi i këtyre votave, prin Vetëvendosje me 47.89%, pastaj vjen PDK me 17.36% dhe LDK me 13.08%.

“Kjo mbështetje tregon mirësinë tuaj dhe dashurinë që keni për atdheun”.

Lëvizja Vetëvendosje i ka falënderuar të gjithë qytetarët për pjesëmarrjen dhe kulturën demokratike të treguar në këto zgjedhje.

Ky subjekt politik ka thënë se dëshira më e madhe tash është që të dëshmojnë me punë dhe nder që ta sjellin ndryshimin që qytetarët e presin.

“Kjo mbështetje tregon mirësinë tuaj dhe dashurinë që keni për atdheun”.

Më poshtë mund ta lexoni shkrimin e plotë të VV-së në Facebook.

Ju na keni mbështetur, jo për interesa personale, por për parimet politike dhe qëndrueshmërinë. Mbështetja juaj për Lëvizjen, nuk ka pasur ndonjë precedent në historinë e Kosovës, për asnjë subjekt tjetër.

Kjo mbështetje tregon mirësinë tuaj dhe dashurinë që keni për atdheun. Dëshira jonë më e madhe tash është që të dëshmojnë me punë dhe nder që ta sjellim ndryshimin që ju prisni, dhe ta meritojmë mbështetjen tuaj.

Falënderojmë të gjithë qytetarët për pjesëmarrjen dhe kulturën demokratike të treguar në këto zgjedhje. Falënderojmë gjithë mbështetësit e Lëvizjes, që na e sollën këtë moment historik. I falemi nderit prej mërgatës që ka votuar me postë dhe masivisht ka ardhur në Kosovë. Dhe sigurisht, e pamundur është të mos e shprehim vlerësimin për punën e madhe e të palodhur të gjithë aktivistëve dhe vullnetarëve. Në veçanti falënderojmë vëzhguesit e komisionarët e ditës së zgjedhjeve, vëzhguesit e votave të mërgatës, si dhe vëzhguesit e Qendrës së Numërimit që nisin punën nga sot.

Jemi të prekur thellësisht nga bujaria e pamatë e familjeve anekënd Kosovës që na hapët dyert e zemrën muajin e shkuar, duke na pritur. Ju jemi mirënjohës përjetë. Në çdo shtëpi që ishim u pritëm ngrohtë dhe nuk pati nevojë të thërrasim për më shumë mobilizim se atë punë tashmë e kishte kryer gjyshi a gjyshja deri te nipi e mbesa.

Bashkë do ta bëjmë më të mirën për vendin, shoqërinë dhe ekonominë tonë.

Raportuesja për Kosovën në Parlamentin Evropian, Viola von Cramon, ka thënë se qeveria e re në Kosovë duhet të përparojë në rrugën evropiane, duke shtuar se dialogu me Serbinë duhet të vazhdojë.

“Qeveria e re duhet të përparojë në rrugën evropiane dhe duhet të vazhdojë dialogu me Serbinë”, ka deklaruar ajo.

Këto deklarime Cramon i ka bërë për agjencinë e lajmeve Tanjug. Ajo sot ka uruar qytetarët e Kosovës për procesin e suksesshëm zgjedhor, ku ka shkruar se zgjedhjet e lira janë organizuar pavarësisht pandemisë së koronavirusit.

AKR do të vazhdojë të mbetet parti konstruktive në ndërtimin e institucioneve shtetërore.

Kështu shprehet Naim Murseli, këshilltar i Kryetarit të AKR-së, Behgjet Pacolli, i cili ka thënë se ky subjekt nuk do të kontribuonte në një bllokadë të mundshme politike në vend, transmeton KlanKosova.tv.

“Vullneti i qytetarëve duhet dhe do të respektohet. Sot, Kryetari i AKR-së z. Behgjet Pacolli uroi fituesin e zgjedhjeve, Lëvizjen Vetëvendosje. AKR është dhe mbetet një parti konstruktive, duke mos kontribuar asnjëherë në bllokadën e institucioneve të shtetit. Ashtu do të veprojmë çdo herë”, është shprehur Murseli.

“Qytetarët e Kosovës duan të shohin një të ardhme më të ndritur, dhe është obligim i secilit të punojmë në këtë drejtim!”.

Çështje e diskutueshme është nësë Lëvizja Vetëvendosje do të arrijë ta zgjedh Presidentin e ri të vendit, apo do t’i duhet ndihma e ndonjë partie tjetër.

Zëdhënësi i Komisionit Qendror të Zgjedhjeve, Valmir Elezi, ka bërë të ditur se ka përfunduar procesi i numërimit të votave.

Në një lidhje direkte në emisionin Info Magazine në Klan Kosova, ai ka treguar se kanë mbetur edhe 19 vendvotime të dhënat e të cilave ende nuk janë publikuar në web-faqen e KQZ-së.

“Mbrëmë rreth mesnatës ka përfunduar procesi i numërimit në të gjithë vendin, nuk ka ndonjë vendvotim që ka mbetur pa u numëruar”.

“Janë vetëm 19 prej tyre që të dhënat ende nuk janë transmetuar në web-faqe”.

Sekretari amerikan i Shtetit, Antony Blinken i ka përgëzuar qytetarët serbë për ditën e shtetit.

Në urim nga ana e sekretarit të Shtetit i është përsëritur Serbisë kërkesa e presidentit, Joe Biden për njohje reciproke me Kosovën.

Blinken tha se Shtetet e Bashkuara janë të përkushtuara për zhvillimin e një aleance të gjatë midis dy vendeve.

Ai theksoi marrëveshjen gjithpërfshirëse me Kosovën, duke përmendur një kompromis që do të kërkohet nga të dy palët për arritjen e njohjes reciproke.

“Departamenti i Shtetit mirëpret përpjekjet që çojnë në krijimin e normalizimit të marrëdhënieve me Kosovën dhe arritja e një marrëveshjeje gjithëpërfshirëse që synon njohjen e ndërsjellë do të kërkojë fleksibilitet dhe gatishmëri për kompromis nga të dy palët”.

Javën e kaluar presidenti i Shteteve të Bashkuara të Amerikës Joe Biden, i ka dërguar një letër presidentit të Serbisë Aleksandër Vuçiq, me rastin e 15 shkurtit Ditës së Shtetit të Serbisë.

Përpos urimit në letër kishte edhe një kërkesë për njohjen reciproke mes Serbisë dhe Kosovës.

Dhoma e vizitave në Qendrën Korrektuese për Femra në Lipjan u shfrytëzua për të zhvilluar procesin e votimit.

Gjithçka ishte bërë gati nga ekipi mobil i KQZ-së, që gratë të cilat vuajnë dënimin në këtë qendër ta ushtrojnë të drejtën e votës.

Kutive të votimit kanë të drejtë t’i drejtohet të gjithë qytetarët me heqje lirie në Kosovë.

Pavarësisht se gjenden në qendër korrektuese, procesi i votimit në Qendrën Korrektuese për Femra në Lipjan u zhvillua si në çdo qendër tjetër votimi, për zgjedhjet e parakohshme parlamentare në Kosovë.

Të burgosurat në Lipjan, gjithashtu paraprakisht kanë marrë të gjithë udhëzimet për mënyrën e votimit.

Edhe pse u drejtuan për të kryer procesin e votimit, jo të gjitha gratë që vuajnë dënimin në Qendrën Korrektuese në Lipjan mundën ta bëjnë atë. Në mesin tyre, dikush nuk u gjet në listën e votuesve.

E, dikush tjetër kishte mundësi ta ushtrojë këtë të drejtë, madje e këtë ditë e kishte pak më të veçantë se të burgosurat tjera.

Ka mbushur 18 vjet dhe për herë të arë në jetë e shfrytëzoi të drejtën e votës. Por, fatkeqësisht këtë e bëri në një ambient aspak të mirë. 18-vjecarja votën e saj të parë e dha në Qendrën Korrektuese për Fermra në Lipjan, ku për më shumë se një vit po vuan dënimin për një vepër penale.

“Për mendimin tem procesi i votimit është mirë dhe jam e kënaqur. Është e parë që unë votoj dhe është e hera e parë që në qendrën korrektuese. Shpresoj që ka me ardhë një njeri I duhur në udhëheqje dhe kanë me ndryshu shumë sene”, ka thënë ajo për lajmi.net.

Duke respektuar masat për parandalimen e përhapjes së pandemisë Covid -19, të drejtën e votës në burg e kanë shfrytëzuar gjithsej 25 femra, të cilat vuajnë dënimim për vepra të ndryshme penale.

“Sot ka filluar procesi zgjedhor, sin ë çdo qender tjetër. Është duke u zhvilluar në kushte normale. Numri i të burgosurave në këtë qendër është 34, prej tyre kanë të drejtë vote 25 dhe të gjitha po e shfrytëzojne të drejtën e tyre. Dokumente valide të Republikës së Kosovës kanë 16, të tjerat votojnë me kopje të letërnjoftimit, ku komisioni është duke bërë verifikimin përmes kopjeve të letërnjoftimit”, ka thënë përgjegjesi për siguri në këtë qendër korrektuese, Agron Krasniqi.

Afër kësaj qendre korrektuese, gjendet edhe ajo për të mitur. Në këtë qendër gjendet edhe pavijoi që përfshinë shkollën. Disa të rinj gjendeshin në korridorin e shkollës së kësaj qendre korrektuese, por për një arsye tjetër. Jo për të ndjekur procesin mësimor, por për të ushtruar të drejtën e tyre për votuar.

Edhe ata që vuajnë dënimin në qendrën korrektuese për të mitur në Lipjan, e tashme kanë arritur moshën madhore mund ta hedhin votën e tyre.

Procesi edhe këtu po konsiderohet se shkoi gjithcka në rregull. Kështu tha drejtori i kësaj qendre, Arif Beqa.

“Votimi ka filluar mirë. Komisioni komunal i votimit veç ka ardhë , kanë fillu votimet dhe procesi po shkon mirë. Deri tani nuk kemi raste që kanë refuzuar, por do të thotë që ndonjë nuk refuzon të drejtën e qytetarit, por ne u mundësojmë me votu, ka thënë ai për lajmi.net.

Por, jo të gjithë votuesit në këtë qendër korrektuese janë të mitur me heqje lirie.

“Deri tani gjithcka ka shku siç e kemi paraparë, nuk ka ndonjë parregullsi. Personat që kanë të drejtë vote veç janë duke votuar. Numri gjithësej I votuesve është 66, 23 prej tyre janë staf dhe të tjerët janë pjesëtarë të qendrës”, ka thënë Ganimete Osmani nga KQZ.

Stafi i kësaj qendere korrektuese që kanë votuar, përfshinë të rritur të dënuar, por që janë të punësuar në këtë qendër. /Lajmi.net/

Të martën me datë 16 shkurt do mbahet seanca e rradhës në Hagë ndaj Hashim Thaçit, Rexhep Selimit, Jakup Krasniqit dhe Kadri Veselit.

Konferenca statutore do filloj në ora 11:00.

Më herët, gjykatësi i procedurës paraprake u ka refuzuar kërkesën për lirim me kusht të akuzuarve nga kjo Gjykatës.

Sa i përket seancës për Salih Mustafën, javën e kaluar ka pasur zhvillime.Gjykatësi i procedurës paraprake në Gjykatën Speciale, Nicolas Guillou, e ka marrë vendimin e parë lidhur me pjesëmarrjen e viktimave në procesin gjyqësor ndaj ish-eprorit të UÇK-së, Salih Mustafa.

Katër persona janë paraqitur si viktima dhe kanë aplikuar përmes postës elektronike për t’u bërë pjesëmarrës në procesin gjyqësor kundër Mustafës.